Na o Polokalama Faakomepiuta
O Le Mafuaaga Ua Ou Le Toe Fesili Ai “Aisea?” i le mavae ai o le Maliu o Loʼu Tuagane
E alaala le tusitala i Salta, Atenitina.
E ui lava e le o faatasi o ia ma au i le tino, o loo ou lagonaina pea le faatasi mai o loʼu tuagane.
Ina ua ou maua le tala faapea o lou tuagane, o Sergio, ua maliu, sa ou i ai i lou potu o loo suesue ao faitauina e Tina imeli ia faatoa ia tusia mai ia i matou i le aso ua mavae. Na ia tau maia ia i matou sa fiafia o ia e auauna atu i se misiona i Chiclayo, Peru, ma avea o se sui o Iesu Keriso. Na ia tau mai ia i matou lona alofa ma le tele naunau o le fiafia lea na le taofia ai o matou ataata fiafia.
I ni nai minute ae lei maua le valaau mai i lana peresitene o le misiona lea na tuuina mai ia i matou le tala faavauvau, sa ma faalogologo ma lou tina i se pese e fiafia lava i ai lou tuagane. Na faafuasei lava ona faatumuina le potu atoa i se lagona malosi o le filemu. Sa matua malosi lava le Agaga. Na iu lava ina maligi o ma loimata ona o le mafanafana ma le lagona na ufitia ai i maua na matuai moni lava ma e leai ni upu e mafai ona faamatalaina. Ma i le na o le 10 lava minute mulimuli ane, ae tatagi le telefoni.
Na ma faalogologo atu ma Tina ao tali atu lou tama i fesili uma lava na fesiligia ai o ia. Na ma iloaina lava afai ua valaau mai le peresitene o le misiona, ua tupu se mea matuia. Ona ma faalogo atu lea ua tali atu Tama, “Masalo e i ai se mea o sese.” E le mafai ona tupu lenei mea.”
Na ou fesili atu po o le a le mea ua tupu. Ona tali mai lea o Tama ia i maua, o ona mata ua tumu i loimata, ma lona leo ua gogolo: “Ua oti Sergio Laitiiti.”
Na ou tagi lotulotu lava, ma fesili pea lava pea, “Aisea, Tama Faalelagi? Aisea ua matou oo ai i lenei mea? Pe le o le misiona ea le nofoaga e tatau ona sili le saogalemu i le lalolagi?”
E ui lava i le i ai o le talalelei i o matou olaga ma le iloaina o le fuafuaga o le fiafia, e foliga mai na leai se fofo mo lo matou tiga. Na ou iloa ua na o lo tatou Tama Faalelagi lava e mafai ona fesoasoani ia i matou i o matou tulaga.
O lena po, i se minute o le malamalama, na ou tamoe ai e sue au tusitusiga paia aua o se fuaitau mai le tusi a Alema na oo mai i lou mafaufau faapea na matou faatasi ma lou tuagane mo ni nai vaiaso ae lei maliu. O loo faapea mai, “E, pe ana o au o se agelu, ma mafai ona ou maua le moomooga o loʼu loto, ina ia mafai ona ou alu atu ma tautala atu. … Po ua ou alaga atu i agaga uma taitoatasi, i se leo e pei o le faititili, le salamo ma le fuafuaga o le togiolaina. … Ae faauta, o au o se tagata, ma ua ou agasala i loʼu manao; … E le tatau ona ou lagā i luga i ou manaʼo le poloai mausali a le Atua amiotonu, ona ua ou iloa e tuu mai e ia i tagata e tusa ma o latou manao, pe mo le oti pe mo le ola” (Alema 29:1–4).
Ona ou malamalama lea na manao lou tuagane ia matou iloa o loo ola faatasi ma i matou i le agaga, ae ua ia tuua lenei olaga ona ua valaaulia o ia e talai atu i le lalolagi o agaga. Na ia manao ia matou iloa o lona toesea o le a pei o le faaumiina o lona valaauga faamisiona—ua na o se isi siitaga, aua e fiafia o ia i le avea ai o se faifeautalai, ma o manaoga sili o lona loto ua faataunuuina: ia avea “o se agelu” a le Alii. E mafai ona ia tuuto o ia lava atoatoa i le galuega a le Alii, ia folafola atu i agaga uma taitoatasi, “le salamo ma le fuafuaga o le faaolataga,” le fuafuaga o le fiafia.
E ui lava e le o i ai o ia faatasi ma au faaletino, o loo ou lagonaina pea le faatasi mai o lou tuagane. Ou te le o toe fesili,“Aisea, Tama Faalelagi?” aua ua manino ma mautinoa le tali: “Na afio ifo le Atalii o le Tagata i lalo o i latou uma. Ua sili atu ea oe ia te ia?” (Mataupu Faavae ma Feagaiga 122:8).
Ua matou liligi atu o matou loto i le Atua, o se aiga, ma ua matou maua le agaga faafetai loloto i le talalelei. Ua matou iloa o lenei olaga o se olaga faataitai ma o o tatou agaga e faavavau.
E ala atu i le faamoemoe o le alofa e le iu o lo tatou Faaola o Iesu Keriso ma lo tatou Tama Faalelagi, ua matou iloa ai e mafaia mea uma lava. O lea la, e ui lava e le o atoatoa pea lo tatou malamalama ma e le mafai ona tatou vaai nei ia i latou uma lava tatou te alolofa faapelepele i ai, faafetai i Lona soifuaga, ua matou iloa ai o lenei vaega ua na o se tulaga le tumau, ma faaletino.
Ua na o le fa nei tausaga talu ona maliu Sergio. Ou te taliaina faapea e oo mai nei lava o aso faanoanoa ma loimata o loo vaaia pea mai i lea taimi i lea taimi, ona ou te misia le faatasi mai o loʼu tuagane pele. Ae ua taumasuasua lo’u agaga i le loto faafetai pe a ou manatua o lenei tulaga ua na o se vaega le tumau. O lou faamoemoe e faapea ia iu lava, i se aso, o le a matou toe feiloai ma toefaatasia e faavavau ma lo matou aiga fiafia, e faavavau ma faavavau lava. E sili atu lenei mea nai lo soo se ituaiga o tiga lava ua ou tauaveina nei.