Tru, Klin, mo Simpol Gospel ia blong Jisas Kraes
Blong lavem God mo lavem ol neba blong yumi, i doktrin fandesen blong wok blong givhan; blong lan long hom senta we Jos i sapotem; blong spirit wosip blong Sabat dei; mo wok blong fasin blong sevem man.
Ol brata mo sista. Hem i had blong mi blong bilivim se, long 1948, 71 yia i pas nao, we mi bin wan misinari long Inglan, mo i 44 yia i pas finis we Barbara mo mi, i tekem famli blong mitufala long Kanada taem mi bin presiden blong Kanada Toronto Misin. Taem mi bin stap givim seves longwe, long Epril 1976, oli bin singaotem mi long Fas Kworom blong Olgeta Seventi, mo mi sek, long 1985, oli singaotem mi long Kworom blong Olgeta Twelef Aposol. Koling ia, i no olsem ol fas koling blong mi we mi save rilis long hem; rilis blong mi long koling blong mi long Olgeta Twelef, i no bes rod naoia; be, mi prea se dei ia bae i kam nomo afta we mi finisim evri samting we Lod i singaotem mi blong mekem.
Taem mi tingting long ol las 43 yia blong seves blong mi, olsem wan Jeneral Atoriti mo bigfala janis ia we mi bin gat blong givhan long ol pikinini blong Papa long Heven raon long wol, mi kam blong luksave moa fulwan se Hem i wantem evriwan long ol pikinini blong Hem, blong oli faenem pis, glad mo hapines long laef blong olgeta.
Profet Lihae i tijim: “Ol man [mo ol woman] oli stap blong oli save gat glad.”1 I gat plante risen from wanem pis, glad, mo hapines maet oli no kam long yumi long laef ia; ating from wan pua laef, wo, disasta, mo lusum wok, helt, mo famli rilesensip.
Be iven we yumi no save kontrolem plante long ol paoa ia aotsaed, we i tajem laef blong yumi long wol ia, taem yumi stap traem blong kam ol fetful disaepol blong Lod Jisas Kraes, yumi save faenem pis, glad, mo hapines, nomata ol trabol blong wol ia we oli swing raon long yumi.
Wan long ol pikinini blong mi i se: “Papa, Mi stap askem miwan se ?bae mi save mekem o no?” Mi ansa: “Evri samting we Papa long Heven i askem yumi, i blong yumi mekem evri bes, evri dei.” Ol brata mo sista. Mekem bes we yu save mekem dei afta dei, mo bifo yu save, bae yu kam blong luksave se Papa blong yumi long Heven i save yu mo Hem i lavem yu. Mo taem yu save hemia—yu rili save hemia—laef blong yu i gat tru stamba tingting mo mining, mo bae yu fulap wetem glad mo pis.
Olsem Laet blong Wol, Sevya i talem: “Man we i bilif long mi bambae i nomo save stap long tudak.”2
“Luk, Jisas Kraes i nem we Papa i givim, mo i no gat wan narafala nem, we tru long hem, bae [God] i sevem [yumi].
“Taswe, evri man i mas tekem long hem nem ia we Papa i bin givim.”3
Ol skripja oli tijim yumi se Setan i wantem lidim ol pipol i go long tudak. Evri traehad blong Hem i blong katemaot laet mo trutok abaot Jisas Kraes, mo gospel blong Hem. Olsem we Lihae i tijim ol pikinini blong hem, devel “i lukaotem blong mekem se evri man i save harem nogud olsem hem.”4 Sapos “wok mo glori” blong Papa long Heven i “blong mekem man [mo woman] i nomo save ded mo i kasem laef we i no save finis,”5 nao, “wok” blong Lusifa i blong mekem evri prapa harem nogud mo trabol we i no gat en i kam long ol pikinini blong God. Sin mo fasin blong brekem loa i mekem Laet blong Kraes i nomo saen gud insaed long laef blong yumi. Hemia from wanem, wok blong yumi i blong swim long Laet blong Kraes, we i tekem pis, glad mo hapines i kam.
Long las 18 yia, Lod i bin givim insperesen long profet mo ol Aposol blong Hem blong mekem plante gudfala jenis. Be, mi wari se stamba tingting blong ol jenis ia, oli go lus long tumas glad abaot ol jenis ia.
