Na’o le Polokalama Faafuainumera
O Auala e 3 Ua Avea ai Perofeta ma Faamaoniga e Alofa le Atua Ia te Oe
E alaala le tusitala i Virgina, ISA.
O perofeta ua na’o se tasi o le tele o auala e faaali mai ai e le Tama Faalelagi le tele o Lona alofa ia i tatou.
E faapefea ona e iloa e alofa le Atua ia te oe? Mo a’u, o le vaaia o lagoto matagofie, sueina o le savali e fetaui tonu lava mo lo’u aso i tusitusiga paia, po o le mauaina o tesi agalelei mai uo. Ae o se molimau e sili atu le mamana o le alofa o le Atua mo a’u o le i ai lea o se perofeta soifua i le lalolagi i aso nei. Ua saunoa mai Elder Dieter F. Uchtdorf o le Korama a Aposetolo e Toasefululua, “Talu ai e alofa le Tama Faalelagi i Lana fanau, o lea e Na te le o tuulafoai ai i latou e savavali e aunoa ma se taiala ma se taitaiga i lenei olaga faaletino.”1 O auala nei e tolu e mafai ona tatou lagona ai lealofa o le Atua e ala i se perofeta soifua.
1. E maua e le perofeta faaaliga mo le lalolagi atoa ae mo na’o a’u lava foi.
Talu mai le amataga, sa tuuina mai lava e le aunoa e le Atua ia faaaliga i perofeta. Ua fetalai mai le Alii, “Pe i lo’u lava leo po o i le leo o a’u auauna, ua tutusa lava” (MF&F 1:38). Ua faamanuiaina tagata o le Ekalesia atoa ma tagata taitoatasi ona o faaaliga i onaponei, e aofia ai le faaliliuga ma le lomiaina o le Tusi a Mamona, o le fausiaina o malumalu, ma le taulaiga i le auaunaga ole tasi i le isi.
Mo a’u lava ia, na suia lo’u olaga e Peresitene Thomas S. Monson (1927–2018) i le 2012 ina ua ia fofogaina mai e mafai e tuafafine ona auauna atu faamisiona pe a 19 tausaga le matutua. Sa ou lagonaina le tele o le alofa ma le faatuatuaga mai le Atua i lena taimi, ma ona o lena faasilasilaga, sa mafai ai ona ou alu i la’u misiona i le ono o aso talu ona uma lo’u aso fanau e 19 ai ou tausaga. O la’u faaiuga e auauna atu i lena taimi ua mamanuina i ai le ala o lo’u olaga atoa.
E faaali mai foi e le Atua Lona alofa e ala i le faamanuiaina o i tatou i savali e fitoitonu mo i tatou e ala mai i fautuaga a perofeta. Ae e tatau lava pea ona tatou faalogo ma le toto’a ma fesili ifo ia i tatou lava, “O le fea o vaega o lenei savali e mo a’u?” Soo se taimi lava e taliina ai a’u tatalo po fesili e ala mai i savali a perofeta ma aposetolo, e pai mai le Agaga ia te a’u ma se malamalama e faapea, e alofa le Atua ia te a’u ma silafia patino a’u.
2. E mafai ona avea perofeta ma ou taiala patino.
Ua tuuina mai e le Tama Faalelagi ia i tatou se perofeta mo o tatou aso, o Peresitene Russell M. Nelson. E ui atonu e fiasefulu tausaga e matua ai o ia ia te oe, ae o aafiaga o lona soifuaga o se matuai tulaga lelei moni lea a o ia faasoa mai le atamai ma fautuaga mai le Atua. Faatasi ai ma o tatou manaoga i lona finagalo, ua saunia ai e le Tama Faalelagi ia Peresitene Nelson faatasi ma ni aafiaga i lona soifuaga atoa ma faaauau ona taialaina o ia faalelagi ina ia mafai ona ia aoao mai ma malamalama i lo tatou augatupulaga.
O loo umia e Peresitene Nelson ia ki uma e maua ai faaaliga. O le Tama Faalelagi, o le ua silafiaina atoatoa tauiviga ma manaoga o lo tatou augatupulaga, e tuuina mai faaaliga ia Peresitene Nelson i auala e sili ona lelei e mafai ona ia aoaoina ma taiala ai i tatou. O le faigalotu a Peresitene Nelson, “Becoming True Millennials,”2 lea sa [ia] aoao mai ai le fautuaga ma le apoapoaiga a le Alii i tagata o le meleniuma, ua faamaonia ai e faaaoga e le Tama Faalelagi ia Peresitene Nelson e fesoasoani e tiala i tatou i le olaga.
3. O perofeta e lapataia i tatou e uiga i mea e lamatia ai.
Ona e alofa tele le Tama Faalelagi ia i tatou, ua Ia finagalo ai ia tatou saogalemu faaletino ma faaleagaga. E tatau ona tatou faaeteete i leo uma i le lalolagi vavao, ae e mafai ona tatou faatuatuaina i taimi uma siufofoga o perofeta aua ua folafola mai ma le agalelei e le Atua ia i tatou o le a Ia le faatagaina lava le perofeta e taitaiesina i tatou. Ua saunoa mai Peresitene Nelson ia tatou faitau i le Tusi a Mamona i aso taitasi ma maua faaaliga faaletagata lava ia e tumau ai le saogalemu faaleagaga.3 Na saunoa o ia, “Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia.”4
O perofeta ua na’o se tasi o le tele o auala e faaali mai ai e le Tama Faalelagi le tele o Lona alofa ia i tatou, ma silafia patino ai i tatou. Na aoao mai Elder Ulisses Soares, o le Korama a Aposetolo a Toasefululua, “O le i ai o perofeta o se faailoga lea o le alofa o le Atua mo Lana fanau. Latou te faailoa maia folafolaga ma le natura moni o le Atua ma Iesu Keriso i lo latou nuu.”5 A o ou faatuatuaina tuleiga a perofeta ma faalogo ma usitai atu i a latou fautuaga, ua faapea ona ou maua ai tali i a’u fesili. Ou te faafetai tele mo nei faailoaga o le alofa o le Atua.