E Taitai e le Alii Lana Ekalesia e ala i Perofeta ma Aposetolo
Saunia e Peresitene Dallin H. Oaks
Fesoasoani Muamua i le Au Peresitene Sili
O le galuega a le Alii e manaomia ai se faalapotopotoga ua taitaia e le Alii e ala mai i taitai ua Ia filifilia ma faatagaina, ma o lē ua Ia taitaia e faataunuuina ai Ona faamoemoega. Ua faaalia i le talafaasolopito faaletusitusiga paia faapea o na ituaiga o taitai sa avea lava ma se perofeta po o perofeta ma aposetolo. O le mamanu lenei i tausaga o Isaraelu faifeagaiga ma i le taulotoaiga o taimi, ma o loo faaauau pea i le Ekalesia toefuataiina a Iesu Keriso.
E Taitai e le Alii Lona Nuu e ala i se Faalapotopotoga
O le faamoemoega o lo tatou Tamā Faalelagi o le “ia aumaia le tino ola pea ma le ola e faavavau” o Ona atalii ma afafine (Mose 1:39). I lenei tisipenisione, Na te faia ai lenei mea e ala i Le Ekalesia a Iesu Keriso o le Au Paia o Aso e Gata Ai, o lona faamoemoega o le “fesoasoani i tagata taitoatasi ma aiga ia agavaa mo le faaeaga.”1
“O le tafatolu tele ma le malosi o le tiutetauave ua tuuina i luga o le Ekalesia,” na aoao mai ai Peresitene Gordon B. Hinckley (1910–2008), o le “muamua, o le ave atu o le talalelei a Iesu Keriso i tagata o le lalolagi; lona lua, ia faatino lena talalelei i olaga o tagata o le Ekalesia; ma, lona tolu, ina ia tuuina atu e ala i galuega sui ona faamanuiaga ia i latou o e ua mavae atu i talaatu o le veli o le oti.”2
I o tatou aso e toatele e foliga mai e mananao i le faaleagaga po o le lotu ae manatu e mafai ona latou maua e aunoa ma se faalapotopotoga faalelotu. O i latou o e manatu e mafai ona latou ausia lenei mea e ese mai se faalapotopotoga aloaia ua le amanaia le talafaasolopito na faamaumauina lelei o mea na faatuina e le Alii o Iesu Keriso e faamautinoa ai le faaauauina ma le aoga o Lana talalelei ma aoaoga. E pei ona faamanatu mai ia i tatou e Elder D. Todd Christofferson o le Korama a Aposetolo e Toasefululua i se lauga i se konafesi aoao lauiloa i le lima tausaga talu ai, “I le taulotoaiga o taimi, na faatulagaina ai e Iesu Lana galuega i se auala ina ia mafai ai ona faatuina faatasi le talalelei i le tele o malo ma tagata eseese.”3 O lena faalapotopotoga na aofia ai Aposetolo ma isi taitai o loo faamatalaina i le Feagaiga Fou.
Aisea e manaomia ai se faalapotopotoga e faataunuu ai faamoemoega o le Alii? E ui e alofa ma fesoasoani lo tatou Faaola ia i tatou taitoatasi, ina ia ausia Ona faamoemoega mo le tino atoa o fanau a le Atua—aemaise lava Lona nuu o le feagaiga—e galue o Ia e ala i se faalapotopotoga na taitaia e perofeta ma aposetolo.
E na o se faalapotopotoga lava e mafai ai e tagata auai taitoatasi o le mea na ta’ua e le Aposetolo o Paulo “o le tino o Keriso” (1 Korinito 12:27) ona maua avanoa latou te manaomia e ausia ai le tuputupu ae faaleagaga o le faamoemoega lea o lo latou foafoaga. Ma ua na o se faalapotopotoga e i ai taleni eseese ma ni taumafaiga eseese e mafai ona ausia ai mea e manaomia e faataunuu ai le galuega a le Alii.