Josef F. Smit, i bin talem: “Tru, klin mo simpol gospel ia blong Jisas Kraes, oli putumbak finis. Yumi responsibol blong holemtaet gospel ia long wol.”6 Hem i ademap se, tru, klin mo simpol gospel ia, i “doktrin ia blong Kraes, we bae i sevem man.”7
Long Ol Toktok blong Bilif, Profet Josef Smit i tijim se “tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel.”8
Ol fas prinsipol blong Gospel oli fet long Lod Jisas Kraes, fasin blong sakem sin, baptaes, presen we i Tabu Spirit, mo stap strong kasem en. Brata blong hem, Haeram i bin tijim: “Prij long olgeta bakegen mo bakegen: bae yu faenem se, dei afta dei, ol niu aedia mo sam moa laet long saed blong ol samting ia bae oli kam long yu long revelesen. Tingting blong yu i save kam bigwan … blong yu andastanem olgeta klia wan. Afta, bae yu save mekem olgeta oli klia moa blong olgeta we yu stap tijim, oli andastanem.”9
Bes wei blong yumi blong luk ol stamba tingting blong Jos, long saed blong spirit, i blong laef folem ol tru, klin mo simpol tijing blong Kraes mo praktisim tufala hae komanmen blong Sevya: “Yu mas lavem Lod God blong yu wetem ful hat blong yu. … Yu mas lavem neba blong yu olsem yu lavem yuwan.”10
Fasin blong stap obei long tufala bigfala komanmen ia, i givim wan wei blong eksperiensem moa pis mo glad. Taem yumi lavem mo wok blong Lod, mo lavem mo givim seves long ol neba blong yumi, olsem nomo, bae yumi filim se i gat moa glad i kam long yumi bitim eni nara wei.
Blong lavem God mo lavem ol neba blong yumi, i doktrin fandesen blong wok blong givhan; blong lan long hom senta we Jos i sapotem; blong spirit wosip blong Sabat dei; mo blong wok blong fasin blong sevem man long tugeta saed blong vel, we ol Rilif Sosaeti mo ol kworom blong ol elda oli sapotem. evri samting ia, oli stanap long ol tabu komanmen blong lavem God mo blong lavem ol neba blong yumi. ?Bae i gat eni samting i moa besik, i stap moa olsem stamba, o i moa simpol bitim hemia?
Blong laef folem tru, klin mo simpol plan blong gospel ia, bae i givim yumi moa taem blong visitim ol wido, ol man wido, ol pikinini we i no gat famli, olgeta we oli stap olgetawan, oli sik mo oli pua. Bae yumi faenem pis, glad mo hapines long laef taem yumi stap wok blong Lod mo ol neba blong yumi.
Ol Sabat dei jenis we oli tokbaot bigwan fasin blong lanem mo stadi gospel long hom senta we Jos i sapotem, oli wan janis blong mekem spirit blong yumi i niu, mo givim yumi bakegen long God insaed long ol wol blong hom blong yumi. ?Wanem nao bae i moa simpol, besik mo moa dip? Ol brata mo sista. ?Yufala i save luk se fasin blong lanem mo tijim gospel insaed long ol famli blong yumi oli wan impoten rod blong faenem glad mo hapines insaed long laef blong yumi?
Taem Hem i tokbaot Sabat, Sevya i talem: “From, i tru, hemia i wan dei we mi jusum blong yu spel long ol wok blong yu, mo blong yu mekem wosip blong leftemap nem blong Hae God we I Hae Olgeta.”11 Hem i ademap: “blong glad blong yu i fulwan … [tru long fasin blong] stap glad mo prea … we yufala i mekem olgeta samting ia wetem bigfala tangkyu, wetem hat mo fes we oli hapi, … [mo] wetem glad hat mo hapi fes.”12
Plis teknot long sam ki toktok long revelesen ia: glad, stap glad, tangkyu, hat we i hapi, glad hat, hapi fes. Long mi, i saon se blong kipim Sabat dei i sapos blong tekem smael i kam long fes blong yumi.
Taem yumi stap givhan long wan moa hae mo tabu wei, plis tingting long hamas i nid blong yumi welkamem evriwan we i kam long ol miting blong Jos blong yumi, speseli ol niu memba mo visita. Yumi evriwan i sapos blong laekem blong singsing long ol hym, mo stap lisingud long ol toktok blong prea blong sakramen wetem wan hat mo maen we i open.
Ol testemoni blong fet long fas mo testemoni miting blong yumi, wan memba blong bisoprik i lidim, we i serem wan sot testemoni we i lukluk nomo long plan blong hapines mo tru, klin, mo simpol gospel ia blong Kraes. Evri narawan oli mas folem eksampol ia. Yumi nid blong tingbaot se i gat ol nara stret ples blong talem ol stori o serem ol eksperiens blong travel. Taem yumi kipim ol testemoni blong yumi oli simpol mo i lukluk nomo long gospel blong Kraes, bae Hem i mekem spirit blong yumi i kam niu taem yumi serem ol testemoni wetem wanwan long yumi.
