O a Tatou Tauiviga Fefaasoaai ina ia Lagona ai e Pei e Taliaina/Aofia ai i Tatou

Ata

young adults with welcoming arms

Atapue mai le Getty Images

Pe ua e savali atu ea i totonu o se potu ma lagona ai mata o tagata uma ua mulimuli atu ia te oe? Pe sili atu foi ona leaga—e lagonaina e pei e leai ma se tasi na ano atu ia te oe? Sa ou maua ai. O na tulaga e mafai ona tigā ai aua i totonu o i tatou uma lava o loo i ai se moomooga e fia taliaina/aofia ai.

O le talalelei a Iesu Keriso e aumaia faatasi ai i tatou. Ae o nisi taimi o o tatou tulaga eseese e mafai ai ona faafaigata ai ona maua le lagona e pei o le taliaina/aofia ai i tatou. I le toatele ai o tagata taitoatasi o loo i totonu o le Ekalesia, o loo i ai tagata fou liliu mai o loo ono taumafai e sue lo latou ala. I le itulau e 44, o loo ou faasoa atu ai le auala na suia ai la’u vaaiga e uiga i le taliaina/faaaofia ai ma le faataunuuina o faamoemoega o le Alii mo i tatou.

E toatele foi e pei o Jodi ma lana tane, o la laua tauiviga ma le lē fanau/pā po o isi tofotofoga o loo ono lagona ai e i laua e pei e lē o taliaina/aofia ai i laua. Faitau lana tala i le itulau 46.

I tusiga na’o le faatekinolosi, o loo faasoa mai ai e Rasela le auala na faia ai e tagata fiafia e faafeiloa’i le eseesega atoa lava ina ua toe foi mai o ia i le lotu. O loo aoao mai Eric o i tatou uma ua manaomia i le tino o Keriso, ma o loo faasoa mai e Aspen le auala e taliaina/faaaofia ai ma tupuolaola i le lotu o se tagata e sili atu le matamuli.

O loo tumu le Ekalesia i tagata o ē e lagona e pei e le o taliaina/aofia ai i latou. Atonu o oe o se tasi o i latou. Ae e mafai ona faia e i tatou uma la tatou vaega ina ia lagona ai e tagata uma o le Ekalesia le taliaina. Talu ai o le taliaina/faaaofia ai e le o se mataupu e uiga i laasaga o i ai—o se mataupu e faatatau i le tagata moni lava o i ai oe ma le tagata o loo e taumafai e avea ai oe. I le avea ai ma fanau a le Atua, e taliaina/aofia uma lava i tatou i le Ekalesia a Keriso.

Ma le faamaoni lava,

Brian S. King

Fautuaga …

Mai le autalavou matutua e uiga i le taliaina/faaaofia ai

“E leai se mea o i ai pe afai o e lagona e pei e lē taliaina/faaaofiaina oe, ae ia manatua e tulagaese uma lava i tatou ma o le mafuaaga lena e fetaui/ofi lelei ai tatou.“

—Estefany Sofia Correa Unas, Alberta, Kanata

“E tatau ona e i ai iina mo faamoemoega sa’o. Afai o loo e i ai iina e mulimuli ia Keriso, ona leai lava lea o se isi mea e afaina.”

—Paula Sáenz, Buenos Aires, Argentina

“Talu ai na ou ola ae faatasi ma ni uso o i laua o le faauigaga tonu lava lea o le eseese (o i laua uma e maua i le gasegase o le autism lēgagana), ua mafai ai ona ou malamalama ia i latou o e manino lava lo latou faapitoa ma avea foi ma uo ia i latou o e atonu e lē o amanaiaina. E mafai e tagata uma ona aoao mai se mea mai isi tagata uma, e le afaina po o ai oe po o le a foi le tulaga o le olaga o loo e i ai. O loo i ai ia te oe se mea e faasoa atu, ma e alofa le Atua ia te oe e pei lava ona Ia faia i tagata uma lava, lea e matuā tele lava. ”

—Stephanie E. Jensen, Uosigitone, ISA

“O le avea ai o se tagata liliu mai i le Ekalesia ua mafai ai e a’u ona talisapaia mea iti ma uo. O le taunuuga ua avea a’u ma lena uo mo se tagata su’esu’e e valaaulia, lagolago, ma faafiafiaina i le faifai mea faatasi ma se tagata fou. Atonu o oe lava le lagolago na latou manaomia. Mo a’u, sa la fesoasoani ia te au e uumau i le filifilia o le ala sao.

“O lea ia fai oe ma lena uo. E te le iloa; atonu o latou foi le uo na e manaomiaina.”

—Hikairoa Mohi, Waikato, Niu Sila

Mai taitai o le Ekalesia

““Ou te le talitonu sa i ai se taimi sa ou feiloai ai i soo se tasi e le i manao e aofia i se mea lea sa latou lagonaina ai le ta’uaogaina, lea sa latou lagonaina ai e i ai lo latou taua.

“Pe a tuufesili tagata, ‘Pe i ai ea se nofoaga mo a’u?’ atonu lava e i ai se numera o mafuaaga i tua atu o lena fesili. Ma o lea ua latou fesili ifo ia i latou lava, ‘Pe ou te ofi atu ea? Pe ou te aofia ai ea iinei? Pe latou te matuai manaomia moni ea a’u?’ Ma ou te fia faapea atu ma le malosi, ‘Ioe.’

“Ou te mafaufau i le faataitaiga Paulo, lea ou te matuā fiafia tele i ai, e uiga i le Ekalesia o le tino lea o Keriso. Ma fai mai o ia, ua papatiso i tatou i lena tino, ma fai mai o ia o se tino e tasi. E toatele tagata, ae tasi le Ekalesia.

“Pe a lagona e se tagata le faaesea, ou te le faafitia le moni o le lagona ma le mafuaaga e faanatura ai le lagona faapena. Ae o i tatou taitoatasi, soo se taimi lava e oo mai ai lena lagona i o tatou luga, e tatau ona taofi ma mafaufau, ‘Na maliu Iesu Keriso mo a’u. Na manatu Iesu Keriso ou te agavaa mo Lona toto. Ma e alofa o Ia ia te a’u, e i ai Ona faamoemoega mo a’u, ma e mafai ona Ia faia se eseesega i lo’u olaga. O Lona alofa tunoa e mafai ai ona liua a’u. Ma e masalo o le tagata lea o loo nofo i o’u autafa, ma lē amanaiaina a’u po o manao foi e aluese atu, pe atonu foi e le manao ai. Ae e le suia ai i lena mea le moni o le lagona o Keriso ia te a’u ma le tele o avanoa ou te maua ia Keriso.’”

Elder D. Todd Christofferson o le Korama a Aposetolo e Toasefululua, “E I Ai Ea se Nofoaga mo A’u?” (Vitio faasolo Lotogatasi i Eseesega), ChurchofJesusChrist.org.