O mea e faatoa mafai lava ona ausia e ala i vaega faatulagaina o tagata talitonu e aofia ai taumafaiga tetele e fesoasoani ai i e matitiva, e folafola atu le talalelei i le lalolagi atoa, ma ia fausia ai ma faatumauina ia malumalu. Na saunoa le Perofeta o Iosefa Samita o le faamoemoega o le Atua i le faapotopotoina o Lona nuu o le “fausiaina lea i le Alii o se maota lea e mafai ai ona Ia faaali mai … sauniga o Lona maota ma mamalu o Lona malo, ma aoao ai i tagata le ala o le faaolataga.”4
E manaomia foi se faalapotopotoga e ausia ai le poloaiga a le Alii ia “tasi outou; ma afai tou te lē tasi e lē a a’u outou” (Mataupu Faavae ma Feagaiga 38:27). Na aoao mai Peresitene Henry B. Eyring, o le Au Peresitene Sili faapea, e le mafai ona tatou ausia lena gatasitasi—lena lotogatasi—o ni tagata taitoatasi. “E ao ina tatou sailia ma agavaa i ai faatasi ma isi. E le o se tulaga la e faateia ai,” na ia saunoa ai, “le uunaia o i tatou e le Atua e faapotopoto ina ia Ona faamanuiaina i tatou.”5
E tatau foi i tagata talitonu taitoatasi ona maua le tapuaiga e ala i se faalapotopotoga faalelotu aua e na o lenei lava le ala e mafai ai ona faatonuina pe aoaiina ma le pule i tatou mo agasala ma mea sese. O lena aoaiga e taua mo lo tatou tuputupu ae faaleagaga (tagai i le Mataupu Faavae ma Feagaiga 136:31; 101:4–5; tagai foi i le Mosaea 23:21–22).
Na tuuina mai e Elder Neal A. Maxwell (1926–2004) se isi mafuaaga mo tagata faalelotu po o le faaleagaga ina ia faatulagaina: “talu ai o soo se lelei o le tagata e toatasi e lē lava lea i le taua e tetee atu ai i le leaga.”6
O Keriso o loo Faauuina le Au Aposetolo e Toasefululua, saunia e Harry Anderson
O le Ekalesia Toefuataiina a Iesu Keriso ua Pulea e Perofeta ma Aposetolo
O le faatulagaga o le Ekalesia a Iesu Keriso e ao ona filifilia taitai e Ia ma tuuina atu i ai le mana ma le pule e folafola atu ai Lona finagalo i Lona nuu.
“Ua le filifilia a’u e outou,” sa aoao mai ai le Faaola, “a ua filifilia outou e a’u; ua ou tuuina atu foi outou, ia outou ō, ma ia outou fua mai ni fua” (Ioane 15:16). O loo manino le Tusi Paia i lē na filifilia perofeta ma aposetolo. I le Feagaiga Tuai ua manino lava le vaaia ai o lenei mea i valaauga a Mose ma Samuelu, ma i le Feagaiga Fou ua vaaia i valaauga o Aposetolo e Toasefululua ma le Aposetolo o Paulo (tagai i le Esoto 3; 1 Samuelu 3; Mareko 3; Galuega 9). Sa lei ofo atu nei taitai, ma sa lei filifilia i latou e tagata talitonu.
O loo faaalia foi i le Tusi Paia e tatau ona i ai i taitai faalelotu le pule o le perisitua a le Atua, lea na tuuina mai e se tasi ua umia lena pule. O faamatalaga i le Tusi Paia o valaauga ma le tuuina atu o le pule ia Arona, o sui o le au Aposetolo e Toasefululua, ma le Fitugafulu ua faapupula mai ai lenei mataupu faavae (tagai Esoto 28:1–4; Mareko 3:14–15; Luka 10:1, 17). E lei oo mai le pule o le perisitua mai le faitauina o tusitusiga paia pe mai se manao e auauna atu. Ma o le faauuga e tuuina mai ai le pule o le perisitua e sau mai ulu o le Ekalesia, ma ua iloa lava faalauaitele (tagai Mataupu Faavae ma feagaiga 42:11).