Fasin blong givhan we i wok gud, oli lukluk i gud moa long hem tru long ol glas blong lavem God mo lavem ol neba blong yumi. Blong talem simpol, yumi givhan from se yumi lavem Papa long Heven mo ol pikinini blong Hem. Ol traehad blong givhan, oli gat moa sakses sapos yumi kipim wok blong givhan blong yumi i simpol. Plante long ol glad oli kam long ol simpol samting blong laef, mekem se yumi mas lukaotgud blong no ting se yumi mas ademap moa nid long eni jenis we yumi bin kasem blong bildimap fet mo ol strong testemoni blong yumi long hat blong ol pikinini blong God.
Bae yumi no mekem ol samting oli kompliket wetem moa miting, moa wok, o samting blong mas mekem. Kipim i simpol. Long simpol wei ia nao bae yu faenem pis, glad, mo hapines we mi bin stap tokbaot.
Blong plante yia, ol stamba tingting blong lidasip blong Jos, olsem we oli putum long Hanbuk 2 oli ol risal we oli klia mo simpol, mo mi kwotem:
“Ol lida oli leftemap tingting blong evri memba blong kasem evri stamba odinens blong prishud, kipim ol kavenan we oli go wetem, mo kwalifae blong kam olsem god mo kasem laef we i no save finis. …
“Ol adalt: Leftemap tingting blong wanwan adalt blong stap klin inaf blong kasem ol odinens blong tempol. Tijim evri adalt blong oli faenemaot ol bubu blong olgeta mo blong oli mekem ol tempol odinens long bihaf blong olgeta.
“Ol Yut: Help blong rere wanwan yang man blong kasem Melkesedek Prishud, mo blong kasem ol odinens blong tempol, mo stap klin inaf blong wok long wan fultaem misin. Help blong mekem wanwan yang woman i rere mo stap klin inaf blong mekem mo kipim ol tabu kavenan, mo stap kasem ol odinens blong tempol. Mekem ol yut oli kam strong moa blong tekpat long ol aktiviti we i gat mining.
“Evri memba: Helpem ol prishud mo okseleri lida, ol wod kaonsel, ol wod mo fultaem misinari, mo ol memba blong wok wan long wan balens wok blong sevem wanwan man, woman mo mekem ol famli mo yunit blong Jos oli kam strong moa, blong mekem moa prishud i aktiv, mo pulum tugeta Isrel tru long jenis long laef, holemtaet olgeta mo mekem olgeta oli aktiv. Tijim ol memba blong oli lukluk long olgetawan mo famli blong olgeta, mo blong oli helpem olgeta we oli pua mo stap long nid long wei blong Lod.”13
Seves blong mi long Jos i bin blesem mi wetem plante mo spesel eksperiens long saed blong spirit. Mi mi wan witnes se Lod i stap lidim Jos blong Hem blong mekem ol stamba tingting blong Hem oli hapen. Mi bin kasem help blong heven we i bitim paoa blong mi. Glad blong laef folem gospel, long mi, mi bin stanap long tru, klin, mo simpol doktrin mo gospel ia blong Jisas Kraes.
Mi bin givim seves anda long ol ki mo ol daereksen blong sikis profet mo presiden blong Jos, stat long Spensa W. Kimbol i go kasem Russell M. Nelson. Mi testifae se wanwan long olgeta i bin, mo hem i profet we God i jusum. Oli bin tijim yumi ol stamba prinsipol abaot Jos mo gospel, mo doktrin blong Kraes. Presiden Nelson i stap tekem wok blong Lod i go fored long wan spid we man i no save pulum win. Mi talem “we man i no save pulum win” from se !hem nomo, hem i wan Aposol, we i moa olfala bitim mi, mo mi mi hadwok blong stap folem spid blong hem! Mi mi wan witnes se ol ki blong prishud mo kot blong wan profet blong God oli stap long solda blong hem. Presiden Nelson i stap tijim tru, klin, mo simpol gospel ia blong Jisas Kraes. Mi talem testemoni blong mi se, Jisas, Hem i Kraes, mo hemia i Jos blong Hem—mo long hemia, mi testifae olsem, wetem tingting i stap daon, long nem blong Jisas Kraes, amen.