Ol Niufala Polisi, Fasin blong Wok mo Ol Risos

Yut

Ol pikinini mo ol yut bae oli progres, long wan klas i go long nara klas o kworom folem yia grup, hemia long manis Jenuware, be i no folem dei we oli bon long hem.

Toktok long saed blong ol tempol. Fas Presidensi i putumaot wan toktok long 2 Jenuware 2019, we i talem olsem: “Ova long plante handred yia, oli bin stap stretem sam ditel we i go wetem tempol wok; hemia long saed blong ol lanwis, ol fasin blong bildim tempol, komunikesen mo fasin blong kipim rekod. Ol profet oli bin tijim se bae i no gat en long ol jenis olsem, be bae i olsem we Lod i talemaot long ol wokman blong Hem.”

Ol pikinini mo progres blong ol yut. Long Jenuware ol pikinini bae oli komplitim Praemeri mo ol yut bae oli progres, long wan klas i go long nara klas o kworom folem yia grup, be i no folem dei we oli bon long hem. Hemia i minim tu se ol yut oli save kasem wan limit-yus tempol rekomen blong fas taem long manis Jenuware blong yia ia we oli kasem 12 yia, mo oli save odenem ol yang man i go long Aronik Prishud long manis Jenuware blong yia ia we oli kasem 12 yia.

Moa janis blong givim seves. LDS Charities i anaonsem se hem i kam patna wetem JustServe.org blong statem wok ia #YouCanDoSomething; oli stap invaetem ol pipol blong givim seves long lokol ples blong olgeta mo blong donetem ol samting long ol gudfala wok raon long wol blong help blong jenisim wol. Blong stat, visitim “How to Help” pej long LDSCharities.org.

Ol Niu Risos blong Givhan. Websaet ia, Hemia Wok blong Givhan (ministering.ChurchofJesusChrist.org) i gat apdeit long hem, wetem sam moa atikol mo vidio. Ol risos we oli stap long websaet ia oli save helpem olgeta we oli rid blong oli go aot wetem lav mo sore, blong oli bildim ol rilesensip we i gat moa mining, blong oli kam antap long skil blong save lisin, mo plante moa. Ol niu samting insaed i tekem ol atikol blong Ol Prinsipol blong Givhan we oli bin pablisim long ol magasin blong Ensign mo Liahona, ol link i go long ol toktok blong Jeneral Konfrens abaot wok blong givhan, mo ol vidio we oli save serem.

Hop mo hiling blong olgeta we oli viktim blong abius. I gat wan niu websaet blong Jos, abuse.ChurchofJesusChrist.org, we i givim sam risos mo sam tul blong olgeta we oli viktim blong abius, mo blong olgeta we oli wantem help blong stopem abius. Fas Presidensi i putumaot wan leta tu, long 26 Maj 2019, we i leftemap tingting blong ol lida blong Jos blong go, wetem lav, helpem olgeta we oli stap safa long fasin blong abius. Wetem leta ia, i bin gat wan pepa wetem ol apdeit gaedlaen blong ol wei we ol bisop mo ol stek presidensi oli sapos blong givim kaonsel long olgeta we oli kam viktim blong abius long saed blong seks, mo olsem wanem oli mas lidim ol intaviu wetem ol memba blong Jos. Jos i putumaot tu wan vidio, “Protect the Child,” mo i mekem wan apdeit long atikol long saed blong abius long Ol Gospel Topik.

Niu seksen mo ol ap. Wan niu seksen blong Ol Stadi Plan, insaed long las apdeit blong Gospel Laebri ap, i mekem se yu save setemap wan taemtebol blong yu stadi eni samting we yu save faenem insaed long ap ia. Odinens Redi i wan niu tul insaed long FamilySearch websaet, we i mekem se i simpol blong faenem ol nem blong karem i go long tempol, mo i mekem se yu gat moa taem blong givim seves long famli blong yu mo stap glad long ol blesing blong tempol. Mo FamilySearch i gat kolosap 3 dasen blong aktiviti blong mekem long hom, olsem “Wokaot long Ples we Oli Wokbaot long Hem,” blong help blong pulum tingting blong ol yang memba blong famli insaed long wok blong histri blong famli. Ol aktiviti ia oli stap long 10 lanwis.

Ol bigfala drama, oli nomo mekem. Nomata we bae i oraet blong mekem ol lokol selebresen blong kalja mo histri, bae Jos i nomo sapotem ol bigfala samting, olsem ol bigfala drama. I gat tri nomo we bae i gohed: Nauvu Drama long Ilinoa, YSA wetem sapot we i kam long hedkwota blong Jos; Mesa Drama long Arisona, YSA, anda long eria lidasip: mo Britis Drama, anda long eria lidasip, blong oli save holem evri fo yia. Jos i nomo gohed tu wetem ol yut kalja selebresen bifo oli dediketem tempol, mo wanem i tekem ples i ol yut divosen wetem ol lida blong Jos we oli stap kam visit.