I le Feagaiga Tuai, o taitai faaleagaga sa avea ma perofeta. O loo faamatalaina i ni matafaioi eseese se tolu. O nisi o alii paia na faatinoina se matafaioi faaperofeta mo a latou fanau, e pei o Aperaamo. O nisi o taitai na faaaogaina pule faaupufai faapea foi ma le mana faalefaitaulaga, e pei o Mose ma Iosua. O le tele o taimi sa faatinoina ai lo latou matafaioi faaperofeta lea sa tutoatasi mai i tofiga faapeteriaka po o tulaga faaupufai, e pei o Samuelu ma Isaia. Ua lipotia mai e le Tusi a Mamona ia tofiga lava e tolu o perofeta, e pei o Liae (peteriaka), tupu o Peniamina (taitai faaupufai), ma Alema le Itiiti (ina ua uma ona ia aveesea lona tofiga o se faamasino sili) (tagai i le 1 Nifae 1–2; Mosaea 1–6; Alema 4–5). Peitai, e manino lava o perofeta uma na muamua atu ia Iesu Keriso na valaauina tagata ia salamo, ma, ae sili lava, sa latou vavalo e uiga i le afio mai o le Mesia.7
O le tofi o le Aposetolo ua muai faailoaina mai i le Feagaiga Fou, ina ua valaauina e le Faaola ia Aposetolo a o ia faatulagaina Lana galuega e folafola atu, papatiso atu, ma faamalolo. Sa tusia e le Aposetolo o Paulo o le Ekalesia a Iesu Keriso o loo “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20 Na valaauina foi e Iesu ia Fitugafulu ma auina atu i latou e auauna atu (tagai i le luka 10:1, 17), ma sa ia faatagaina le valaauga o isi tofiga, e pei o faifeau ma aoao (tagai i le Efeso 4:11).
O se matafaioi silisili a Aposetolo i le Ekalesia lea na faavaeina e Iesu o le umiaina lea o ki o le perisitua. Ina ua folafola atu e le Faaola i le Aposetolo o Peteru o “ki o le malo o le lagi,” sa ia faamatalaina lenei mea o le mana lea “o se mea foi e te fusifusia i le lalolagi, e fusifusia foi lea i le lagi” (Mataio 16:19). I se isi faaupuga, o ki e faamautinoa ai le aafiaga faalelagi i faatinoga faatagaina o le pule o le perisitua i le lalolagi. O Aposetolo o loo umia ki o le perisitua ua i ai le aia tatau ma le tiutetauave e pulefaamalumalu ai ma taitaia gaoioiga o le perisitua a le Atua ma le Ekalesia a Iesu Keriso i luga o le fogaeleele.8 E aofia ai le faatinoga ma le vaavaaiga o sauniga taua o le talalelei.
O se vaega o o latou tiutetauave, ua i ai i perofeta ma aposetolo le tiute ma le meaalofa faaperofeta e aoao atu ai upumoni o le talalelei ma molimau atu o ni “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23). Latou te faailoa mai le upumoni ma le mea sese ma tautino mai ma le pule, “Ua faapea ona fetalai mai o le Alii.“ Na tautino mai e Peresitene J. Reuben Clark Jr. (1871–1961), Fesoasoani Muamua i le Au Peresitene Sili, faapea o le Au Aposetolo “Ua ia i latou le aia tatau, le mana, ma le pule e folafola atu ai le finagalo o le Atua i Ona tagata, e tusa ai ma le mana ma le pule aoao o le Peresitene o le Ekalesia.”9
I le avea ai ma auauna a le Tama ma le Alo, o aposetolo ma perofeta e aoao ma fautua atu e pei ona faatonuina ai e le Agaga Paia, e aunoa ma se manao i se isi lava mea nai lo le tautala atu po o le a le mea e moni ma uunaia tagata uma e mulimuli i le ala i faamanuiaga a le Atua, e aofia ai lona taunuuga atoa mo Ana fanau: o le ola e faavavau, o “le meaalofa silisili lea o meaalofa uma a le Atua” (Mataupu Faavae ma Feagaiga 14:7). E mafai ona faatuatuaina o latou leo.
