Ana Iteraniba te Aono
Te Beretitenti i Kiribati e Butimwaaia Taan Kairiiri mai Aon Aba
N te boowi ni kataneiai ae nako ibukiia taan kairiiri n Ana Ekaretia Iesu Kristo ibukiia Aika Itiaki ni Boong aika Kaitira man te Ribwabiriki mai Kiribati, te tia kairiiri ibukin te aba, Beretitenti Taneti Maamau, e kaota ana kakaitau ae moan te korakora ibukin ana kakairi ae rangi n tamaroa te Ekaretia ma ana membwa.
E kaota uaan ana mwakuri te Ekaretia iaon te kamarurung, te reirei ao mwakuri n ibuobuoki ibukin te botanaomata. Te wekitiaobu anne bon tenibong te bong taina ibukin kataneiakiia taan kairiiri man te Marshall Islands/Kiribati Mition ibukin te Ekaretia, e karaoaki ni kautuun te aba ae Tarawa. A roko taan kairiiri man te mwaiti ae 14 man ana bootaki n taromauri te aro man aban Kiribati ake iaon aba.
Beretitenti John Larkin, te Beretitenti n te Mition, e butimwaiia 51 ake a roko man aia anganano ni beku n taian nakoa aika a kakaokoro inanon ana bootaki n taromauri te aro.
E kaira te marooro-ae boboto iaon te kataneiai iaon tabeia mitinare aika a bwanin aia tai n reireinakiia aomata taekan te Ekaretia ao boutokakiia membwa ake a okira te aro. E katuruturua naba tabeia membwa ni buokakiia raao ao kaain rarikiia n reiakina taekan ana Euangkerio Iesu Kristo.
Iotua Tune, te Moan Kauntira n te beretitentii n te mition, ao te tia kairiiri n te Titeiki n te aba ao ni bootaki nako e katauraoi naba marooro-ake a boboto iaon kataneiakiia taan kairiiri.
Atuun marooro n raonaki ma te mwakuri n ibuobuoki, kauntira ni mwaanga aika a nakoraoi, karaoan otenanti n te nakoanibonga, rekooti ibukin taekan te mwane ao kaainakin te aro, te katauraoi nakon te tembora, te katauraoi ibukin te mitinare ao te maiu n toronibwai. Iai naba te bwabwaro ae karaoaki iaon te kamarurung ae te itera-ni bong taina ni marooroakina aron katokan te aoraki ae te tioka, unikan uanikai aika a riki iantano ao kuukanakin amwarake aika a kamarurung.
Unimwaane ao Titita Skibbe, te taanga ni mitinare ibukin buokan kainnanoia te botanaomata, a anga baia ni katauraoi ni karaoan nanon taian kaetieti ao kataneiai. N raonaki ma anne, ngkai bon te neeti ae beeba iaon te aoraki ae te tioka, Titita Skibbe e karaoa te tutuo ao n tuoi raraaia ake a roko n tatabemaniia nako ao n anga ana taeka iaon maiuakinan te maiu ae kamarurung.
Te mataniwi n te Moroni High School, Banririe Nenebwati, e barongai kainibaire ibukin te roko ao waakin te karinrin ibukiia ataein te reirei ake a maeka iaon aba. N te tai aei ao te reirei e boutokaia ae e riaon 700 ataein te reirei, are man te mwaiti ake a roko n tei ibukin 14 aaba ake a ira te wekitiaobu.
Tabeman manatia ao taan mwakuri n te Ekaretia man te Kiribati Service Centre a anga naba aia rongorongo iaon te atatai ae tau ibukin ana auti ni bootaki te Ekaretia, n aron babairean te kataumwane ao bwaai ake a ootanaki.
N aron ae ngkai iai 22,000 membwa n te Ekaretia i Kiribati (21 te batienti man ikotan mwaitin te botanaomata), inanon uoua te Titeiki ao uoua te mwakoro. Iai naba ae riaon 100 mwaitiia mitinare ake a beku i Kiribati.
Te Ribwabiriki mai Kiribati ni karinanna ae ngkai ai bon te kaonoua n te aonaaba ni kaineti ma mwaitiia membwa n te Ekaretia ni katoa aomata nako.