Elda James R. Rasband
Jeneral Atoriti Seventi
Taem we oli singaotem Elda James R. Rasband blong givim seves insaed long wan stek presidensi, sam yia i pas, hem i bin filim se hem i no bin rere from. Hem i tingting: “Hemia i wan mistek.”
Hem i bin filim semmak olsem, taem we, taem hem i bin gat 19 yia, hem i go insaed long Provo Misinari Trening Senta blong rere from fultaem misin blong hem long Sehul, Saot Koria. “?Olsem wanem bae mi mekem samting ia? Hem i stap askem hemwan.
Long tufala kes ia, ansa i semmak: “Stap long hem. Glad i stap kam.” O, long toktok blong mama blong hem: “Lod i no gat wan saplae blong ol man we oli stret evriwan. Jes go long wok.”
Elda Rasband i stap filim filing ia blong gat tu tingting naoia taem hem i stap kam moa kolosap long niufala koling blong hem olsem wan Jeneral Atoriti Seventi, be hem i save ansa: “Papa blong yumi long Heven i nidim nomo blong yumi wok mo serem mesej blong hiling mo glad blong Pikinini blong Hem mo long sakrifaes we i pem praes from sin, we Pikinini blong Hem i mekem.”
James Richard Rasband i bin bon long Siatol, Wasington, YSA, long James E. Mo Ester Rasband long 20 Maj, 1963. Hem i bin groap long Pebol Bij, Kalifonia, long wan haos we i stap kolosap 200 yad longwe long bigfala solwota.
Elda Rasband i mitim Mary Diane Williams olsem wan niu studen long Brigham Yang Yunivesiti. Tufala i bin raet long tufala taem tufala i bin stap stadi ovasi blong faef manis long Israel mo truaot long misin blong hem long Koria Sehul Mission. Tufala i bin mared long Los Anjeles Tempol long 11 Ogis, 1984. Tufala i papa mo mama blong fo pikinini.
Taem we hem i bin kambak long misin blong hem, Hem i finisim bajela digri blong hem long Inglis mo ol stadi blong Kolosap long Is long BYU long 1986 mo afta Hem i bin winim dokta digri blong jaj long Harvard Loa Skul long 1989. Afta we hem i bin stap praktisim loa blong faef yia long Siatol, Hem i bin gobak long BYU long 1995 blong joenem ol staf blong J.Reuben Clark Loa Skul. Hem i bin wok olsem din blong loa skul stat long 2009 go kasem 2016, taem Hem i bin kam olsem vaes presiden blong BYU.
Elda Rasband i bin wok olsem wan Eria Seventi, stek presiden, kaonsela long wan stek presidensi, hae kaonsela, bisop, mo wod Yang Man presiden.