Las Toktok
Mo bae yumi dediketem mo dediketem bakegen laef blong yumi blong wok blong God mo ol pikinini blong Hem—long tugeta saed blong vel.
Ol brata mo sista we mi lavem. Taem yumi stap kam long klosem histri konfrens ia, mi talem tangkyu long Lod from insperesen mo proteksen blong Hem. Ol mesej oli bin tijim mo leftemap yumi.
Mifala i no bin givimaot topik long ol spika. Wanwan i bin prea blong kasem revelesen blong olgetawan taem oli bin rere long mesej blong olgeta. Long mi, i spesel tumas olsem wan ol stamba toktok ia oli go gud wan wetem narawan. Taem yufala i stadi long olgeta, lukaot blong lanem wanem we Lod i stap traem blong tijim yufala tru long ol wokman blong Hem.
Miusik i bin olsem glori. Bigfala tangkyu i go long ol plante miusik man mo woman we oli joenem talen blong olgeta blong tekem Spirit blong Lod i kam long wanwan sesen. Mo Hem i bin blesem ol prea mo ol kongregesen long evri sesen. I tru, konfrens ia i bin givim wan kaekae long saed blong spirit long yumi evriwan.
Yumi hop mo prea se hom blong wanwan memba bae i wan sef haos blong prea, ples we Spirit blong Lod i save stastap long hem. Nomata ol raorao raon long yumi, hom blong wanwan i save kam wan ples blong heven, we stadi, prea mo fet i save joen wetem lav. Yumi rili save kam ol disaepol blong Lod, we yumi stanap mo toktok from Hem long eni ples yumi stap long hem.
Bigfala stamba gol blong God i mas hemia blong yumi. Hem i wantem ol pikinini blong Hem blong jusum blong gobak long Hem, we oli rere, oli kwalifae, oli endao, oli sil, mo oli fetful long ol kavenan we oli stap mekem insaed long ol tabu tempol.
Naoia, yumi gat 162 tempol we oli dediketem olgeta. Ol faswan oli stap olsem ol bigfala bilding blong fet mo visen blong ol paeonia we yumi lavem olgeta. Wanwan tempol we oli bin bildim, i risal blong bigfala sakrifaes mo traehad blong olgetawan. Wanwan i stanap olsem wan bigfala ston we i saen insaed long hat blong king we oli putum long ol paeonia.
Tabu responsabiliti blong yumi i blong kea from olgeta. From hemia, ol paeonia tempol ia bae i no longtaem, bae oli go tru long ripea mo kam niu, mo blong sam, oli fiksim fulap samting. Bae oli traehad blong holemtaet histri blong wanwan tempol, taem we i posibol, holemtaet naes samting mo ol han wok blong ol jeneresen we oli lus finis.
Oli talemaot finis ol ditel blong Sent Joj Yuta Tempol. I gat plan blong mekem Sol Lek Tempol i niu bakegen, wetem Tempol Skwea, mo ples narasaed kolosap long Jos Ofis Bilding; bae oli anaonsem long Fraedei 19 Epril 2019.
Mantae mo Logan Tempol, bae oli fiksim tu long ol yia we oli stap kam. Taem ol plan ia oli rere, bae oli anaonsem olgeta tu.
Wok ia bae i minim se wanwan tempol bae i klos blong wan sot taem. Ol memba blong Jos oli save gohed blong tempol wosip mo seves long ol nara tempol kolosap. Taem wanwan projek i finis, wanwan histri tempol ia, bae oli dediketem bakegen.
Ol brata mo sista, yumi tekem se tempol i bilding ia we i moa tabu insaed long Jos. Taem mifala i stap anaonsem blong bildim wan niu tempol, hemia i kam pat blong tabu histri blong yumi. Naoia, plis, yufala i lisin gud mo stap revren. Sapos mi anaonsem wan tempol long wan ples we i spesel long yu, bae mi askem yu blong yu benem hed nomo wetem wan saelen prea blong tangkyu long hat blong yu. Yumi no wantem laod singaot we bae i tekemaot tabu fasin blong konfrens ia mo tabu tempol blong Lod.
Tedei, mifala i glad blong anaonsem se i gat plan blong bildim moa tempol. Bae oli bildim long ol ples ia:
Pago Pago, Ameriken Samoa; Okinawa Siti, Okinawa; Neiafu, Tonga; Tooele Vale, Yuta; Moses Lek, Wasington; San Pedro Sula, Honduras; Antofagasta, Jile; Budapest, Hangari.
Tangkyu ol dia brata mo sista blong mi.
Taem yumi stap tokbaot ol tempol blong yumi, ol olfalawan mo ol niuwan, bae wanwan long yumi i soem tru long ol aksen blong yumi se yumi ol tru disaepol blong Lod Jisas Kraes. Bae yumi mekem niu, laef blong yumi tru long fet mo tras blong yumi long Hem. Bae yumi save yusum paoa blong Atonmen blong Hem taem yumi sakem sin evri dei. Mo bae yumi dediketem mo dediketem bakegen laef blong yumi blong wok blong God mo ol pikinini blong Hem—long tugeta saed blong vel.
Mi givim lav mo blesing blong mi long yufala, blong yufala i save se revelesen i gohed blong kam, insaed long Jos ia blong Lod. Bae hem i gohed kasem taem we ol stamba tingting blong God oli kamtru, mo Hae Jehova bae i talem se wok i finis.”1
Mi blesem yufala olsem mo talem testemoni blong mi se !God i stap laef! !Jisas Hem i Kraes! Hemia i Jos blong Hem. Yumi ol pipol blong Hem. Long tabu nem blong Jisas Kraes, amen.