Lelei Teisi Atu Nai Lo Ananafi
E alaala le tusitala i Salta, Atenitina.
E tatau ona faaauau pea ona matou ola i le talalelei. O le auala lena e mafai ona toe avea ai Sergio ma ma tama.
Ata na tusia e Suzanne Simmons
Na toeitiiti atoa le tausaga talu ona alu Sergio [i le misiona] ae valaau mai lana peresitene o le misiona. O ia o le ma atalii e toatasi, ma o ia le tagata muamua o le ma fanau e faia se misiona talai. Sa ma mitamita ma lo’u toalua o Liliana ia te ia, ma le faataitaiga sa ia faia mo ona tuafafine e toalua.
Sa i ai ia Sergio se uiga lea sa ma iloa ai o le a avea o ia ma se faifeautalai lelei. O ia o se taitai moni lava, sa fiafia ma faamaoni, ma e mafai ona ia uunaia isi.
Sa le’i afaina ia te ia, pe o sea tagata o se tagata o le Ekalesia—sa ia faauo atu i tagata uma lava. Ma a ula atu isi ia te ia ona o le avea ma se uso o le Au Paia o Aso e Gata Ai, na te taliaina o se tala malie lelei ma e seasea lava ita ai.
Sa ma fiafia lava ina ua maua le valaauga o le misiona a Sergio i le Misiona a Peru Chiclayo. Sa amata lana auaunaga i le aso 20 o Novema, 2013. Na fiafia o ia i lana misiona. I le taimi muamua, sa faigofie ona tusi atu ia te ia. Ae a o mavae atu masina, sa ou manaomia se taimi tele e mafaufau ai i ana tusi ma tali atu i lona tuputupu a’e faaleagaga.
Ma te le’i popole ia Sergio. Sa ma manatu, o totonu o le misiona o le nofoaga aupito saogalemu lea e mafai ona i ai o ia. Sa valaau mai lana peresitene o le misiona i le aso 7 o Oketopa 2014.
Matou te Le’i Lagonaina lava le Tuua Na’o i Matou
Sa ta’u mai e le peresitene o le misiona ia i ma’ua, sa aoao e Sergio ma lana soa ni tagata sailiili e uiga i le malumalu ma aiga e faavavau. Ina ua uma lea, sa fai e Sergio le tatalo faaiu, sa taofi, ma faafuasei ai ona le malamalama, ma pau ai i le fola. Sa fai sona faamanuiaga ma sa faananati atu ai i le falemai. Sa faaalia e fomai sa mafatia o ia i le sao o le toto i le faiai. Sa latou taumafai ae sa le’i manuia e faate’i o ia.
O le tala fou sa faatumulia ai i ma’ua i le faanoanoa tele. E ui lava i lo ma’ua faavauvau, ae sa tatau ona ma malaga atu ma Liliana i Peru e toe aumai le tino o Sergio ma ana meatotino. Sa faigata ona faasagatonu o ma mafaufau, o lea sa ma faafetai ai ona sa i ai se tasi mai le Ekalesia—mai le taimi sa ma tuua ai lo matou aiga seia oo ina ma toe foi mai—sa i ai lava iina e fesoasoani mai ia i ma’ua. Sa matou maua foi le fesoasoani mai le Agaga Paia, o le sa faamafanafanaina i matou ma fesoasoani ia matou tumau pea. Matou te le’i lagonaina lava se tuua na’o i matou.
E faigata tele ona maua le agaga faafetai i taimi o faalavelave, ae ou te faafetai mo le alofa mutimutivale o le Alii na i ai i le maliu o Sergio. E maliu o ia, o o’u auauna atu o se epikopo, o Liliana sa faiaoga i le seminare, ae o le ma afafine o Ximena sa auauna atu o se peresitene o Tamaitai Talavou o le uarota. Sa matou pisi e auauna atu ma alofa atu i isi, lea sa faamausaliina ai i matou i le talalelei. Afai sa tatau ona tuua i matou e Sergio, o le a le aunoa ona ou faafetai ona na ave o ia e le Tama Faalelagi a o matou malolosi i le faatuatua.
Ou te faafetai foi ona na tuua e Sergio lenei olaga a o auauna atu i le Alii ma a o “auauna atu i [ona] uso a tagata” (Mosaea 2:17). Na fetalai mai le Alii, “O le a le tofo i le oti i latou o e e oti ia te a’u, aua o le a suamalie ia te i latou” (MF&F 42:46).
Sa tuuina mai ia te au e le Agaga Paia sina faatepaga o le mea atonu na onosaia e le Tama Faalelagi ina ua maliu Lona Alo e Toatasi mo i tatou. Sa ou iloaina sa le’i i ai ma sa’u aia e ita ai i le Atua. Na silafia e le Tama oi le Lagi le tulaga sa ou oo i ai. Sa oo mai i o’u luga se filemu lea sa mafai ai ona ou taliaina Lona finagalo ma le taimi o le maliu o Sergio. Sa oo foi ma lagonaina e Liliana lea lagona e tasi.
“Upu Faamafanafana”
Sa faamauina lo matou aiga i le malumalu i le 2005, a o laiti lava Sergio ma Ximena. O Ruta sa fanau i totonu o le feagaiga i se taimi e le’i mamao ane. A o le’i alu Sergio i lana misiona, sa ia papatisoina ai o ia.
O le tolu o aso talu ona mavae lona maliu, sa miti ai Ruta ia Sergio. O le po lea o lona aso fanau e iva ai ona tausaga. Sa miti Ruta sa laua uulima ma savalivali i le aso atoa ma sa ia fai mai ni upu faamafanafana ia te ia.
Sa latalata tele Ruta ma Ximena ia Sergio, ma ua la misia tele o ia. O loo maua pea e Ruta le mafanafana mai le manatuaina o lana miti.
O se tasi o aso a o matou tilotilo i meatotino a Sergio, sa ma tau ai ma Liliana i lana api o fuafuaga i le misiona. Sa ma maitauina, i luga o itulau taitasi i aso taitasi, sa tusia ai e Sergio le faaupuga, “Ia lelei teisi atu nai lo ananafi.”
E le’i toe o ese lava na upu ma a’u. Ua latou faamanatu mai ia te a’u, e tatau ona faaauau pea ona matou ola i le talalelei. O le auala lena e mafai ona matou faatasi ai o se aiga pe a mavae le olaga lenei. O le auala lena e mafai ona toe avea ai Sergio ma ma tama.
A o tatou uia taimi faigata, o le a fesoasoani le Alii ia i tatou. Ou te iloa e moni lena mea, e pei lava ona ou iloa e moni Ana folafolaga. O lea matou te pipiimau ai i le talalelei, ma matou mulimuli i le faataitaiga a Sergio. Matou te taumafai ia lelei teisi atu i aso taitasi.