Jan E. Newman
Seken Kaonsela long Sandei Skul Jeneral Presidensi
Olsem wan yang misinari we i stap wok long Strasbourg, Franis, Jan E. Newman i bin gat wan spesel eksperiens we i bin mekem testimoni blong hem i kam moa strong mo i mekem Hem i filim lav blong Papa long Heven. Eksperiens ia i bin hapen taem hem i stap ridim ol toktok blong profet Alma insaed long Buk blong Momon we i abaot blong stap planem sid blong gospel insaed long hat blong yumi (luk long Alma 32:28; 33:22–23).
“Mi ridim se sapos yu mekem rum blong sid ia insaed long hat blong yu, bambae i gro, mo bambae yu filim …” Brata Newman i bin talem. “Mi tingbaot taem mi stap ridim hemia mo Spirit i stap testifae strong long mi se i tru. Mi filim glad mo pis. Bae mi neva fogetem taem hemia long ful taem we bae mi laef.”
Hemia mo ol narafala eksperiens i bin help blong mekem testemoni blong Brata Newman long gospel i kam strong gud mo rere long hem blong wan laeftaem blong seves olsem wan hasban, papa, mo disaepol blong Jisas Kraes.
Jan Eric Newman i bin bon long 16 Epril, 1960, long Jerom, Aedaho, YSA; George Raymond mo Dora Walker Newman i papa mo mama blong hem. Hem i bin groap long Overton, Nevada, YSA. Papa blong hem i wan konvet, mo mama blong hem i kamaot long wan jeneresen blong ol Lata-dei Sent fulap jeneresen i gobak biaen.
Hem i bildim wan testemoni long ol yang yia blong hem mo i bin wok long wan fultaem misin long Franis mo Beljiom. Afta long misin blong hem, Brata Newman i winim wan bajela digri long Franis lanwis long Brigham Yang Yunivesiti. Hem i bin enjoem digri blong hem tumas mekem se hem i wantem kam wan Franis tija be afta hem i jus blong folem skul from sofwea indastri. Hem i wok olsem wan man blong mekem ol kompiuta program blong moa long 30 yia, mo i bin statem sam long ol sofwea kampani we oli stap wok gud tedei. Naoia, Hem i wan patna long SageCreek Partners, wan kampani blong teknoloji long Alpaen, Yuta.
Brata Newman i bin maredem Lucia Price long Okland Kalifonia Tempol long 18 Ogis,1984. Tufala i papa mo mama blong sikis pikinini mo oli stap long Elk Rij, Yuta.
Brata Newman i bin wok olsem wan stek presiden, bisop, wod Yang Man presiden, Skaotmasta, mo wan tempol woka. Stat long 2006 go kasem 2009, Hem i wok olsem Presiden blong Nebraska Omaha Misin.