Ua Na’o Tusiga Faatekinolosi: Talavou Matutua
Auala e Sao Ai i le Aso Sa Pe Afai E te Matamuli
O le talalelei e mo tagata uma, ma e mafai e o tatou uiga lelei taitoatasi ona aumaia faatasi i tatou.
A o ou talavou, sa ou fā’atu e alu i le lotu.
Sa ou talitonu e moni le talalelei, ma sa ou iloa o le auai i le lotu na manaomia e faaauau ai pea ona ou tuputupu a’e faaleagaga. Ae sa masani ona ou lagona le lē agavaa.
I lo’u mafaufau, sa ou faapea e le mafai ona ou faamalieina ia faamoemoega o tagata uma i le tulaga e tatau ona i ai se tagata lelei o le Ekalesia (po o le mea sa ou manatu o faamoemoega o tagata uma). O isi tagata uma na foliga mai e sagisagi fiafia, fiafia e faamasani, lelei le tautala, ma naunau pea lava pea e fai atu se molimau pe faia se tatalo. Ae a a’u? Sa ou filemu ma sa ou lagonaina le popole i tulaga o le va faaleagafesootai. O lea sa ou lē lagonaina ai e i ai so’u malamalama e faasusulu atu o se tagata o le Ekalesia.
O le mea moni, o loo i ai le toatele o tagata o le Ekalesia e fiafia e faamasani ma naunau i ai. Ma e ui o se mea lelei lena, ae mo se taimi umi, sa ou lagona o lo’u uiga taofiofi ma le filemu e le talafeagai i lea “mamanu.” Ae o lenei ua ou iloa nei e mamao lenei mea mai le mea moni.
Iloaina e Mafai Ona Ou Tupuolaola
I le taimi o le kolisi sa ou siitia ai i se fale fou, ma sa faailoa atu a’u e le tamaitai ma te potu faatasi i ana uo i le uarota. Sa vave ona ou lagonaina e pei ua ou aofia ai faatasi ma i latou ona o lo latou alolofa ma le taliaina sa latou faaalia mai ia te au. Sa ou lagona le pei na latou mananao moni lava e faamasani ia te au. Sa ou te’i, ua ou lagonaina le mou ese atu o le tele o lo’u popole i tulaga faaleagafesootai.
Sa ou iloaina o lenei lagona o le taliaina e lei sau mai se suiga i le nofoaga, ae mai se suiga i le vaaiga. Sa ou aoaoina ai e le manaomia ona faigofie ona ou faamasani atu e avea ai ma se soo o Iesu Keriso. E i ai le malosiaga i le filemu. E i ai le malosiaga i le faalogo ma le mafaufau loloto. O lo’u iloaina o o’u malosiaga o se tagata e sili atu ona matamuli ma le faafoia o o’u vaivaiga e faatatau i popolega faaleagafesootai, sa ou maua ai se tulaga totonugalemu tonu sa fesoasoani ia te au ou te sao ai—ma oo ai lava i lo’u tupuolaola faamanuiaina i le talalelei.
E Tofu i Tatou Uma ma Malosiaga ma Vaivaiga
Ua tuuina mai e le Atua ia i tatou ni uiga, malosiaga, ma ni vaivaiga eseese mo se mafuaaga. O se tagata e sili atu ona faigofie ona faamasani e mafai ona maua se taimi faigofie e auai ma tautala i le vasega ma fausia ai se lagona o le lotogatasi i totonu o se uarota. Ma o i latou ua sili atu ona taofiofi latou te tuuina atu ni molimau malolosi e ala ia latou amioga ma tautinoga ia Iesu Keriso. Atonu e maoae foi i latou i le aapa atu i isi tagata filemu.
Afai ua e matamuli, ia e iloa o loo i ai se nofoaga taua mo oe i le Ekalesia. O uiga uma o le matamuli ma le fiafia e faamasani e atagia mai ai uiga auaumamā o le Faaola e mafai ona tatou faaaogaina e faagaeetia ai e le tasi le isi i le talalelei.
E Lē Faatatau Ia Te Oe
O se tasi o fesili sa ou fesiligia ai a’u lava ia o le aisea na ou alu ai i le lotu i le amataga. Sa ou alu e ‘ai ma inu i le faamanatuga, e aoao atili ai e uiga ia Iesu Keriso, ma ia agavaa mo le malumalu. Ae ua ta’u mai foi e tusitusiga paia ia i tatou e faapea “e manaomia e le tino [o le Ekalesia] itutino taitasi uma, ina ia mafai ona faagaeetia uma faatasi” (Mataupu Faavae ma Feagaiga 84:110; tagai foi i le Efeso 4:12).
A o fafaga e sauniga lotu a tatou lava molimau, sa ou iloaina ai o le lotu e le faatatau na o a’u. Tatou te manatua taitoatasi le Faaola a o tatou aai ma feinu i le faamanatuga, ae e faamanuiaina faatasi i tatou pe a tatou faasoa faatasi lenei sauniga o se faapotopotoga.
Sa ou popole tele i manatu o isi e uiga ia te a’u ae e le i lava lo’u popole i le mataupu faavae lea e tatau ona taialaina i tatou i o tatou manatu ma amioga uma: alofa. Na tusia e le Perofeta o Mamona, “ou te le fefe po o a mea e mafai ona faia e tagata; ona e lafo ese i fafo e le alofa ua atoatoa le fefe uma” (Moronae 8:16).
O lena “alofa atoatoa” e mai le Atua. Afai tatou te tatala atu i tatou lava ia lagonaina lena alofa, o le a faaitiitia lo tatou fefefe i o tatou lava faaletonu e faatatau i mea e mafaufau i ai isi tagata e uiga ia i tatou ma o le a faaitiitia lo tatou popole i o tatou lava faafitauli, ae sili atu ona naunau e tuuina atu le agalelei i isi o e lagona e pei e le o taliaina/aofia ai.
Fai Ta’itasi Mea
O o tatou tiute o le alofa atu o le tasi i le isi ma le faasoa atu o le talalelei o lona uiga e tatau ona tatou faia ni sootaga lelei ma isi.
E mafai ona tatou aloese mai le lofituina i le taulai atu i fegalegaleaiga sili ona anoa faatasi ma se tagata e toatasi pe toalua i le taimi. E ui ina sa aoao atu ma faamalolo ma auauna atu Iesu Keriso i le faitau afe i Lana galuega i le lalolagi, ae sa Ia mulimuli i se mamanu o le auauna atu ia i latou taitoatasi (tagai i le 3 Nifae 11:15; 17:21).
Sa ou iloaina e le manaomia ona avea a’u ma uo sili i tagata uma pe avea foi o se tagata lauiloa i le uarota. O le mea e sili ona taua e le o le tele o a’u fegalegaleaiga faaleagafesootai ae o le tulaga lelei o a’u sootaga. Nai lo le popole i tagata uma i le taimi e tasi, ou te taulai atu lava i le fesootai ma se tagata e toatasi i vaiaso taitasi i le lotu.
O loo avea pea le alu i le lotu ma se luitau i nisi taimi, ae a o ou uunaia lemu atu a’u lava ia ou te la’a ese mai lo’u sone mafanafana ma faatoilalo lo’u popole faaleagafesootai, ua ou lagonaina le alofa o le Faaola mo a’u ma mo Ana fanau uma. Ua amata ona ou iloa lo’u tulaga. Ou te iloa ua ou maua le alofa tunoa e ala i le Togiola a Iesu Keriso e galue agai ai i le faatoilaloina o o’u vaivaiga ma faaaoga o’u malosiaga e fausia ai le malo o le Atua.