Elda Hans T. Boom
Jeneral Atoriti Seventi
Taem we Elda Hans T. Boom i gat eit yia, famli blong hem i muv, oli aot long Amsterdam i go long siti blong Breda, we i stap long Saot pat blong Nedelan. Papa blong hem, we i wan Man Nedelan, i bin groap long Indonesia mo i wan konvet long Jos, nao hem i filim se famli blong hem i mas aot long bigfala siti mo gobak long ples blong ol bubu blong hem.
Taem we Elda Boom i bin spendem wetem famli blong hem long smol branj ia, i stap olsem wan trening ples blong givim seves long Jos—wan seves we hem i givim ful laef blong hem long hem, mo hem i stap gohed blong givim long niu koling blong hem olsem wan Jeneral Atoriti Seventi.
“Olsem wanem we mi stap tedei, mo evri samting we mi gat, hem i from Lod mo ol janis blong Hem i bin givim long mi blong mi lanem samting mo gro,” hem i talem.
Hem i bon long 13 Julae 1963, long Amsterdam, mo papa mo mama blong hem i Hans mo Ankie Boom; Hans Theodorus Boom i seken pikinini aot long olgeta fo. Papa mo mama i tijim gospel insaed long hom mo i leftemap tingting blong ol pikinini blong tufala blong oli mas wok had.
Taem hem i kasem 18 yia, Elda Boom i go long wan misin long Inglan London Is Misin. Sam manis afta we hem i finis long misin, hem i mitim fiuja waef blong hem, Ariena Johanna “Marjan” Broekzitter, long wan yang adalt konfrens blong Jos. Kapol ia i mared long 27 Julae 1984, long Run, Nedelan, mo tufala i bin sil tri dei afta long London Inglan Tempol. Tufala i gat tri boe.
Elda Boom i bin wok olsem sekretari long prinsipol blong Markenhage Kolej, mo olsem man blong karem man long wok long Franchise Development Benelux. Long taem blong koling blong hem olsem wan jeneral atoriti, hem i bin wok olsem wan maneja blong salem ol samting long MacLean Agencies.
Elda Boom i bin stap olsem wan Eria Seventi, wan kaonsela long wan stek presidensi, stek yang man presiden, branj presiden, mo kaonsela long wan branj presidensi. Long taem blong koling blong hem, hem i bin stap givim seves olsem wan institiut tija mo olsem wan tempol odinens woka insaed long Hage Nedelan Tempol.