Man te Iowawa nakon te Bwabetitoaki
Iroun Unimwaane Hugo Montoya
Man te Itingaun
Am iraorao ao am kakairi ae raoiroi e na kakabwaiaia raraom ao rooro aika a na roko.
Kamataataan te tamnei iroun Brooke Smart
Ngke ai 17 au ririki, I kaitara ma te kaangaanga ae rawawata n au kauarinan n reirei. Raoraou aika a reke a kaokoro au kainibaire ake I maiuakin ma ngaiia. Ngai ma raoraou ti uaia ni irii n taian iwawaaki ni bootaki n aekakin te takakaro n te bwatiketi booro ke te butibooro. Ma a nima naba te arekoro ao amoko—uoua te iwawaki aika I aki iriia iai.
N te bong teuana ara kurubu ti mena i tinanikun ara reirei ni kamatebwai ibukin te ukeuke are ti na karaoia imwina n te bong anne. Ngai ma raoraou aika uoman aika I rangi n rena ma ngaiia, Juan ao Francisco (a bitaki taian ara). N te tai teuana, temanna e karekei tain tibwaaki ao tikareti. I taku bwa a botu raorarou ni kamatebwai ao a mwaninga ae I mena ikekei. I a ataia bwa I kairua ngke a oki nakoiu ao a taku, “Ngkai ai bon ana tai Hugo n reireinna ni moko.”
Ma imwain ae N na karaoa te bwai teuana, Juan ao Francisco a kibarai ao n taui baiu, kaka temanna irarikiu. A taui baiu rikaaki ao temanna e karina te tikareti imarenan riau. E waetata rabwatau n totokoa te bwai anne, ao I baawarea te tikareti nako aontano, ni kararoaai ma ngaia. N te tai ae waekoa imwiina, I namakina te oro n te timoi ni bai nakon rin mwangaiu. A kakamaakai, ao a taku,“Ti na manga kairoa te tikareti, ao ko na reireiniko n temeka te bubu. Tai karenakoa i aontano. Ngkana ko karaoia, e na bon aki kakukurei anne.”
N te tai anne, I ataia bwa I a reke n te kaangaanga. I kamatui matau ao n atonga au tataro ae tawe ni bubuti te buoka teuana. Ngke e waetata n toki au tataro, e roko te tia reirei n ana kaa ao e tei irarikira. E otinako ara tia rerei man te kaa ao n titiraki bwa tera ae ti karaoia. A kainaomataai raoraou. “Ti tabe ni katauraoi ibukin te ukeuke,” a tuanga te tia reirei. Ti nakon te reirei ao ni karaoa te ukeuke, ao e toki te kaangaanga.
N ribaakin te namakin arei, I kabwarai aia bure raoraou ibukin te bwai are a tia ni karaoia. I ataia bwa aki oota n au kainibaire ao au motinano ibukin maiuakinan Tuan te Mauri, ma ngaia are I kabwarai aia bure ao n rineia bwa N na aki manga ribaiia. Ngke e bane ara reirei, I a nako n au mition ma I reitinako n reitaki ma Juan ao Francisco. I kororeta nakoia n angiin te tai n tibwaua nakoia te euangkerio ao au koaua n ana euangkerio Iesu Kristo. I kaoiia bwa a na rairinanoia ao ni ira te taromauri. I mimi bwa temanna e a iri n taromauri.
I aki toki ni kaoiia raoraou nakon te taromauri n te Tabati, ma akea ae butimwaia ni karokoa ngkai. E ngae ngke I aki kona n ira Juan, tariu ao au karo a mena ikekei ao a kona ni buokiia ao n raoraonna. A butimwaia au utu, ao Juan e rangi n namakina te mweengaraoi n te taromauri. E moana te bitaki teutana imwin teutana ni karokoa e motika nanona bwa e na bwabetitoaki. I rangi ni kakatonga irouna ao n rangi ni kakatonga riki ngke e tuangai bwa e a tia n reiakina tangiran Iesu Kristo bwa man au reta. Ngke I okira mweengau imwin au mition, I tiku naba ni kania Francisco, ao imwiina n tabeua te tai, teuaei ma buuna a bwabetitoaki naba. Te bong aei, Juan ao Francisco a bon riki bwa raoraou aika uoman.
Baika riki aikai a roota maiu. I a reiakinna bwa te kawai ae te kabanea n tamaroa ni kairi naano bon maiuakinan te raoiroi, n tangiria raom, ao ni buokiia. Te boki ae uarereke Bukin Kakorakoraia Kairake e kangai, “Karekeaia raom aika raoiroi, riiki bwa te rao ae raoiroi. Kaota nanom ni koaua irouia raom; moangare, ao kaotia nakoia bwa ko tabeakiniia.”1 Ao anne are buokai te Uea ni karaoia nakoia Juan ao Francisco. Ibukin anne, iai uoman raoraou aika a rangi n tamaroa ae I rangi ni kinaiia, ao ngkai ti uaia ni kaai ni mwakuri ni boutoka uean te Atua ngkai kaain te Ekaretia.
Tabekarake te Ekaretia n taainako, e ngae ngke ko mena inanon te kaangaanga n aekau. Ibukin Kakorakoraia Kairake e reirei, “Ngkai ko kan raonaki irouia tabeman, tai bita am kainibaire. Ngkana raoraom a kaungai karaoan baika a kairua, ko na riki bwa temanna are e tei ibukin te koaua,2 E ngae ngkana e taraa n ae ni kabane a karaoa are e kaitaraitaian tua tiiku n nene ibukina bwa am katoto e mwaakaroiroi. Riiki bwa te aekaki ni katoto are a kona raoraom ni iangoia inanon aia tai ni kainnanoiko. N taian keiti tabeua n aekakiu, am iraorao e kona n riki are e na buokiia n reiakinaki, n rairinanoia, ao n rairaki.