Bigfala Lav long Ol Pikinini blong Papa blong Yumi
Lav, i fasfala fasin mo wanem bae i pusum yumi blong mekem ol stamba tingting long saed blong spirit we profet blong yumi i givim long yumi olsem wok.
Ol dia brata mo sista. Hemia i wan kaen taem ia nomo mo wan taem blong jenis long histri. Yumi gat blesing blong laef long las dispensesen bifo Seken Kaming blong Sevya. Kolosap long stat blong dispensesen ia, long 1829, yia bifo Jos i oganaes, wan revelesen i kam, i talemaot wan “gudfala wok” we “bae i stap kam.” Revelesen ia, i putum se olgeta we oli wantem wok blong God, oli kwalifae from seves ia tru long “fet, hop, jareti mo lav, wetem wan ae we i stap lukluk nomo long glori blong God.”1 Jareti, we i “stret lav blong Kraes,”2 i tekem lav we i no save finis, we God i gat long evri pikinini blong Hem.3
Stamba tingting blong mi long moning ia, i blong tokbaot bigwan stamba rol blong kaen lav ia long misinari wok, long tempol mo famli histri wok, mo long fasin blong laef folem relijin insaed long hom senta we Jos i sapotem. Lav long Sevya mo lav long ol nara man mo woman,4 i fasfala fasin mo tingting blong givhan mo blong ol stamba tingting5 long saed blong spirit we i kam long profet we yumi lavem, Presiden Russel M. Nelson, blong mekem yumi taem hem i anaonsem ol jenis ia long 2018.
Misinari Wok blong Karem Isrel we I bin Seraot I Kam Tugeta
Eli long laef blong mi, mi kam blong luksave rilesensip bitwin misinari wok mo lav. Taem mi gat 11 yia, mi kasem wan petriakel blesing long wan petriak, we i bin bubuman blong mi tu.6 Blesing ia, smol pat i talem: “Mi blesem yu wetem bigfala lav long ol nara man, from se bae oli singaotem yu blong tekem gospel i go long wol, … blong winim ol sol oli kam long Kraes.7
Mi bin andastanem, nomata mi smol, se blong serem gospel, hemia i stanap long bigfala lav i go long evriwan long ol pikinini blong Papa long Heven.
Olsem ol Jeneral Atoriti we mifala i bin kasem wok blong wok long Prijim Gospel blong Mi, 15 yia i pas, mifala i putum se fasin ia blong gat lav, i wan nid insaed long misinari wok long taem tedei, semmak i bin stap bifo. Japta 6, long saed blong ol fasin olsem hemia blong Kraes, we i tekem jareti mo lav, i bin stap oltaem olsem popula japta blong ol misinari.
Olsem ol soldia blong Sevya, plante long ol misinari oli filim kaen lav ia, mo taem oli filim, hadwok blong olgeta i karem blesing. Taem ol memba oli kasem wan visen blong kaen lav ia, we i nid blong save helpem Lod long stamba tingting blong Hem, wok blong Lod bae i finis.
Mi bin gat spesel janis blong gat wan smol pat long wan gudfala eksampol blong kaen lav ia. Taem mi bin stap olsem Presiden blong Pasifik Aelan Eria, mi bin kasem wan fonkol i kam long Presiden R. Wayne Shute. Taem hem i yangfala, hem i mekem misin long Samoa. Afta long hemia, Hem i gobak long Samoa olsem wan misin presiden.8 Taem hem i ringim mi, hem i bin stap olsem Apia Samoa Tempol presiden. Wan long ol yangfala misinari blong hem, taem hem i bin misin presiden, i bin Elda O. Vincent Haleck, we naoia i Eria Presiden long Pasifik. Presiden Shute i gat bigfala lav mo respek long Vince mo ful Haleck famli. Plante long famli oli memba blong Jos, be papa blong Vince, Otto Haleck, petriak blong famli (we i kamaot long Jemani mo Samoa), i no wan memba. Presiden Shute i bin save se bae mi go long wan stek konfrens mo ol nara miting long Ameriken Samoa, mo hem i askem mi sapos mi glad blong stap long haos blong Otto Haleck wetem tingting blong serem gospel wetem hem.
