Itulau o le lotoifale
Ua Fofogaina mai e le Au Peresitene Sili se Suiga i Sauniga o le Konafesi Aoao ia Aperila 2020
Ua valaaulia le Au Paia e 11 tausaga ma luga atu i le sauniga o le afiafi o le Aso Toonai.
Na fofogaina atu e Peresitene Russell M. Nelson i le Au Paia o Aso e Gata Ai i le lalolagi atoa ia Oketopa faapea o le konafesi aoao ia Aperila 2020 “o le a ese mai isi lava konafesi muamua” aua o le a “faamanatuina ai le faavaega tonu lava o le talalelei toefuataiina.” O le tautotogo o le 2020 e faailoga ai le 200 tausaga talu le muai faaaliga a Iosefa Samita o le Tama ma le Alo, lea e taua tele i tagata o Le Ekalesia a Iesu Keriso o le Au Paia o Aso e Gata Ai o le Uluai Faaaliga.
Ua fofogaina mai e Peresitene Nelson ma ona fesoasoani i le Au Peresitene Sili e faapea o le konafesi aoao ia Aperila 2020 o le a tulagaese i se isi auala: O le sauniga o le afiafi o le Aso Toonai e mo tagata uma o le Au Paia o Aso e Gata Ai mai le 11 tausaga ma luga atu.
“Nai lo le faia o se sauniga Perisitua po o se Sauniga Aoao mo Tamaitai, o le sauniga o le afiafi o le Aso Toonai o le a faataunuuina mo tamaitai uma o Tamaitai Talavou ma le Aualofa, faapea ma i latou uma o e umia le Perisitua Arona ma le Perisitua Mekisateko,” na saunoa mai ai le Au Peresitene Sili i se tusi. “Matou te tulimatai atu i le faamanatuina faatasi ma tagata o le Ekalesia o le 200 tausaga o le Toefuataiina o le talalelei a Iesu Keriso i lea konafesi faasolopito ma le tausaga atoa o le 2020.”
O konafesi aoao o le Ekalesia a Iesu Keriso o le Au Paia o Aso e Gata Ai e tai ono masina ma faataunuuina i faaiuga o vaiaso muamua o Aperila ma Oketopa. O konafesi taitasi e faia ai lauga ma musika i sauniga e lima – e tolu i le Aso Toonai ma le lua i le Aso Sa.
Talu mai Aperila 2018, o le sauniga afiafi o le Aso Toonai ua fesuisuia’i ai le Sauniga Perisitua (ia Aperila) mo i latou uma o e umia le perisitua mai le 12 tausaga ma matutua atu ma le Sauniga a Tamaitai (ia Oketopa) mo tamaitai uma mai le 8 tausaga ma luga atu. O isi sauniga e fa (taeao o le Aso Toonai, aoauli o le Aso Toonai, taeao o le Aso Sa, aoauli o le Aso Sa) e mo tagata uma o le Ekalesia ma i latou o e fiafia i le tapuaiga.