Kairaki nakon Monica

Rosana Soares

Utah, USA

Tamnei

woman standing on balcony watching other woman at window

Kamataataan te tamnei iroun Stan Fellow

Ngke I maeka i São Paulo, Brazil, I a tabe ni kina te aine ae onoti ae arana Graça. Bon te aine ae tikiraoi man akoi ao e tatangiraki irouia ni kabane.

Graça bon toau ni kakawari n te mweenga. Bon iai teniman natina, e mwakuri te itera n tai, ao akea ana kaa ke ana tareboon, ma akea ae e tuukia man ana ibuobuoki.

Man te auti are I maeka iai, I kona n noora wintoon ana auti. Ngkana e tauraoi, Graça e katoka te mwakoro ni kunnikai ae uraura iaon te winto anne ni kaotia bwa e a tauraoi nakon te kakawari. E aki kona ni karekea ana anga are e na aki nako n ibuobuoki iai. I a tia n iangoa ana kanikina Graça ao ana banna ni katoto aika tamaroa n ana kakaonimaki ao ana beku ae beebete.

Teuana te taneiai are e tei n au iango. Ti katauraoi ao ti tataro imwain nakora ni kawara temanna tarira. Ngke ti kaineta ana auti, ti kunea bwa tia buti nakon ana auti temanna te titita! Ti katabeaki bwa ti na kawara te titita aei, te tina ae aki bati ni kakaonimaki ma natina aika uarereke aika uoman, ma ti aki iangoia bwa ti na kawaria n te bong anne. Ibukina bwa tia roko ikekei, ti karebwerebwe, ma akea te kaeka.

Ti baireia bwa ti na nanomwaaka ao tia tataninga. Te titita, Monica, n tokin te tai e roko ao e tuangiira bwa e tabetabe. Ti nooria bwa e kua ao e taraa n tang. Ngke ti taekinna bwa ti roko ikekei bwa ti na ibuobuoki, e a kariaia bwa ti na rin. Natina ae uarereke e tang, ngaia are ti tuangnga bwa e na nakoina ao ti na tataninga. Ngke e tamwarake Monica ma natina, ti a waaki ni mwakuri, kaitiaka tabeua te ruu ao ti rukumi kunnikai ake ti kona n noori.

Ngke e noora tamaroan ana auti Monica, ao e a tang naba, ni kaota nanona nakoira, ao n tibwai tabeua ana kaangaanga. Ti berita bwa ti na buokia, ao ti maroro nakon ara beretitenti n te Bootaki n aine ibukin ana kaangaanga. Te Tabati are imwiina, Monica e a roko n te taromauri.

Monica e a kakaonimaki, te aine ae kukurei, ao ti reitinako ni ibuobuoki nakoina ma te tangira ao te tabeaianga. E teimatoa inanon te kaangaanga are mai imwaina, ma e a kona n rinanona ma te onimaki ae raka riki ao te ninikoria ibukin ana kakaonimaki n te Ekaretia.

I rangi ni kakaitau ibukin ana banna ni katoto Graça ngkai ti ikotaki ni beku. Ti a tia n tataro ibukin te kairiiri, ao te Atua e a tia ni kairiira nakon Monica.