Itulau o le lotoifale
Ua Fiafia Faatasi Tamaiti Aoga Seminare i le Pasefika i Saute Atoa
Ua faamaeaina e le autalavou o le Au Paia o Aso e Gata Ai vasega o suesuega i tusitusiga paia mo le tausaga.
E lei mafai e Alana Tuipulotu ona taofiofi lona olioli. O ia o le tagata muamua i lona aiga ua faauu mai i le fa tausaga o polokama a le Seminare i le taeao po lea e ofoina atu e Le Ekalesia a Iesu Keriso o le Au Paia o Aso e Gata Ai.
I Niu Sila, o le seminare o se poloka o le taimi e tuueseina ao lei amataina le aoga e aoao ai e uiga i le Faaola ma suesue i Ana aoaoga i tusitusiga paia. E masani lava ona aoaoina i se falesa o le Au Paia o Aso e Gata Ai i le lotoifale.
E a’oga Tuipulotu i le Kolisi a Marian i Kalaiasetete, Niu Sila.
“O se amataga lelei i lo’u aso,” na ia fai mai ai. “O la’u inumaga faaleagaga lea ae ou te lei alu i le aoga.”
O le faamoemoega o le Seminare ina ia fesoasoani i le autalavou ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma saunia i latou lava, o latou aiga, ma isi mo le ola e faavavau faatasi ma lo latou Tama o i le Lagi.
“O le mea taatele lava ou te faalogo i tamaiti aoga o faapea mai,” o le tala lea a le faiaoga Seminare i Aukilani o Derek Good, o le, “E tele lava ina sologa lelei lo’u aso pe a ou amataina i le Seminare.”
O Good o se faiaoga Seminare volenitia i le taeao po mo le fa tausaga.
O le toatele o e faauu e faaauau atu e auauna atu i ni misiona faafaifeautalai i le Ekalesia.
O nisi atunuu e manaomia se tusipasi faauu o le Seminare e avea ma se tulaga manaomia mo le mauaina o visa mo auaunaga faalelotu.
Na saunoa Good, o se tasi o ana tamaiti aoga muamua, o loo auauna atu i se misiona i Filipaina i le taimi nei, “o le Seminare o le mea lea sa sauniaina au i le tele o vaega mo la’u misiona.”
“Mai le matou vasega faauu o le 2017, sa toatolu alii talavou ma le lua tamaitai talavou na faamaeaina le fa tausaga o le seminare ma o le toalima uma lena o loo auauna faamisiona i le salafa o le lalolagi,” na saunoa ai Good.
“I le avea ai ma se faiaoga, e manino lava o le auai i le Seminare, e faateleina ai e le Alii lou malosiaga e faia ai isi mea e tatau ona e faia. Ioe, e alu le taimi e saunia ai lesona o aso taitasi ma malaga ai, aoao ma momoliina tamaiti pe a uma, ae e foliga mai e tele lava o’u taimi avanoa,” na ia fai mai ai.
“O tamaiti aoga e o mai e naunau ia aoaoina e le Agaga. Ou te iloa ou te aoaoina le lesona e tasi ae o le Agaga Paia na te aoaoina le 15-20 lesona eseese i le taimi lava lea.”