Ti te Tataro Raroana
E maaku Prodi ni manga oki ni matu. Ao tera ngkana e a manga mii naba te kauatai?
“Tataro, E bon mena ikekei” (Aia Boki n Anene Ataei, 12).
E kabaitiia Prodi n tekateka iaon te kainiwene. E a rangi n tata buroona.
E tebetebe te karau iaon te kabwa ngkai e tekateka inanon te rotongitong. E kona n ongo timtimin te karau man te kai ae te biiku ae kain Aberika itinanikun ana winto, ao te eea e kanimnim ao n abue. E ikerake Prodi ao e kataia ni karekea ae e na rau. Bon ti te mii.
E ruo man ana kainiwene ao e kaninganinga nako nanon aia ru ana karo. Mama ao Papa a manionako ni matu. Mwaanena ae e uarereke, Célia, e baoua iaon ana kainiwene naba. A NAKORAOI bwaai ni kabane. A kawakinaki ana utu.
E a manga tamwarake n ana kainiwene Prodi ao ni iangoa manga matuuna. E kakamwakuri ao n rairaki, ao ni manga kakamwakuri ao n rairaki riki. E ataia bwa miina e aki koaua, ma e bon rangi ni kakamaaku! E ngae ngke e a kainnano, e bon maaku ngkana e a manga matu riki. Ao tera ngkana e a manga mii riki?
E wene Prodi iaon akuuna ao n tara te tiiring. E kataia n uringii iango ake a kakukurei. “Tamau are i Karawa, ko bon mena ikanne? Ao ko ongo ao ni kaekai aia tataro ataei n tatabemaniia nako?” E roko i aon Prodi te namakin ae e rau ngke e iangoa taekan te kuna man te Moanrinan ae mamaten nanona. E a tia n reireiniia Titita Kioska ae Tamara are i Karawa e aki toki n tatariaiia. A kona n tataro n Nakoina ni katoa tai, n taabo nako.
E ataa te bwai ae na karaoia Prodi. E ruo man ana kainiwene ao ni katorobubua bwa e na tataro.
“Tamara are i Karawa,” e tataro, “I a rangi ni maaku. Taiaoka kawakiniia au utu. Ao taiaoka buokai bwa n a nako ni matu ao n aki manga karekei miii aika a buakaka.”
E motika ana tataro Prodi ao n tamwarake n okira ana kainiwene. E namakina te mweraoi, ao te rau n ana iango. Inanon tabeua te tai ao e a matu.
Ngke e a ingabong, e uti Prodi n abueen taai are e otanako rinanon ana winto. E kona n ongo tangitangin taian bwaata n te umwa ni kuka ao e teirake ni kakaea Mama. E tekateka Célia n te taibora ni kanii nikiran cassava. Mama e kabueei tabeua ibukina bwa e na kanii naba.
“Bonjour,” e taku Mama. “E uara matuum?”
“Iai miiu ae moan te kakamaaku,” e taku Prodi. “Ma ngkanne I karaoa te tataro. Tamara are i Karawa E buokai n namakina ae I kamanoaki.”
“I rangi n nanokawaki ngkai iai miim ae e buakaka,” e taku Mama. E rabwata Prodi ni kaaniia ao n aki kanakoa inanon te tai ae maan. “Ma I rangi ni kukurei ngkai ko karaoa te tataro. Ti tebo ma Tamara are i Karawa e bon buokiko.”
“E bon buokai,” e taku Prodi. “I matunako raoi, ao I aki manga mi n te mii ae e buakaka.” Prodi e rabwata Mama ni koona. E rangi ni kukurei n ataia bwa e aki tabe ngkana e namakina te maaku, Tamara are i Karawa e aki raroa bwa ti te tataro.