Na’o le Polokalama Faafuainumera
O Mea e 3 ia Manatua Pe a E Lagona Le Pei E te Le Atoatoa
E alaala le tusitala i New Mexico, ISA.
Tatou te mananao uma lava ia lelei teisi atu, ae e faigata ona iloa po o fea e amata ai.
E masani ona ou mafaufau pe o fetaui a’u taumafaiga ina ia usiusitai ma mea e foliga mai i nisi o taimi o ni tulaga faatonuina faigatae atoatoa ai. Ou te mafaufau i taimi uma i mea e mafai ona lelei atu ona ou faia, e pei o le faateleina o le taimi e faitau ai a’u tusitusiga paia po o le faataitaia foi o le lotopulea pe a ou pasia le aisa kulimi i le vaega o meaai ua faamalo i le aisa.
Atonu o nei mea e le foliga mai o ni faafitauli tetele, ae e mafai faapefea ona ou iloa le auala e faaleleia atili ai, ae maise lava pe afai o le aisa kulimi e iai le sukalati e le o lo’u faafitauli aupito faigata lea? Ae o le a foi le eseesega moni o le a faia e le usiusitai faateleina i lo’u olaga?
O le mulimuli ia Iesu Keriso e le faapea na’o le alualu i luma i nisi o taimi ae e faatatau tonu lava i le alualu i luma i aso taitasi. Na aoao mai Elder Larry R. Lawrence o le Fitugafulu e faapea, “Sa tatou o mai [i le lalolagi] e aoao ma faaleleia seia faasolosolo lava ina tatou faapaiaina pe faaatoatoaina ia Keriso. …
“… A o tatou faimalaga i le ala lauitiiti ma le vaapiapi, e faaauau pea ona luiina tatou e le Agaga ia sili atu ma ia faaauau pea i luma.”1
O taumafaiga uma tatou te taumafai ia lelei teisi ai, e alualu ai i luma o tatou olaga. O auala nei e tolu sa fesoasoani ia te a’u ia lelei teisi ai i aso taitasi.
1. Salamo i Aso Taitasi
E pei lava ona le mafai ona tatou ausia le atoatoa e aunoa ma le Faaola ma Lana Togiola, e le mafai foi ona faaleleia lo tatou usiusitai e aunoa ma le salamo. Na aoao mai Stephen W.Owen, o le Peresitene Aoao o Alii Talavou, “E mafai ona tatou taumafai i tatou lava e suia la tatou amio, peitai ua na o le Faaola lava e mafai ona aveesea o tatou pisia ma sii ese a tatou avega, ma mafai ai e i tatou ona tulitulimatagauina ma le mautinoa le ala o le usiusitai ma le malosiaga.”2 Afai e te vaaia se le atoatoa ia te oe lava lea e te manao ia suia, ia ave atu i le Alii i le tatalo.
2. Faamuamua Mea e Sili Ona Taua ma le Agaga
O le faailoaina o o’u lava vaivaiga e mafai ona lofituina—e masani ona ou le iloa po o fea e amata ai. E mafai ona tatou tatalo e iloa ai mea e manaomia ona tatou suia i le taimi lenei. Na aoao mai Elder Lawrence, “E tuuina mai moni lava e le Agaga Paia fautuaga talafeagai. O ia o se soa faamaoni atoatoa ma e ta’u mai ia i tatou mea e lē iloaina e se isi tagata pe o maua foi le lototoa e ta’u mai ai.”3 E ui tatou te tau le faatali mo uunaiga ia lelei ai, e mafai ona fesoasoani le Agaga ia tatou faamuamua mea e sili ona taua.
3: Ia Faateleina le Talitonu Faaleagaga
Ou te maofa i taimi uma i le anoano o mea ua faamanuiaina ai a’u e le Tama Faalelagi ao ou taumafai e tausi ia poloaiga. Ou te lagonaina le matuai faateleina o le filemu ma le talitonu i soo se taimi ou te siitia ai le fua i se maualuga teisi atu. Sa folafola mai e Peresitene Russell M. Nelsona, “A o faaauau pea ona e usiusitai, … o le a tuuina atu ia te oe le poto ma le malamalama o loo e sailia. O faamanuiaga uma o loo i ai i le Alii mo oe—e oo lava i vavega—o le a mulimuli mai.”4 O le usiusitai faateleina o le a le gata ina e maua ai ni lagona lelei sili e uiga ia te oe lava ma au faaiuga, ae o le a tatala ai foi nisi avanoa mo le Alii e faamanuia ai oe i auala atonu e te le’i faamoemoeina.
Ua silafia e le Tama Faalelagi o tatou loto, ma e Na te silafiaina taumafaiga uma tatou te faia ina ia usiusitai ai. E le o faamoemoe mai o Ia ia tatou atoatoa taeao. O le taumafai ia lelei teisi atu i aso taitasi—pe o le tipi o le ai i meaai suamalie tuuaisa, po o le faaaluina o le taimi tele i tusitusiga paia—o le a fesoasoani tatou te iloa ai, o vaega uma o le alualu i luma e taua ma e mafai ona ausia.