Na saunoa Peresitene M. Russell Ballard, o le sui peresitene o le Korama a Aposetolo e Toasefululua: “I le lalolagi i le asō, lea e 24 itula o le televise ma aufaimanatu i leitio e luai maia manatu feteenai, lea e faatautavā ai le aufefaataua’i mo mea uma lava mai lau tupe i lau palota, o loo i ai pea se leo manino, mamā, leai se faaituau e mafai lava ona e faatuatuaina i taimi uma. Ma o le leo lena o le leo o le perofeta soifua ma aposetolo. Pau lava lo latou faamoemoega ua na o le ‘manuia tumau-faavavau o o outou agaga’ (2 Ni. 2:30).”10
O le mauaina o aoaoga a aposetolo ma perofeta o se faamanuiaga lava ma se tiutetauave sili lea. O le faamanuiaga o le avanoa lea ua uma ona saunia i mea e finagalo le Alii tatou te faalogo i ai. O le tiutetauave e faapea, o lenei avanoa tatala i aoaoga a le Alii e mafai ai ona tatou tali atu e faalogo ma usita’i i na aoaoga. O le mea e faanoanoa ai, o nisi o tagata talitonu e toilalo i lenei tiutetauave. E le o se mea e faateia ai, e toatele lava i le lalolagi e teena le mea moni o loo tuuina mai e le Atua i aposetolo ma perofeta le pule ma le musumusuga e saunoa ai i Lona suafa. E sili atu foi le toatele e teena perofeta ma aposetolo auā latou te faafitia le soifua ai o le Atua po o le i ai o le sa’o ma le sesē a’ia’i.
Ae o le mea e lelei ai, e toatele lava e filifili e talitonu ma mulimuli i aoaoga a perofeta. Latou te mauaina faamanuiaga folafolaina. Na aoao mai e Peresitene Russell M. Nelson lenei mea: “o le mamanu ua leva ona faatulagaina a le Atua o le aoaoina o Lana fanau e ala mai i perofeta ua faamautinoa mai ai ia i tatou o le a ia faamanuiaina perofeta taitasi ma o le a Ia faamanuiaina i latou o e manaomia fautuaga faaperofeta.”11
Ata o Iosefa ma Aposetolo na saunia e Dan Burr
O Perofeta ma Aposetolo e Galulue e ala i Aufono
E taitai e le Alii Lana Ekalesia e ala mai i perofeta (toatele) ma Aposetolo (toatele), a o latou galulue ai e ala i aufono. E tele faataitaiga o lenei mea.
Ua valaauina e le Alii se perofeta e toatasi e amatalia se tisipenisione fou. Ona, a faatupulaia ma matua loa lena toefuataiga, ona faaalia lea ma aoaoina ia aoaoga faavae ma aiaiga faavae mo le vaega e ala i se faalapotopotoga e taitaia e aposetolo ma perofeta. O lea la, a o tuputupu a’e ma matua le Ekalesia toefuataiina i lenei tisipenisione mulimuli, na faaali mai e le Alii faapea o pisinisi sili ona taua ma mataupu sili ona faigata e tatau ona faia faaiuga e se aufono a le Au Peresitene Sili ma Aposetolo e Toasefululua (tagai Mataupu Faavae ma Feagaiga 107:78–79). O iina, o faaiuga uma “e ao lava ina faia i le leo autasi o ia lava korama” (Mataupu Faavae ma Feagaiga 107:27). Vagana ai o le tulaga lea, o le a lē “aiā a latou faaiuga i faamanuiaga tutusa sa i ai i faaiuga a se korama a peresitene e toatolu anamua” (Mataupu Faavae ma Feagaiga 107:29).
O nei mea uma lava o loo faaalia ai le taitaiga a le Alii e tatau ona puleaina Lana Ekalesia e ala i aufono a aposetolo ma perofeta. O lenei mea e puipuia ma siitia ai le lotogatasi lea e taua i le Ekalesia a le Alii.
