“O A’u Lea Na Outou Faia i Ai”
Shannon Knight
Kalefonia, ISA
Ata na tusia e Allen Garns
O le matou aiga e i ai se aga masani o le Kerisimasi o le tuuina atu o ato meaalofa o meaai, totinilima, pulou, ma isi mea e manaomia ia i latou e limavaivai. I le 2016, sa matua ese le malulu o le afiafi a o lumanai le Kerisimasi i le eria o Kalefonia, ISA, o loo matou nonofo ai. Sa matou faapupuu faatasi, ae sa matou tetete pea lava!
A o matou tietie atu i se paka e latalata ane i le matou fale lea e nonofo ai le toatele o tagata e leai ni fale, sa matou vaaia se tamaloa o faapupuu i totonu o se tamai faamalumaluga o se fale faatalipasi, o pulupulu i se palanikeke tuai. Sa faatu e lo’u toalua o Tenisi le taavale, ae o atu ma lo’u atalii o Ionatana e avatu i le tamaloa se ato meaalofa. Sa ma nonofo ma lo ma afafine o Ape i totonu o le taavale ma vaavaai atu i ai.
Sa ea a’e i luga le ulu o le tamaloa a o tuu atu i ai e Tenisi le ato. Sa oo ifo se ‘ata’ata lapoa i foliga o le tamaloa. Sa latou lululima ma amata ona talanoa. Sa ese lenei mea aua o le mea masani lava e tau leai ni faafesuiaiga.
Ina ua mavae ni nai minute, sa toe foi mai Tenisi i le taavale ma tatala le pito i tua.
“Pe o lelei mea uma?” Sa ou fesili ai.
“Ioe!” o lana tala lea. “O le a ou avatu ia te ia lo’u ofumafanafana faipulou. “E sili atu ona ia manaomia nai lo o a’u.”
Sa ou le magagana. O le ofumafanafana faipulou lenei e ese le manaia ma sa na’o ni nai taimi sa ofuina ai e Tenisi! Sa toe foi atu Tenisi i le tamaloa ma fesoasoani i ai e faamaulu le ofumafanafana faipulou. Sa matuai fiafia le tamaloa. Sa faaauau ona talanoa ia Tenisi ma le tamaloa.
Sa ou lagonaina le tatau ona ou feiloai atu i lenei tamaloa. Sa ou tatalaina la’u faitotoa, ma sa mulimuli mai ai ma Ape. Sa ataata Tenisi ao ma oo atu, ma sa ia faailoa atu i ma’ua i le tamaloa. Sa faalala atu i ai lo’u lima ma fesili mo lona suafa.
Sa ia tago mai i lo’u lima, ma ataata malie, ma tali mai, o “Jesús.”
Sa faaauau ona matou talanoa, ae ou te le’i toe lagonaina le tele o lena talanoaga. Sa ou mafaufau pea lava i le taua o le suafa o lenei tamaloa pele: Jesús—o le suafa o lo tatou Faaola. O le taimi lea, sa ou manatua ai le aoaoga a le Faaola: “Aua na faia e outou i le tasi o e aupito itiiti o ou uso nei, o a’u lea na outou faia i ai” (Mataio 25:40). O lena aafiaga ua faavavau ona suia ai a’u.