Waef blong mi, Meri, mo mi, i bin stap wetem Otto mo waef blong hem, Doroti, long naes hom blong olgeta. Long brekfas, mi bin serem wan mesej blong gospel mo invaetem Otto blong mit wetem ol misinari. Hem i kaen, be i strong blong no akseptem invitesen blong mi. Hem i talem se hem i glad se plante memba blong famli oli ol Lata-dei Sent. Be hem i talem strong se sam long ol bubu blong Samoa mama blong hem, oli bin ol fas Kristin minista long Samoa, mo hem i filim blong hem i mas folem nomol Kristin fet blong olgeta.9 Nomata hemia, mitufala i go wanwan mo stap gud fren.
Afta long hemia, taem we Presiden Gordon B. Hinckley i stap rere blong dediketem Suva Fiji Tempol, hem i askem sekretari blong hem, Brata Don H. Staheli,10 blong ringim mi long Niu Silan blong mekem ol arenjmen. Presiden Hinckley i wantem flae aot long Fiji i go long Ameriken Samoa blong mit wetem Ol Sent. Wan hotel we oli bin yusum bifo, i kamaot long lis. Mi askem sapos mi save mekem ol defren arenjmen. Brata Staheli i talem: “Yu nao yu Eria Presiden; bae hem i oraet.”
Kwiktaem, mi ringim Presiden Shute mo talem long hem se maet bae mifala i gat wan seken janis blong blesem, long spirit, fren blong mifala, Otto Haleck. Tetaem ia, bae misinari hem i Presiden Gordon B. Hinckley. Mi askem sapos hem i tingting se bae i stret blong famli Haleck i openem haos blong olgeta long travel grup blong Presiden Hinckley.11 Presiden mo Sista Hinckley, gel blong tufala, Jen, mo Elda mo Sista Jeffrey R. Holland tu oli pat blong travel grup ia. Presiden Shute, i wok wetem famli, i mekem evri arenjmen.12
Taem mifala i aot long Fiji i kasem longwe afta long dedikesen blong tempol, oli welkamem gud mifala.13 Mifala i toktok long naet ia long ol taosen memba blong Samoa, mo afta, gohed blong go long ples blong famli Haleck. Taem mifala i girap mo kakae brekfas long nekis moning, Presiden Hinckley mo Otto Haleck, tufala i gud fren finis. Mi faenem se i intresting se tufala i gat semmak storian we mi bin gat wetem Otto ova wan yia i pas. Taem Otto i talem se hem i glad long Jos blong yumi be i strong long komitmen blong hem long jos we hem i stap long hem, Presiden Hinckley i putum han blong hem long solda blong Otto, mo talem: “Otto, hemia i no gud inaf; yu sapos blong stap wan memba blong Jos. Hemia i Jos blong Lod. Yu save luk bigfala klos blong faet ia i foldaon, i kamaot long Otto mo i open long wanem Presiden Hinckley i talem.
Hemia i stat blong wan moa tijing blong misinari mo fasin blong putum tingting i stap daon we i letem Otto Haleck i baptaes mo i kasem konfemesen, hemia ova afta wan yia. Wan yia afta, famli Haleck i bin sil olsem wan famli we i no save finis long tempol.14
Wanem i tajem hat blong mi tru long bigfala eksperiens ia, i bigfala givhan lav we Presiden Wayne Shute i gat long foma misinari blong hem, Elda Vince Haleck, mo hat blong hem blong luk ful Haleck famli i yunaet olsem wan famli we i no save finis.15
Taem i kam long wok blong pulum Isrel i kam tugeta, yumi nid blong stretem hat blong yumi wetem kaen lav ia mo muv longwe long ol filing blong ting se hem i responsabiliti nating nomo,16 o rong, mo muv i go long ol filing blong lav, mo tekpat long tabu patnasip blong serem mesej blong Sevya, seves mo misin blong hem long wol ia.17
Olsem ol memba, yumi save soem lav blong yumi long Sevya mo ol brata mo sista raon long wol, taem yumi mekem ol simpol invitesen. Niufala Sandei miting taemtebol i ripresentem wan spesel janis blong ol memba oli invaetem ol fren wetem sakses mo lav, mo oli kam mo filim wan eksperiens long Jos.18 Wan sakramen miting we i fulap long Spirit, olsem we Elda Jeffrey R. Holland i talem yestedei, mo afta, bae i gat 50 minit miting we i lukluk long Niu Testeman mo Sevya, o ol nara toktok blong konfrens we oli lukluk tu long Sevya mo doktrin blong Hem.
