Rongorongo ni Kairiiri man te Aono
Kabaeaki ibukin Kakabwaia aika Akea Tokiia Rinanon Ara Berita ma te Uea
“Ba E tangiriia aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki” (Ioane 3:16).
I rangi ni kakaitau iroun Tamara are i Karawa ibukin Ana tangira ae kororaoi ibukiia natina ni kabane.
Angiina mai ibuakora a rinanon kaangaanga aika a rawawata n te maiu aei. Teuana korakorana mai buakon aikai are ngkana a bua mai irarikira raora aika a tangiraki iroura imwiin ririki aika a mwaiti ni kaai ni uaia ni kukurei. Namakinan aei kanga tiaki te motiraoi mairoun te Atua, ma ni bon koauana, bon kataakin maiura mairoun Tamara are i Karawa ae tangiraki are e tangiriira bwa ti na rikirake inanon te onimaki bwa ti aonga n riki n ai arona.
Ara Uea ae Iesu Kristo e kaota Ana kantaninga nakon te burabeti ae Iotebwa Timiti, are e namakina te bwarannano inanon rawawatan ana kaangaanga inanon tekatekana, n ana tai ni kabureaki n te Karabuuti i Liberty.
Ao ngkana ko na teweaki nako nakon te rua, ke nako nanon baia taan tiritiri, ao te motikitaeka nakon te mate e roko nako aom; ngkana ko teweaki nako nanon marawa; ngkana nao aika rang korakora a kaitarako; ngkana ang aika kakamaku a riki bwa am kairiribai; ngkana Karawa e ikota te roo, ao ni kabane bwain Karawa a ikotaki n tuuka te kawai; ao e moamoa riki, ngkana mwangain moone e na kaurea wiina n rimwim, ko na ataia, natiu, bwa ni kabane bwaai aikai a anganiko te kataneiai, ao bon ibukin kabwaiam.
“Natin te Aomata e a tia n rinanon ae buakaka riki bwaai akanne ni kabane. Ko kakannato riki nakoina? Mangaia are, taua kawaim, ao te nakoanibonga e na tiku iroum; . . . tai maaka te bwai ae e na karaoia te aomata, bwa te Atua e na mena iroum n aki tootoki” (Reirei ao Berita aika Tabu 122:7–9).
Ni mwanangara n ibuobuoki n ae nako, ti kawara mweengan te buu te mwaane ae e a tia ni motirawa; e a tia ni beku ma te kakaonimaki ngke te tia kairiiri ngaia n te Ekaretia. Kainnabana ae tangiraki e korakora kataakin ana namakin n te aro are e a bua ana onimaki ao nanona n nanako n taromauri; natina a iriira tinaia n aki kakaonimaki. Inanon ikotakira ma te utu aei n rokora ngke e ingabong, n raonaki naba ma naati aine ao tiibu, ti kaota ana tangira Tamara are i Karawa ao Iesu Kristo ibukiia ni kabane.
Ti kauringa mwaanera ae tangiraki n ana berita aika tabu ake e a tia ni karaoi ngaia ma buuna tabeua te ririki n nako n ana tembora te Uea ae tabu. Ara taeka ni karaunano, e kamatoaaki n namakinan rokon te Tamnei ae Raoiroi ao ara tangira ae koaua ibukina ngkai ngaira mwaanena inanon te euangkerio, e kimwareirei ma ni kaonaki ana iango ma nanona n ururingakin kabaeakiia ae kakukurei inanon te tembora.
Ara otenanti ao ara berita aika tabu inanon te tembora a rangi n tabu ao bon kabwarabwaraan ana tangira Tamara are i Karawa ibukira. Kakabwaia aika mimitong ake a beritanaki nakoira rinanon berita aika tabu aikai a na bon tii korobukiia ngkana ti teimatoa ni kakaonimaki ni karokoa te toki.
I tibwauaia nakoia te utu anne ae e a tia ni mate kainnabau mai imwaaina, ao I ururingnga ni katoa bong. Te bua ae korakora aei bon te kaibangaki ae N na riai n uouotia ni karokoa are I roko n te maiu are imwiina ma I tibwauaia nakoia au motinnano n reitinako ni beku ibukin au Tia Kamaiu ma nanou ni kabane ni karokoa te toki, n ataia bwa n te bong teuana, N na manga bon kaitibo riki ma kainnabau ae tangiraki ao ti na manga uaia ni maeka ma te kimwareirei ao te kukurei ae akea tokina.
Ngkai ti teimatoa ni ibuobuoki nakoia te utu ae kakateke aei, ti kakoaua bain te Tia Kamaiu n nanonaga ae aroraki, ao ana kakao nakoia bwa a na oki n taromauri ao ni kukurei n ana kakabwaia te euangkerio. I rairaki n taraa temanna ma temanna n te utu aei, ni moanna mairoun te tina, ao n taku:
“Ko butimwaea te kakao aei mairoun te Tia Kamaiu? Ko kona n roko n te bootaki n toa n te Tabati?”
A butimwaea te kakao ngaia ni kabane. Ngkai ana toro te Uea ae nanorinano, a kaonaki nanora ma te kimwareirei ngkai ti kakoauaia aomata aika a rairinanoia aikai ni waakina mwanekan kawaia n nakon te Tia Kamaiu! I namakinna bwa e kimwareirei Karawa ma ngaira ngkai ti kabaeaki ma ngaiia n tatabemaniia, inanon te kataaki ao n te onimaki.
Tiaki tii karaoakin berita aika tabu, ma te teimatoa n ongotaeka nako iai e kabaeira ma raora aika a tangiraki. Korakoran mwaakan ana Mwakuri ni Kamaiu ara Tia Kamaiu ao n reitinako ni kanuaaki man ara onimaki rinanon te tataro, kamatebwaian booki aika tabu ao te mwakuri n ibuobuoki a na anganiira te korakora are ti kainnanoia ni kaitarai ni kabane kaangaangan te maiu.
Ara Tia Kamaiu e bon tabeaianga ibukiia naake a karawawataaki. E bon teimatoa n arora baina n nanonaga ao ana tangira. I kaoiia ni kabane ake a kaitara ma kaangaanga inanon maiuia, bwa tao aekakira, bwa a na nakon te Tia Kamaiu ao ni kakukureia n ana amwarake ake n Ana taibora ngkai ko butimwaea ana toa ni katoa Tabati, ao ni karaoi ao ni kawakin am berita inanon Ana tembora ae tabu. Ngkana ko karaoa aei, bon am bwai te berita ane imwiina:
“Mangaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora. Nooria, te Uea e kainnanoa te nano ao te iango ae tatauraoi; ao naake a tatauraoi ao a ongeaba a na kana raoiroin aban Tion ni boong aika kaitira aikai” (Reirei ao Berita aika Tabu 64:33–34).
I kakoaua bwa berita ake ti karaoi n te bwabetito, ngkana ti karekea te nakoaniobonga ae tabu, ao otenanti akanne ake a kakoroakibukiia inanon te tembora, a kabaeaki ma Kakabwaia aika korakora ake e katauraoi te Uea ibukira. Rinanon ara kakaonimaki n ongeaba nakon berita akanne ngkai ti teimatoa ni karokoa te toki, ti na karekei ana kakabwaia ni kabane te Uea, n aran ara Uea Iesu, amen.