Itulau o le lotoifale
O Le Mana e le I’u o le Togiola
E ofoofogia le mana o le Togiola a Iesu Keriso. Na ou vaai i le faaalia o lenei mana i le tele o taimi i olaga o tagata matagofie o Samoa ao ou auauna atu ia i latou. O se tasi o aafiaga faapitoa lava na tulaga ese mo a’u o se molimau o lena mana maoae ma le aafiaga faifaipea lea e masani ona tupu.
Ia Setema o le 2018, sa matuai aafia lava Levukar Poloai i mea o le lalolagi. E ui lava sa avea o ia ma se tagata o le ekalesia i lona olaga atoa, ae sa le toaga o ia i le tele o lena taimi. Na ulaula o ia, malosi le inupia ma faaaluina le tele o lona taimi e faatasi ai ma tagata sese.
I se tasi aso na valaaulia ai o ia e lana uo lelei o Asuelu e sau matou te o faatasi ma la’u soa matou te sailia ni tagata e aoao. Masalo na saunia o ia e le Alii aua o lena aso e tasi ma i matou sa na o le pau lava lena o le mea na manaomia. O le olioli i le auauna atu i le Alii na faatumulia ai lona loto ma sa faaauau pea ona sau o ia matou te o faatasi i ni nai taimi i le vaiaso.
Sa taofia lana ulaula ma le inupia i lena lava taimi ma suia lona olaga ia ogatusa ma le talalelei. Ina ua mavae ni masina se lua o lona olaga fou sa ia mauaina le perisitua Mekisateko ma avea ma taitai misiona o le uarota Muamua a Nofoalii, Siteki o Samoa Faleasi’u.
I totonu o ni nai aso sa suia e lenei alii lona olaga atoa; o le mana lena o le Togiola a Iesu Keriso ma e le’i gata ai iina. O le suia o le loto a Levukar na amataina ai se aafiaga e pei o se filifili o le liua i totonu o ana uo.
Ia Ianuari 2019 na valaaulia ai e Levukar lana uo mamae o Ronald ina ia suia foi lona olaga. O Ronald sa tupuga mai i se aiga e malolosi i le Metotisi ae sa maua foi o ia i le vaega lava lea e pei o Levukar. Sa tau le manao le tina o Ronald e papatiso o ia i le Ekalesia a Iesu Keriso o le Au Paia o Aso e Gata Ai ae ina ua ia vaai i le suia atoa e Levukar o lona olaga, sa faamaluluina lona loto, ma ia malie i ai.
Mai lena taimi o le uso matua o Ronald o Emosi, lea sa feiloai muamua ma faifeautalai ae sa le’i faatagaina e papatiso, sa maua le faatagaga mai lona tina aua ua ia vaaia le tele o mea na faia e le talalelei mo Ronald.
Na maua uma e le au uso le Perisitua Mekisateko ma o atu faatasi i le malumalu lea na sui ai Ronald i lona tama ina ia papatisoina.
I le avea ai ma se tasi o faifeautalai sa aoaoina nei alii lelei, e le mafai ona ou teena le lagona faapea sa laitiiti lava se mea na ma faia i lo la liua. O le Togiola a Iesu Keriso e i ai le mana e suia ai tagata i se auala e le mafai e se faifeautalai po o se faiaoga po o se epikopo ona faia. Na ou aoaoina o la’u matafaioi faigofie lava o le faailoa atu ia te i latou o le mana ma fesoasoani e faafaigofie se aafiaga faaleagaga.
Sa ou vaai foi i le mamana o le galuega faafaifeautalai a tagata o le au paia. I le avea ai o ni uo ma le usoga, sa latou faia se faataitaiga o le faatuatua ma aumai le tasi ma le isi i le upumoni e amata mai ia Asuelu ma se valaaulia faigofie. Ua na o lo’u lotofaafetai i le avea ai o se vaega itiiti o se faagasologa sili ona paia.