Sam Rilif Sosaeti sista oli bin stap askem olgetawan se from wanem nao oli kasem wok blong “kam tugeta” wetem ol memba blong prishud kworom. I gat ol risen from hemia, mo Presiden Nelson i talem plante long ol risen ia long las jeneral konfrens. Long en, hem i talem: “Mifala i no save pulum Isrel i kam tugeta sapos yu no stap.”19 Tedei, yumi gat blesing se kolosap 30 pesen blong ol fultaem misinari blong yumi, oli ol sista. Hemia i givim sam moa risen long ol Rilif Sosaeti sista blong gat lav blong serem gospel. Wanem we i nid, i wan komitmen blong lav, sore mo spirit we i kam long wanwan long yumi—ol man, woman, yut mo pikinini—blong serem gospel blong Jisas Kraes. Sapos yumi soem lav, kaen fasin mo tingting i stap daon, plante bae oli akseptem invitesen blong yumi. Olgeta we oli jusum blong no akseptem invitesen blong yumi, bae oli stap yet olsem ol fren blong yumi.
Tempol mo Famli Histri Wok blong Mekem Isrel I Kam Tugeta
Lav i stap tu long medel blong tempol mo famli histri wok blong mekem Isrel i kam tugeta long nara saed blong vel. Taem yumi lan abaot ol tes mo ol hadtaem blong ol bubu blong yumi, lav mo tangkyu blong yumi long olgeta, i gro bigwan moa. Tempol mo famli histri wok i bin kam strong moa bigwan tru long ol niu jenis long Sandei miting taemtebol, mo fasin blong muvum ol yut insaed long ol klas mo kworom. Ol jenis ia oli givim wan niu wok blong mas lukluk gud blong stap lan abaot ol bubu blong yumi mo blong mekem Isrel kam tugeta long nara saed blong vel. Tugeta, tempol mo famli histri wok oli kam antap bigwan.
Intanet i wan strong tul; naoia, hom i fasfala famli histri senta blong yumi. Ol yang memba blong yumi oli savegud long wok blong lukaotem famli histri, mo long saed blong spirit, oli gat strong tingting blong mekem baptaes blong ol bubu blong olgeta we oli bin lan blong lavem mo talem tangkyu from olgeta. Stat long taem blong jenis ia we i letem olgeta we oli gat 11 yia blong mekem ol baptaes blong ol dedman, ol tempol presiden raon long wol oli ripotem moa hae namba blong atendens. Wan tempol presiden i talem: “namba blong ol baptaes petron i go antap … mo taem oli givim raet long ol 11 yia, i mekem moa famli oli kam. … Iven we oli smol, i luk se oli save haremsave se oli mas gat respek mo i gat stamba tingting long odinens ia we oli stap mekem. !I naes tumas blong lukluk hemia!20
Mi save se ol Praemeri mo yut lida oli stap, mo bae oli gohed blong mekem famli histri mo tempol wok i wan bigfala wok blong wok long hem. Ol Rilif Sosaeti sista mo ol brata blong prishud, wetem lav, oli save help blong mekem ol tempol mo famli histri responsabiliti wanwan, mo tu, taem oli help mo givim insperesen long ol pikinini mo ol yut blong karem Isrel i kam tugeta long nara saed blong vel. Hemia i impoten, speseli insaed long hom mo long Sabat. Mi promes se, blong mekem ol odinens ia blong ol bubu wetem lav, bae i mekem ol yut mo ol famli oli kam strong moa long wan wol ia we i gat moa ivel. Miwan, mi testifae se Presiden Russel M. Nelson i kasem ol dip impoten revelesen long saed blong ol tempol mo wok blong tempol.
