Tagata Fou o le Ekalesia: O Le Nofoaga Lenei e Te Auai Ai

Saunia e Brian S. King

Pe o e taumafai ea e ausia ia faamoemoega sese?

Ata

different shoes

A e feiloai i se tasi, e faapefea ona e faailoa atu oe lava? O a ni mea e tāua i lou faasinomaga? O lo’u igoa o Brian. Ma ou te auai i Le Ekalesia a Iesu Keriso o le Au Paia o Aso e Gata Ai. Ae ou te lei lagonaina i taimi uma lagona e taliaina/aofia ai a’u.

Sa ou auai i le Ekalesia i lo’u tausaga muamua i le kolisi. Na foliga mai e pei ua na o sina taimi talu ona uma lo’u papatisoga, ae amata tuufesili mai tagata o le au paia o e tonu lava o latou manatu, na faapea mai “E te auauna atu i se misiona?” O se misiona e le o se mea sa mafai ona ou tuuina atu i ai se manatu mamafa i lena taimi. Ae na ou lagona le pei o le tali na faamoemoeina o le ioe.

O Lava Ea A’u?

I le na o le silia ma le tausaga talu ona ou auai i le Ekalesia, na ou maua ai lo’u valaauga e auauna atu i Egelani ma taunuu atu ai ma le naunautai e aoao atu. Ae i ni nai aso, sa ou iloaina ai lo’u misia o lo’u aiga. Ou te lei saunia e auauna atu i se misiona faafaifeautalai.

A o talanoaina o’u lagona ma le peresitene o le misiona, sa ia lagona le uunaiga e usu le pese, “Ua Susulu Mai Nei o le La” (Viiga, nu. 140) i luga o le telefoni. Sa taia ai a’u e pei o se mea e tau ese laitiiti, ae sa ou maua ai lagona o le malamalama ma le mafanafana.

Ae o le vaiaso lava na sosoo ai, sa ou i ai i luga o se vaalele e agai atu i le fale. Sa ou tauivi ma o’u lagona i le malaga atoa. Sa ou lagonaina le popole lofituina i mea atonu o mafaufau i ai isi e uiga i a’u filifiliga. Sa ou ita ia te au lava ia i lo’u lē auauna ai mo le lua tausaga atoa—o le mea moni lava ia, sa ou tuua uo ma aiga ma tolopō le aoga ina ia auauna atu i se misiona. Sa ou onosaia le lototiga tele, ae o lea la sa lagona ai faapei sa tuulafoaiina au e Tamā Faalelagi i le taimi sa ou manaomia ai. Sa ou tuufesili i lo’u mafaufau pe sa ono toe taliaina a’u auā sa ou lē ausia faamoemoega uma.

Sau e Pei Ona e I Ai

I se vaiaso talu ona ou toe foi mai i le fale, sa valaaulia ai au e le aiga o lau uo lelei e matamata i se sauniga o le konafesi aoao. O le mea mulimuli lea sa ou manao e fai. Peitai na ou alu lava.

I le afa o le sauniga, sa savali atu ai Elder Jeffrey R. Holland i le pulelaa ma saunoa mai, “Ua susulu mai nei le la i lou agaga”—o le mea lava lea e tasi na faafuasei ona usuina e la’u peresitene o le misiona i le lua vaiaso talu ai. Sa musumusu mai le Agaga, “O le Ekalesia lenei e te auai ai.” I le isi 15 minute, na suia ai la’u vaaiga atoa.

E faigofie lava ona lagona faapea tatou te le auai pe afai ua tatou le ausia faamoemoega o isi. Ae peitai tatou te le atoatoa uma lava (tagai i le Roma 3:23). Ma ioe, ua fetalai mai le Atua o loo i ai pea se nofoaga mo i tatou taitoatasi i Lana Ekalesia (tagai i le 1 Korinito 12:20–23).

Na aoao mai Elder Holland i lena lauga o le konafesi: “‘Sau i le tagata o e i ai,’ o loo fetalai mai ai se Tama alofa ia i tatou taitoatasi. Ae ua Ia faaopoopo mai, ‘Aua nei e fuafua e te tumau ai lava i le tagata o e i ai’” (O Pese e usuina ma Lē usuina,” Liahona, Me 2017, 51). E finagalo le Atua ia tatou i ai iinei e tusa lava po o ai i tatou pe po o a mea ua tatou faia aua e mafai ai ona Ia fesoasoani mai ia i tatou ia sui i le tagata o le a tatou avea ai (tagai i le 3 Nifae 18:22).

A o lei faalogo atu i le saunoaga a Elder Holland, sa ou manatu o le auai o lona uiga o le ausia o faamoemoega uma lava. O lenei la ua ou malamalama lelei atili o le Ekalesia a le Alii e le mo i latou ua atoatoa ae e fesoasoani e faaatoatoaina i latou e le o atoatoa. Ma ao e taumafai e mulimuli ia te Ia, ua e auai i Lana Ekalesia.