“O le Alii i le amataga o lenei galuega sa faaalia e faapea e tatau ona toatolu ia faitaulaga sili e pulefaamalumalu i le Perisitua Maualuga o lana Ekalesia ma le Ekalesia aoao,” na aoao mai ai Peresitene Iosefa F. Samita (1838–1918) i le konafesi aoao lea na lagolagoina ai o ia e avea ma Peresitene o le Ekalesia.12 Sa ia faamautinoa mai le taua o faitaulaga sili e tolu i le au peresitene e ala i le folafola atu “faapea e sese mo le tagata e toatasi ona faaaogaina le pule ma le mana o le au peresitene i le o le Ekalesia a Iesu Keriso o le Au Paia o Aso e Gata Ai.”13 Sa ia faaopoopo mai, “e lei faamoemoe lava le Alii e tatau ona i ai i se tagata e toatasi le mana atoa, ma o le mafuaaga lena ua Ia tuuina ai i Lana Ekalesia, peresitene, aposetolo, faitaulaga sili, fitugafulu, [ma isi].”14
O le faasinoga i le toatele, o perofeta ma Aposetolo, o loo iloga foi i lenei aoaoga faamasani a Peresitene Iosefa Filitia Samita (1876–1972): “E tasi lava le mea e tatau ona matuai manino i ai o tatou mafaufau. O le a le taitaiseseina lava e le Peresitene o le Ekalesia, po o le Au Peresitene Sili, po o le leo autasi o le Au Peresitene Sili ma le Toasefululua le Au Paia pe auina atu foi se fautuaga i le lalolagi e ese mai le finagalo ma le agaga o le Alii.”15
Ina ia avea ma aoaoga faavae aloaia a le Ekalesia a Iesu Keriso, o aoaoga a le tagata lava ia o aposetolo ma oo lava i perofeta foi e tatau ona faamaonia mai e ala i le faagasologa o le faamaoniga e isi aposetolo ma perofeta. O loo faaalia mai i le Tusi Paia i le faatinoga faamaonia a Aposetolo ina ua lipotia atu e Peteru lana faaaliga ia avatu le talalelei i Nuuese (tagai Galuega 11:1, 18). E faapena foi, ina ua aumaia le finauga i le manaomia o le peritomeina i le au Aposetolo, sa faamanatu atu e Peteru ia i latou le taua o le faaaliga na ia mauaina, ma na faamaonia foi e le aufono ma foia ai le finauga i se tusi faamaonia i le Ekalesia (tagai i le Galuega 15).
E faapena foi, i le Ekalesia toefuataiina, e le tuuina atu aloaia lava aoaoga faavae seiiloga ua maua e le tino o le Ekalesia e ala i le tulafono o le finagalo autasi (tagai Mataupu Faavae ma Feagaiga 26:2, 28:13). Na faaalia mai lena mataupu faavae i le 1830 ma sa faaaogaina lava talu mai lena taimi.16 O lenei faiga, lea e le i mulimulitaia e ekalesia sa i ai i le vaitau ua tatou ta’ua o le liliuese, ua puipuia ai upumoni o le talalelei mai le suia po o le aafia i ni manatu patino po o ni manatu faaletagata.
Ma le mea mulimuli, o le tāua o le lotogatasi o taitai eseese e uiga i aoaoga faavae ua faasaoina lea i tulafono ua leva ona i ai e faapea o ni fesili e tuuina atu i aposetolo taitoatasi po o i si pulega e uiga i aoaoga faavae po o aiaiga faavae ia e le o manino ona faamalamalama mai i tusitusiga paia po o tusitaulima, e tatau lava ona faasino atu i le Au Peresitene Sili. (tagai i le Mataupu Faavae ma Feagaiga 124:126).17
O Perofeta ma Aposetolo e Molimau ia Iesu Keriso
I le taimi o lana galuega talai, sa aoao atu ai e le Perofeta o Iosefa Samita le mea lenei: “E pei ona pulea e le Atua o Aperaamo, Isaako ma Iakopo o ni aiga, ma le fanauga a Isaraelu o se malo, o lea, o i tatou, o se Ekalesia, e tatau ona i lalo o Lana taitaiga pe afai tatou te ola pea, faasaoina ma lagolagoina.”18
O lenei tusiga ua faamatalaina ai le auala na faia ai e le Alii Lana galuega i le faagasologa o tausaga ma le auala o loo faaauau ai pea lenei mamanu ma faiga faavae i o tatou lava aso. E pei ona aoao mai le Aposetolo o Peteru, “o perofeta uma” ua tuuina mai le “molimau” o Keriso (Galuega 10:43). I o tatou aso, o loo faaauau pea ona faia e le Alii Lana galuega e ala mai i perofeta ma aposetolo o e ua faatagaina e galulue i Lona suafa e fai Lana galuega e faataunuu ai le ola faavavau o le tagata.