Rere long Ol Famli we Oli No Save Finis mo Wanwan Man, Woman blong Save Laef wetem God.
Niu wok we oli tokbaot bigwan, blong hom i senta blong gospel stadi mo laef folem gospel, mo ol risos we Jos i stap givim, oli ol bigfala janis blong rere wetem lav, ol famli we oli no save finis mo wanwan man mo woman blong oli mitim mo laef wetem God.21
Taem wan man mo wan woman oli sil long tempol, tufala i joen long tabu oda blong mared insaed long kavenan ia we i niu mo i no gat en, we i wan oda blong prishud.22 Tugeta, oli karem mo kasem ol prishud blesing mo paoa blong lidim ol wok blong famli blong olgeta. Ol woman mo ol man oli gat ol rol we i blong olgeta nomo, olsem we i stap long “Famli: Wan Ofisol Toktok I Go long Wol,”23 be wok we oli ansa from, i bigwan mo i impoten semmak.24 Oli gat ikwol paoa blong kasem revelesen from famli blong olgeta. Taem oli wok tugeta wetem lav mo stret mo gud fasin, bae desisen blong olgeta, heven i blesem.
Olgeta we oli lukaot blong save tingting blong Lod olsem wanwan man, woman o blong famli blong olgeta, oli mas traehad blong stap stret mo gud, no stap flas, stap kaen mo gat lav. Fasin blong gat tingting i stap daon oli ol stamba mak blong olgeta we oli stap lukaotem tingting blong Lod, speseli blong famli blong olgeta.
Blong mekem yumi kam stret evriwan, blong mekem yumi kwalifae from ol blesing blong ol kavenan, mo stap rere blong mitim God, oli responsabiliti blong yumi wanwan. Yumi nid blong dipen long yumiwan, mo wok strong blong mekem hom blong yumi i wan sef ples blong haed long strong win we oli raonem yumi,25 mo i stap olsem wan “sef ples blong fet.”26 Papa mo mama, tufala i gat fas wok ia blong tijim ol pikinini blong tufala wetem lav. Ol hom we oli fulap wetem lav, oli wan glad, mo wan tru heven long wol ia.27
Fevret hym blong mama blong mi, i “Lav long Hom.”28 Taem hem i harem fas toktok, “Evri ting i gud sapos, i gat lav long hom,” hemia i tajem hat blong hem mo hem i krae. Taem mifala i pikinini, mifala i save gud se mifala i bin stap long wan kaen hom olsem; i bin wan fas wok blong mama.29
Antap long wan ples we i gat lav insaed long hom, Presiden Nelson i lukluk nomo blong putum limit long yus blong media we i spolem ol fasfala stamba tingting blong yumi.30 Wan jenis we bae i gud blong eni famli, i blong mekem intanet, sosol media, mo televisen i wan wokman, be i no wan pleiplei, o iven moa was, wan masta. Wo blong ol sol blong yumi evriwan, be speseli ol pikinini, i stap insaed long hom plante taem. Olsem papa mo mama, yumi nidim blong meksua se wanem i stap long media, i gud, i stret folem yia, mo i go stret wetem ples blong lav long hom we yumi wantem gat.
Tijing insaed long hom blong yumi i nid blong i klia mo i pusum man,31 be tu, i gat spirit, wetem glad mo i fulap long lav.
Mi promes se, taem yumi lukluk nomo long lav we yumi gat long Sevya mo Atonmen blong Hem, mekem hem i kam senta blong evri hadwok blong yumi blong pulum Isrel i kam tugeta long tugeta saed blong vel, givhan long wanwan blong yumi, mo wanwan, yumi rere blong mitim God, nao bae paoa blong enemi i go daon mo hat we i glad, glad mo pis blong gospel bae i givim paoa long hom wetem lav ia we i olsem hemia blong Kraes.32 Mi testifae abaot ol promes blong doktrin ia, mo taem sua witnes blong mi abaot Jisas Kraes mo sakrifaes blong Hem we i pem praes from sin long bihaf blong yumi, long nem blong Jisas Kraes, amen.