Ua Na’o Tusiga Faatekinolosi: Talavou Matutua
O Le Feiloai Atu i le Perofeta sa Aoao ai A’u e Tuu le Na o le Ova Mafaufau i le Talalelei [ae Faatino]
Tatou te faafaigataina le tele o mea i le talalelei, ae o le mea moni e matuai faigofie lava.
E alala le tusitala i New South Wales, Ausetalia.
A o ou taumafai o se tagata talavou e saili le Atua, sa matuai faigata lava ona ou talitonu o loo i ai ni a tatou perofeta soifua i le lalolagi i aso nei. Sa lagona e matua faigata ma fenumiai. Ae i le toeitiiti lua tausaga mulimuli ane, i le avea ai o se tagata liliu mai tuuto i le Ekalesia, sa ou iloa ai le faigata tele atu ona ou talitonu o a’u o se tasi o talavou matua e toa 15 i Sini, Ausetalia, na filifilia e feiloai ma Peresitene Russell M. Nelson mo se sauniga o fesili-ma-tali.
O se aafiaga o le a aumaia ai i taimi uma se foliga ataata ma loimata o le olioli i taimi uma lava ou te tomanatu ai i ai.
Sa matou popole uma lava e feiloai atu ia te ia, ma sa sili atu foi ona popole e faalogo po o le a le mea o le a saunoa mai ai o ia ia i matou o ni talavou matutua. Sa ou mafaufau o tali o le a ia tuuina mai ia matou fesili o le a loloto ma auiliili, ma sa ou mafaufau ai pe ua ou saunia e faalogo ma malamalama i ana upu. Talu ai ona o le matou taufai popole uma, sa tonu ia i matou e faia se tatalo e fesoasoani ia i matou ia maua le filemu ma valaaulia ai le Agaga.
O le taimi na savali mai ai Peresitene Nelson i totonu o le potu sa matua pei o se miti. Sa aoaoina lava i tatou e le aunoa o perofeta e mauaina faaaliga mai le Atua ma faasoa atu i le lalolagi, e fesoasoani ai i tagata uma ia o mai ia Keriso. Tatou te vaaia i latou o saunoa mai i le konafesi aoao. Ae o le vaai ma talanoa atu ia te ia faafesagai, o se aafiaga ese lea.
O ia lea—o se perofeta lotomaualalo, alofa a le Atua. Sa matua malosi lava le Agaga na ia aumaia i totonu o le potu. Sa matou tutu filemu, mumusu e ataata pe tautala, ae a o ia savali mai ma le ataata tele ma ta’u mai lona fiafia e feiloai ia te i matou, sa matua faatumulia uma ai i matou i le olioli ma le filemu. Sa mafai ona ou lagonaina lona lotomaualalo faamaoni ma lona alofa mo i matou taitoatasi a o ia faatalofa mai i o matou lima ma tuuina mai ia i matou uma se ataata alofa.
Na amata ona matou fesili atu ia te ia e uiga i le autalavou matutua i le Ekalesia, ma e tasi lava se fesili faapitoa sa tulagaese mai lava ia te au. Sa matou fesili atu, “I le avea ai ma talavou matutua, e tele lava ina matou tauivi e faamalosiau i o matou aiga ma uo ina ia auai i le talalelei. E mafai faapefea ona matou lelei atu i le faasoaina atu o le talalelei ia i latou?” Na faaalu sina taimi e mafaufau ai Peresitene Nelson ona fai mai ai lea o ni upu se lua: “Ia faatosina.” Ma ia faaauau ai lea: “Ia avea ma se faataitaiga ma ia faamaoni.”
Pau lena—o se savali faigofie ae loloto ma moni. O ana upu faigofie sa matuai faamauina i o matou mafaufau ma loto. Sa ou iloaina ai i lena taimi faapea, i le avea ai ma talavou nofofua matutua, tatou te matele i le faafaigataina ma le ova mafaufau tele i le talalelei [ae le faatino], ae o le mea moni o taiala mai le Agaga ma mai o tatou perofeta e faigofie, tuusa’o, ma ua latou umia le tele o folafolaga o faamanuiaga.
Sa ou iloaina i lena taimi le auala na avea ai Peresitene Nelson o se tagata matuā lotomaualalo ma faaleagaga: mai le faataitaia pea lava pea o le soifua ai i le talalelei a Iesu Keriso. Pau lava le mea tatou te faia o le mea lava lea e tasi. Fai na mea laiti i aso taitasi e faalatalata atili ai i tatou i le Tamā Faalelagi ma Iesu Keriso: auai i le lotu ma le malumalu, faitauina o tusitusiga paia, tatalo ma se loto faamaoni, ma le faasilisiliga o le agalelei ma agaalofa atu i tagata uma tatou te feiloai i ai. O na faatinoga laiti i aso uma o ki ia i le puleaina o le tomai o le avea ai ma soo moni o Keriso, faamalosia o la tatou sootaga ma ia, ma le faasoaina atu o Lana upumoni i isi.
E tatau ona tau lava ina tatou taumafai ia sili atu ona lelei i tatou lava, ma o na mea faatauvaa laiti o le a oo atu ai i taunuuga tetele. Ioe, e faigata le lalolagi, ma ioe, e faigofie ona ova mafaufau [ae le faatino] i le tele o mea i le olaga, ae o le fuafuaga a le Atua e faigofie, ma pe a tatou mulimuli ai, o le a faigofie atu ai le olaga. E ala i le taliaina i o tatou loto o le taitaiga a le perofeta ma le faia o le mea sili e avea ai faapei o lo tatou Faaola o Iesu Keriso i aso taitasi, o a tatou faataitaiga faatauvaa o le a suia olaga o loo siomia i tatou.