Savali faaleautaitai i le eria

Vaai Atu i Mata Fou . . . Faalogo i Taliga Fou . . . Tautala I Se Gagana Fou . . .

Saunia e Elder Allistair B. Odgers

Fitugafulu Eria

Na saunoa Elder Marvin J. Ashton o le Korama a Aposetolo e Toasefululua, “O le ala sili ma le manino e iloa ai o loo tatou alualu i luma ma o mai ia Keriso o le ala lea o loo tatou taulimaina ai isi tagata.”

Pe a tatou maua fofoga o Keriso i o tatou lava foliga ma vaai atu i isi e ala atu i fofoga o Keriso, o le a tatou maua se malosi sili atu e vaai ai i fofoga o Keriso i foliga o isi. O lenei mea o le a siitia ai o tatou manao e faia isi ia sili atu.

E manaomia ona tatou ola i tua atu o mea o loo tatou vaaia—ma ola i tua atu o o tatou lava manatu ma faamoemoega ina ia vaai atu ai i isi i se malamalama fou.

Ao tatou iloaina ma mafaufau i se auala fou e taulimaina ai tagata, atonu e manaomia ona tatou fesili ifo ia i tatou lava: pe o tatou vaavaai atu i a tatou Koliata faapea ua tetēle tele e fasiotia pe faatoilaloina; pe o tatou vaai atu e pei ona vaai ai Tavita—e ala atu i fofoga o le Atua—faapea ua tēle tele lena Koliata e misi ai?

Faatasi ai ma se valaaulia ia ‘auai ma le filiga’ i le faaleleia o le auala o tatou taulimaina ai isi ou te faamoemoe tatou te le o popole tele e uiga i faaleleiga e manaomia ona tatou faia i o tatou lava olaga. Faamolemole ia manatua, o le tele lava o lo tatou alualu i luma, o le tele foi lea o le lelei o le a tatou vaaia i isi.

1. O le auala tatou te tautatala ai ma le auala tatou te taulimaina ai isi e tutusa lava ma le auala tatou te tautatala ai ma taulimaina ai Keriso. E leai se eseesega.

   E eseese lava auala tatou te fesootai ma tali atu ai ae peitai sei o tatou tagatagai mo ni auala eseese e ‘vaavaai’ atu ai i isi ma mo ni auala sili atu e fesootai ai ma i latou.

   Aua e te ita. Afai e sa’o i tatou, e le tatau ona tatou feita, afai tatou te sese, e le tatau lava ona tatou feita.

   Na saunoa Elder Lynn G. Robbins o le Fitugafulu, “O le ita o se filifiliga. E faatatau i le faitalia. E pei lava o soo se filifiliga tatou te faia. Tatou te manaomia ona mafaufau loloto e uiga i le faaiuga o le filifili e aua le ita. O le uso laitiiti o le ita o le le mautonu, o le uso fai o le ita o amioga le lelei po o le faalii, ma o le uso matua o le ita o le ita ua le taupulea.

   Ioe, e tofu uma lava i tatou ma vaivaiga, ae e faapefea ona tatou taulimaina vaivaiga o le tasi ma le isi? E tatau ona tatou ufiufia vaivaiga o o tatou tuaoi i se ofutele o le alofa mama, aua tatou te ono manaomia se faleie telē e ufiufi ai o tatou lava vaivaiga.

   Ua ta’ua e le Mataio 25:40: “Aua na faia e outou i le tasi o e aupito itiiti o o’u uso nei, o a’u lea ua outou faia i ai.”

   O lea, afai tatou te feita pe sii i luga o tatou leo pe faaaoga ni leo le lelei i a tatou tala, pe ua tatou le alolofa, e le gata ina tatou faia ni amioga faapena i le tasi ma le isi, ae ua faapea foi i le Alii o Iesu Keriso. E mafai ona tatou faapea atu e tutusa lo tatou alolofa mo Keriso ma lo tatou alolofa mo le tagata e sili ona itiiti lo tatou alolofa i ai.

2. Na faapefea ona ese le taulimaina e Simona, le Faresaio, o Iesu Keriso ma le fafine i le faataoto o loo i le Luka mataupu e Fitu?

   Na aoao mai Elder James E. Talmage: “Sa avea ma se tu masani i na vaitaimi le taulimaima o se malo faaaloalogia i se gauaiga faapitoa; e talia o ia i se sogi faafeiloai, saunia le vai e fufulu ai pefu mai ona vae, ma le suauu mo le uuina o lauulu o le ulu ma le ‘ava.

