Elda Benjamin M. Z. Tai
Jeneral Atoriti Seventi
Bubu man blong Elda Benjamin M. Z. Tai long saed blong papa oli bin kasem hem, putum long prisen, mo ol ami blong Japan we oli bin faet long Hong Kong long taem blong Wol Wo II oli bin kilim ded hem.
Fulap yia afta, Elda Tai i mitim fiuja waef blong hem, Naomi Toma, blong Japan, taem Hem i stap wok olsem presiden blong kworom blong ol elda long studen wod blong hem long Brigham Yang Yunivesiti. Naomi i bin stap wok olsem presiden blong Rilif Sosaeti.
Taem Benjamin i talem long papa blong hem, foma Jeneral Atoriti Elda Kwok Yuen Tai, se hem i stap deitem mo stap hop blong maredem Naomi, papa blong hem i soem wan saen se Hem i laekem hem. Wanem i hapen afta, papa mo mama blong Naomi, Rikuo mo Fumiko Toma, i kam long Hong Kong blong visitim papa mo mama blong Benjamin. Papa mo mama blong hem i luk save se gospel blong Jisas Kraes i mekem mared blong tufala i posibol. Tufala i bin mared long Sol Lek Tempol long 23 Disemba, 1995. Tufala i papa mo mama blong sikis pikinini.
“Yumi kam long ol defren kalja, be i gat ol prinsipol blong fet mo sakrifaes we yumi evriwan i save,” Elda Tai i talem. Elda Tai i save se ol prinsipol ia blong fet mo sakrifaes bae i joenem hem wetem Ol Lata-dei Sent raon long wol.
Benjamin Ming Zhe Tai i bin bon long 20 Mei, 1972, long Hong Kong i go long Kwok Yuen mo Hui Hua Tai. Wok blong papa blong hem i tekem famli blong olgeta raon long wol bifo oli muv i go long Saot Kalifonia, YSA, long ples we Elda Tai i spendem ol yia blong yangfala blong hem. Long hom blong olgeta, papa mo mama blong hem i soem wan skrol wetem ol toktok ia we oli raetem long Jaenis raeting: “Be mi, wetem ol famli blong mi, bambae mifala i biaen long Hae God nomo”(Josua 24:15). Hemia i bin stap olsem moto blong famli Tai.
Afta we hem i bin wok olsem wan misinari long Ostrelia Melben Misin, Elda Tai i bin winim wan bajela digri long eksasaes saens long BYU long 1996 mo wan masta long bisnis administresen digri long Yunivesiti blong Kalifonia, Los Anjeles (YCLA), long 2003. Hem i bin wok long Japan mo Hong Kong long invesmen banking mo ril estet divelopmen.
Elda Tai i bin wok olsem wan Eria Seventi, distrik presiden, kaonsela long wan distrik presidensi, distrik eksekutiv sekretari, presiden blong kworom blong ol elda, branj presiden, mo Sandei Skul tija.