Elda Jorge M. Alvarado
Jeneral Atoriti Seventi
Miguel moIris Alvarado, tufala i joenem Jos long Pueto Riko long 1977 taem boe blong tufala Jorge, i gat sikis yia. Yangfala Jorge i baptaes tu yia afta mo i neva mestem wan Sabat dei seves.
“Be tru jenis long laef blong mi i bin hapen taem mi bin gat 16 yia,” niu Jeneral Atoriti Seventi i talem.
Long hae skul, hem i stat blong stap olsem wan presiden blong seminari klas blong hem long homtaon blong hem, Pons. Ol studen oli bin stap stadi long Buk blong Momon long yia ia. Niu responsabiliti ia blong hem i pusum hem blong luklukgud insaed long sol blong hem.
“Mi mas askem miwan, ‘?Mi mi rili save se Buk blong Momon i tru?’ ?Olsem wanem nao bae mi presiden blong seminari klas blong mi sapos mi no iven save se buk ia i tru o no?”
Hem i pikimap kopi blong hem blong Buk blong Momon, mo blong fas taem, hem i stat blong ridim gud wanem i stap insaed.
“Mi bin nildaon mo mi prea, mo afta nao mi bin save se buk ia i tru,” hem i talem.
Buk blong Momon i stap yet olsem wan bigfala paoa blong jenis long laef blong Elda Alvarado.
Taem hem i bin stap olsem wan fultaem misinari insaed long Florida Tampa Misin, hem i bin serem Buk blong Momon wetem evriwan we hem i bin tijim. I no longtaem afta, hem i bin stadi long buk ia wetem waef blong hem mo ol trifala pikinini blong hem. Olsem presiden blong Pueto Riko San Ruan Misin, hem i givim jalenj long ol misinari blong hem, blong oli lavem mo oli serem Buk blong Momon.
Naoia, olsem wan Jeneral Atoriti Seventi, Elda Alvarado i stap strong yet blong stap invaetem ol narawan blong faenem ol trutok insaed long Buk blong Momon we oli save jenisim laef blong man.
Jorge Miguel Alvarado Pazo i bin bon long 21 Novemba 1970. Long 19 Disemba 1992, hem i bin maredem Cari Lu Rios long Wasington D. K. Tempol.
Afta we hem i bin stadi long bisnis manejmen long Yunivesiti blong Pueto Riko, hem i bin wok long ol defren posisen blong bisnis manejmen long Puerto Riko mo long Yunaeted Stet. I no longtaem i pas, hem i bin wok long hedkwota blong Jos long Sol Lek Siti, olsem wan intanasonol maneja blong Indipenden Laef Seves.
Elda Alvarado i bin stap olsem wan Eria Seventi, wan stek presiden, wan hae kaonsela, wan branj presiden mo wan wod misin lida.