   O Simona sa avea o se Faresaio; o se tasi o le vaega faalelotu lea sa matua faamamafaina le tausiaina o tulafono a Mose. O le tagata aitalafu i le tala faatusa lea sa aitalafu i le 50 pene o Simona (Luka 7:41–47).

   Sa le’i saunia e Simona se vai mo Iesu e fufulu ai Ona aao, na te le’i sogi atu ia te Ia, na te le’i uuina o Ia i le suauu. Sa itiiti le alofa o Simona mo Ia. Ae ui i lea, ia tatou manatua na manaomia foi e Simona le faamagaloga, e pei ona tatou manaomia uma.

   O le fafine, sa agasala, o le tagata aitalafu i le 500 pene i lenei tala faatusa. Sa ia fufuluina aao o le Faaola i ona loimata ma soloina i lauulu o lona ulu; sa faaauau ona ia sogi i ona aao ma sa ia uuina ona aao i le suauu. Sa alofa tele o ia ia te Ia.

   Pe a tatou faaali atu le alofa ma le tuuto i le Alii o Iesu Keriso, e mafai ona tatou lagonaina Lana faamagaloga. Ao tatou mauaina le faamagaloga a le Alii, e faatumulia i tatou i le manao ina ia alofa ma auauna atu atili ia te Ia. Sa faamagalo atoatoa atu e Keriso le fafine ma sa Ia alofa atoatoa ia te ia. O ana agasala, lea na tele, sa faamagaloina (fuaiupu e 48).

   Afai o i tatou o ni tagata e na o sina faamagalo itiiti, e na o sina alofa itiiti foi lo tatou alofa.

3. Afai tatou te le aoao e faamagalo atu i isi e le mafai e le Atua ona faamagalo i tatou (Mareko 11:24-26).

   O le faamagalo atu e faigata, lamatia ma o se mea fiafia.

   E faigata ona o lo tatou natura faaletagata,

   E lamatia ona e faamalosia i tatou e tali atu mo le alualu i luma i le lumanai, ma

   O se mea fiafia ona e faasaolotoina i tatou ia avea ma o tatou tagata sili atu.

   Na ta’ua faapea: o le leai o se loto faamagalo e tai pei ai ua tuiina i tatou lava i se mea oona ma faatalitali mo le isi tagata ia oti.

   O lea la—e faapefea ona tatou tali atu pe a faia e se isi se mea sese?

   Ua tuuina mai e le Mataupu Faavae ma Feagaiga 121:43–44 ni laasaga e mulimuli i ai pe a tatou taulimaina se agasala a se isi tagata?

4. Vave ma manino ona tali atu i le mataupu [agasala]. E taua le mausali ma ia sa’o.

5. Tali atu e ala i le faaaogaina o le mana o le Agaga Paia; e le o lou ita.

6. Faaali atu le alofa faateleina.

7. la tatou sini e le o le o atu e faatoilalo isi, fasi pe faatiga i latou. Nai lo lena e tatau ona tatou faatuatua i le Atua; ma faamaoni ma puipuia le tagata ua faia le mea sese.

O le faamagalo atu e le na o le faamagalo atu o se tasi o le ua agasala pe ua faatiga ia i tatou, ae o le faamagalo atu foi o isi o ē e le’i faataunuuina pe faia le mea tatou te lagona e tatau ona latou faia.

O le a faatiga ma faatoilaloina i tatou e tagata, uo ma aiga mai i lea taimi i lea taimi, ae o o tatou lagona e uiga ia i latou, ma le auala tatou te taulimaina ai i latou, o le a tutusa lava ma o tatou lagona ma le auala tatou te taulimaina ai Iesu Keriso. O le a avea foi ma se tofotofoga moni po o ai moni lava i tatou.

Uso e ma Tuafafine, e leai se siliva ma se auro o ia te a’u ae i le suafa o Iesu Keriso ou te valaaulia ai i tatou uma ina ia tutu atu i luga ma vaai atu i fanau a le Atua i ni mata fou . . . faalogo i ni taliga fou . . . ma tautatala i se gagana fou, ina ia mafai ona tatou faaalia i le auala tatou te tautatala ai ma taulimaina ai isi ua tatou liua moni lava ia Keriso.