Na o Polokalama Faakomepiuta
Talai Mana Faateleina i Mataupu Aoaoina Fou
O le 2019 e aumaia ai suiga tele i le Aoga Sa
Vaai faalemafaufau faapea ua tuuina atu ia te oe le mana faateleina i lou olaga—o le mana e suia ai, e faia ai ni suiga lelei i lou olaga, e faatoilalo ai faafitauli o siomia ai oe. O lena mana—o le mana o le Atua—sa avanoa lava e le aunoa e ala i Lana afioga, ae o suiga fou i le Aoga Sa ma le Peraimeri e tatau ona fesoasoani ia i tatou e tatala ai lena mana i o tatou olaga i aso taitasi.
O a’u o Makesi, o se talavou matua ma o a’u o se tasi o tagata tusitusi o le gaoioiga tamua fou Sau, Mulimuli Mai ia te A’u mo le aiga, Aoga Sa ma le Peraimeri. Ua faamanuiaina a’u e fesoasoani e tusi le Sau, Mulimuli Mai ia te A’u, ma ua ou vaaia le eseesega, ma le mana, lea e mafai ona faia e suesuega sili ona lelei o tusitusiga paia i le olaga o se tagata—e fitoitonu ia te a’u lava.
O le taimi muamua lava na faaali mai ai ia te a’u le gaoioiga tamua fou o le Sau, Mulimuli Mai ia te A’u sa ou le mautinoa po o le a lo’u mafaufau i ai. O nisi taimi e mafai ona avea o se tauiviga moni le maua o se taimi e faitau ai a’u tusitusiga paia i aso uma—e ui ina ou lagonaina i taimi uma le eseesega ma iloa ia faamanuiaga ou te maua pe a ou faitauina e le aunoa. (E i ai se isi tagata i le vaega “o le faitau o se fuaiupu e tasi ona agai atu loa lea e moe?”) Ae o le suesue moni i tusitusiga paia a o fesoasoani ai e tusitusi nei anomea ua aoaoina ai a’u i le taua o le (1) e le gata i le tuuina e a’u lava o le taimi ia lava ai le suesueina o tusitusiga paia ae (2) ia mafai moni ai ona ou maua faaaliga, faaaliga manaia lava, mo a’u lava pe a ou taumafai moni ia maua le Agaga pe a ou suesue.
O le galue ai i le gaoioiga tamua fou o le Sau, Mulimuli Mai ia te A’u ua tuuina mai ai ia te a’u le avanoa tulaga ese ia faaleleia atili ai i le suesueina ma le mauaina o upumoni i a’u tusitusiga paia mo la’u galuega. Ma e ui o le a le maua e le anoano o le autalavou matutua ia lava avanoa faapea, ou te talitonu o le a faia e le Sau, Mulimuli Mai ia te A’u lena mea mo i tatou taitoatasi.
I fuafuaga uma lava ua uunaia ai i tatou e faitau tusitusiga paia mo i tatou lava ma faamaumau o tatou manatu, fesoasoani i ai ma ni manatu laiti faaleaoaoga faavae o aoao mai e uiga i mataupu faavae i fuaiupu, ma valaaulia i tatou e fesili ifo ia i tatou lava ni fesili e uiga i mea ua tatou aoaoina. O lenei auala faigofie o le faitauina o tusitusiga paia, e fesoasoani tatou te aoao atili ai e uiga i autu tatou te fiafia i ai ma fesili ifo ai ia i tatou lava ni fesili e fesoasoani tatou te mafaufau loloto ai i na autu. Ae faatasi ai ma lenei gaoioiga tamua, o loo faia foi lenei mea e isi tagata uma. O lena faiga, pe a outou potopoto faatasi, e mafai ona outou talanoa i upumoni o le talalelei ma mataupu faavae na aumai ai se eseesega ia te oe, ma e mafai foi ona faia e isi lena mea e tasi—e aumaia faatasi ai outou i le tou tulitulimatagauina o le sini tupito o tagata uma: ia avea atili e pei o Iesu Keriso.
O le amataina o se masani fou o le suesueina o tusitusiga paia o se faagasologa, ma e mafai ona faigata lona amataina. Ae e mafai e Iesu Keriso ona fesoasoani ia te oe i lenei mea e pei lava ona mafai ona Ia fesoasoani i soo se isi lava mea. Afai o loo e tauivi e amataina po o le faaauauina o se masani o le faitauina ma le filiga o tusitusiga paia, ia mautinoa ia [e] liliu atu ia te Ia. A o e faia lea mea, o le a faapea ona faamanuiaina ai oe ma isi o loo siomia oe i se naunautaiga malosi atu e faitau i Ana afioga.