Itulau o le lotoifale
O Le Mana Faamalolo o Musika Paia
E ui i se taumafaiga faafuasei, ma manaomia tele, sa le maua mai i le taimi na manaomia ai le tusifolau, ma nao Marlena lava le tei o Robbie sa lei i ai i ona autafa i le taimi na maliu ai o ia.
“Marlena! Ta le piano,” sa fai atu ai lona tina, e toeitiiti lava o aso uma.
“Marlena, na ou ave oe i aoga piano ina ia mafai ona faaaoga lau taleni e auauna atu ai i lo tatou Tama Faalelagi.”
“Marlena, o le a i ai se aso e te faafetai mai ai ia te a’u mo lenei mea.”
O nisi taimi e moomoo ai Marlena Tonumaipe’a (sa Seumali’i) ina ia mafai ona sui lona igoa ina ia le mafai ai ona ia tali atu i le “Marlena lea” ma le “Marlena lale”, ae maise lava pe a faapea o le faatonuga e i ai se mea e faatatau i le taina o le piano!
E ui i lea, e pei lava ona fuafuaina e lona tina, ua avea nei Marlena ma se ta piano ma se fatupese talenia e talosagaina ia tuufaatasia musika mo le anoano o faigalotu ma konafesi i siteki eseese i le itu o Aukilani, Niu Sila.
O le tausisia ai o manaoga mo ana auaunaga faamusika e mafai ona fita, ae faafetai pea Marlena mo ana taleni ma faamanuiaga e oo mai ai. Sa ia molimauina, i le tele o taimi, le ala e faaaoga ai e le Agaga Paia musika e faamalulu ai loto, e talai ai le talalelei ma molimau atu ai ia Iesu Keriso, ae ua avea foi le musika o se laveai alofa i lona ia lava olaga.
I le faaiuga o le 2016, sa maua ai e Marlena se tala matautia faapea o lona tuagane e masani lava ona malosi, o Robbie Seumali’i e 35 tausaga sa matapogia ma taofia ai i le Potu Tigaina i Perisipeni, Ausetalia. A o lei mafai ona ia malamalama lelei i le mea na tupu ia te ia, sa ia iloa ai sa i ai o ia i se tulaga pagatia. Sa manaomia ona ia lele atu i Perisipeni i le vave e mafai ai!
Sa le mautonu Marlena. Ua valu tausaga na te le’i toe vaai i lona tuagane – ae a pe a fai o lona avanoa mulimuli lea? Peitai e le mafai ona ia malaga e aunoa ma lana tama tama e 2 tausaga, ma sa leai se tusifolau o lana tama. E ui i se taumafaiga faavavave ma naunautai, sa le mafai ona maua mai le tusifolau i le taimi na manaomia ai, ma na o Marlena lava le tei o Robbie sa lei i ai i ona autafa i le taimi na maliu ai o ia.
Sa lofituina Marlena. O le toesea ai o lona tuagane faapea sa avea foi o se faamanatu o le maliu faafuasei o lo latou tina i le silia laitiiti atu ma le sefulu tausaga talu ai.
I ni nai masina mulimuli ane, faatasi ai ma se loto nutimomoia ma le i ai lava pea o lagona o le ta’usalaina na amata ai ona saunia e Marlena musika mo le konafesi o Aperila o le Siteki o Papatoetoe Aukilani Niu Sila. O le faatulagaina ai o le aufaipese a le siteki sa matuai foliga o se avega mamafa mo ia i le taimi lea, o aogapese sa lagonaina le sili atu ona faigata.
Ona oo lea i se tasi po, sa faataitai ai e le aufaipese se tuufaatasiga malosi o se viiga masani:
Ia filemu lou agaga,
a mavae suiga ma loimata,
e saogalemu uma ma manuia
tatou te toe faatasi mulimuli
Sa le mafai ona taofiofia e Marlena ona loimata a o ia taina le piano mo le aufaipese, ae o le taimi la lea, e le o le faanoanoa sa ia lagonaina.
“Sa matuai o’u ootia lava i upu o lena viiga matagofie,” na manatua ai e Marlena. “[Mo le taimi muamua] talu le falelauasiga o lo’u tuagane, sa ou lagona ai le filemu. Ou te iloa o le a mafai ona ou toe vaai ia te ia ma lo’u tina lalelei i le isi itu o le veli.”
E masani ona faasoa atu e Marlena lana molimau patino e uiga i le taua o musika i tapuaiga. E faaaoga e le Tama Faalelagi musika e fesoasoani ai ia i tatou ina ia malamalama i upu e le mafai e tala ona faamatalaina i nisi taimi. E mafai ona fesoasoani musika i le Agaga Paia e fesootai sa’o mai ai lava i o tatou loto ma taitaia i tatou i le mana faamalolo ma le togiola o le Faaola o Iesu Keriso.