O le Meaalofa o le Kerisimasi a Tala
E alaala le tusitala i Colorado, ISA.
Sa fetilofa’i solo Tala i le fale o le faatoaga ma sa faafuasei ona ia maua se manatu.
“A i ai se galuega e fai, ia fai ma se ‘ata’ata. Fai faasili nai lo mea ua fai atu e te faia ma alu i le maila lona lua” (Children’s Songbook, 167).
Sa tete Tala ao tulei atu lana uila e faasaga i le savili. “Tuai ona ou oo i le fale ou te faamafanafana ai,” o ona mafaufauga ia. “Ma e le mafai ona ou faatali etalai meaalofa o le Kerisimasi!”
Sa vave teisi ona ala o ia i le taeao lea e kiliva nusipepa. A o ia tuleia lana uila i luga o le aega maualuga e alu atu ai i le fale, sa mafaufau o ia i pani tinamoni o le Kerisimasi a Tina e fai i le fale. O le a matuai manaia lava lo latou tofo. Na toetoe lava a mafai ona ia tofoina le kulimi suamalie.
Kulimi! Sa faataupepe tauau o Tala. Na galo ia te ia ona tatau susu o povi ma isi feau sa tatau ona ia faia. Tusa lava poo le Kerisimasi.
Sa faatu e Tala lana uila i luma o le fale. Sa mili i laua ma lona uso e vaai po o ai e mafai ona muamua uma le tufaga o ana pepa. Sa le’i vaai o ia i le uila a lona uso, o lea la na manumalo ai Tala!
Ae na pau le faafitauli i le manumalo o lea e tatau ona faatali mo lona uso ona faatoa talai lea o meaalofa. Ona la toe foi ai lea i fafo e fai ia feau. Sa moomoo Tala e mafai ona nofo pea i totonu ma fiafia ai i le Kerisimasi.
“E mafai ona fai a’u feau i le taimi lenei,” o mafaufauga ia o Tala. “Ona ou le toe sau ai lea i fafo i le malulu.” Sa telea’i atu o ia i le fale o le faatoaga.
Ao ia aumaia se pakete ma saofai i lalo e tatau susu o le povi, sa fetilofa’i solo Tala. Sa manaomia ona fai uma lava o isi feau. Ona oso ae lea o sona manatu. Afai na te faia uma ia feau, e mafai ona ia faateia lona aiga ma mafai ona latou faaaluina faatasi le taimi atoa e totoe o le taeao o le Kerisimasi. O le a avea ma meaalofa sili lava o le Kerisimasi!
Sa faanatinati loa Tala i le tatauina o susu o povi. Ona ia faamamaina lea o le fale o le faatoaga, fafaga moa, ma ao fuamoa. Sa ‘ata’ata o ia a o mafaufau o le a tetei nei lo latou aiga.
Na toe foi atu Tala i le fale. Sa autilo atu o ia i totonu o le faitotoa e vaai pe sa i ai se tasi iina. Ona ia tolotolo atu loa lea i totonu o le umukuka. Na faatoa uma lava ona ia tuuina le susu ma fuamoa i totonu o le pusaisa ae savali mai loa Tina i totonu.
“Matua’i lelei, o lo o e i le fale,” o le tala lea a Tina, ma fusi atu o ia. “Na amata ona matou mafaufau po o fea o e i ai.”
Sa fesoasoani atu tina ia te ia e aveese lona ofu faatimu. Ina ua vaai mai uso ma tuafafine o Tala ia te ia, sa latou alalaga, “ua i le fale Tala! Sei o tatou talai meaalofa!” Sa lolofi atu tagata uma faataamilo i le laau Kerisimasi ma faatalitali mo Tama e tufatufa mai meaalofa. Sa fiafia Tala e matamata atu a o fefaasoaai e tagata uma a latou oa.
“Ua lelei!” Na fai mai ai Tama. “O le taimi lenei e fai ai feau. Ae o le mea muamua, ou te manatu tatou te manaomia se vai suamalie ma ni pani tinamoni.”
Sa savali atu Tama i le umukuka ma tatala le pusaaisa. Sa tu o ia ma sioa.
“Ia, sei vaaia i ai!” Na fai mai ai Tama. “O lea ua tumu le sioki susu, ma fuamoa ia ua uma ona aoina mai! Mata o ai na faia lea mea?”
Sa toe sau Tama i totonu o le potu malolo. Sa taumafai lava Tala e nana lana ‘ata’ata.
“O e iloa se mea e uiga i lenei mea, Tala? Sa fai atu ai Tama ma ‘ata’ata foi o ia. “E foliga mai ua uma ona fai a tatou feau.”
“Manuia le Kerisimasi!” Sa alaga atu ai Tala.
Sa tuu e Tama lona lima e faauouo ai Tala. “Faafetai lava, atalii. E ese lou magafagafa. Atonu o le tatou Kerisimasi sili lava lenei ua i ai!”
Sa ataata Tala. Ua uma lava ona ia iloa o lana Kerisimasi sili lava lea.