Tii Aika a Maiu Man te Iti: Kairake n Ikawai
I a Tia ni Buaka bwa N na Tokanikai iaon Tamnei aika Tangako. Bukin Tera e Aki Kona Teuaei?
Ngke I kunea bwa raou iai ana kaangaanga ma tamnei aika tangako, I kata au kabanea n tamaroa ni buokia bwa e na rairaki nakon te Tia Kamaiu ibukin buokana.
E maeka te tia korokaraki i Guatemala.
I a tia ni kakaitibo ma te ataeinimwaane are I rangi n tangiria n te maan ae e a kan ririki. I iangoia ni koaua bwa N na mare ma ngaia! Ma I aki iangoia bwa kakaitiboou ma ngaia e na kainnanoai ni kaitara ma te kaangaanga are I a tia ni buakanna are I a tia n tokanikai iaona ma korakorau ni kabane.
Ngke I katauraoi n nako ni mitinare, I nakon au bitiobi ao ni kaoti au bure bwa Ia tia ni ikakorakora ma tamnei aika tangako n taai aika a nako. Imwiina ngke I a tia n raira nanou ao ni kamwawaaki man karawawatan tamneiu aei, I aki manga iangoia bwa tamnei aika tangako e na manga roota riki maiu. Ma I kairua.
Ngke I kunea bwa te mwaane aei are I baireia bwa N na mare ma ngaia e kabonganai tamnei aika tangako, I rangi n ingainga ni kan buokia ao ni boutokaia bwa e na tokanikai iaona. I a tia n rinanon te waaki n rairannano, ao I ataa te bwai ae e kona ni karaoia te Uea ibukina. Ma taraan ae ni katoa tai are I kataia iai ni kairia nakon te ibuobuoki are e kainnanoia n tokanikai iai iaon ana kaangaanga, bwaai a teimatoa n nakobuaka n aron kaetaia. E taraa n aki tangira te ibuobuoki. Imwiin te tai ae maan, I a ataia bwa a okoro ara iango iaon tamnei aika tangako. Eng, ti uaia ni kaina te Ekaretia, ma ana reirei te euangkerio e taraa ni kakaokoro nakon te bwai are ti katiteboaki iai ni kauoman.
I rangi n un. I tangiria, ao I kakoaua bwa n te ibuobuoki, e kona n tokanikai iaon te kaangaanga aei. I namakina naba te kakai rootaki ibukina bwa I a tia ni kaitara ma te kaangaanga naba anne are I kakorakoraai ni mwakuriia bwa N na tokaninkai iaona mai imwaina. I baireia n tataro n te tairiki teuana ibukin te wanawana mairoun Tamau are i Karawa n arou ni waaki nako ibukina bwa I kainnanoa te mwaaka n tokanikai iaon te kataaki, ao I tangiria naba n ataa arou ni boutoka te aomata are I kan tibwa maiu ma ngaia.
N tokin te tai ngke e roko te kaeka, I namakina te rau ao I ataia bwa N na marooro ma te mwaane are I kakaitibo ma ngaia iaon bukin te kantaninga are I iangoia. I tangiria bwa e na ataa te bwai are I kantaningaia mairoun te aomata are I kakaitibo ma ngaia, are N na mare n te tembora ao ni karikiia natira. I kan ataia ngkana a booraoi ara kouru ake ti iangoi ibukin taai aika a na roko ao ngkana e tauraoi n nakon te Tia Kamaiu. I kan ataia ngkana ti riai n reitanako ara reitaki. E korakora au kantaninga ibukina ao au koaua bwa imwiin ara marooro, bwaai ni kabane a na nakoraoi.
N te bwakantaai ae korakora iai te riringa ngke I tibwaua miiu ma ngaia ao au kouru ibukin au utu n taai aika a na roko ao kaikawakiia natira n te euangkerio. I kubanako, imwiin ongoraana irou, e a rangi n un. I a ataia bwa a rangi ni kaokoro ara iango ibukin taai aika a na roko. I rangi n aki kantaningaia, ma I mimi bwa I namakina te rau, ao I ataia bwa au kaeka N na katoka ara reitaki. E aki nano ni kan kataia n tokanikai iaon ana kaangaanga ma tamnei aika tangako ke n rairaki nakon ana ibuobuoki te Tia Kamaiu, ao I aki kona ni buokia ngkana e aki kan buokaki.
N te tai ae maan, I mimi bwa bukin tera ngkai I a tia ni karaoa ae eti ao ni karaoi bwaai ni kabane ake I kona iai ni buokia, ma I nanokawaki bwa e toki ara reitaki. Ma n tokin te tai, I kabwaroi rannimatau ibukina ao I teimatoa iaon te rau anne are I namakinna ngke I katoka ara reitaki. I ataia bwa te kaeka anne e roko mai karawa.
E a tia n nako tabeua te ririki imwiin tokin au reitaki ma te mwaane anne. Ao I teimatoa n iangoia bwa e na riki bwa te mwaane ae raoiroi n arona n taainako. Ma I ataia bwa e kainnanoia n riki bwa temanna are e na nakon ana ibuobuoki te Tia Kamaiu—I aki kona ni kairoroia bwa e na karaoia. Bon iai inaomatana ao iai naba inaomatau. Man te bwai are I rinanona anne, I a tia ni kataia n ira ana wirikiriki te Tamnei ae Raoiroi n aki katibanakoa. I ataia bwa Tamara are i Karawa iai ana baire ibukira ni kabane ao bwa ti kona n onimakinna ngkai ti karaoi ara babaire iaon ana wirikiriki te Tamnei, E na bon aki kationakoira. E katauraoira n tainako ibukin bwaai aika a raraoi aika a na roko.