Savali a Taitai o le Eria
Lutofu le ‘Aila isu-Mumu
O le olioli moni o le Kerisimasi o le tuuina atu lea o lo tatou alolofa ma meaalofa ia Keriso. O le au makoi ia na o mai e ifo atu i le pepe o Iesu na latou aumaia ma i latou le auro, pulu lipano ma le pulu muro. O nei meaalofa e i ai a latou uiga faafaatusa.
O le auro, le uamea taua, sa avea lea o se meaalofa talafeagai, aua o le auro o le faatusa lea o le tulaga tautupu ma le mamalu, o le a avea Iesu ma “Tupu o Tupu, ma Alii o Alii”.1
O le pulu lipano sa faaaoga mo sauniga faaositaulaga; o se faatusa o le atua, o le meaalofa o le pulu lipano ua faatusa i ai le matafaioi a Keriso o le Faitaulaga Sili maoae, o le tamai mamoe e osi ai taulaga, o le puluvaga ma le Alo o le Atua.
O le pulu muro sa faaaoga o se suauu paia, mo le faamamaina ma e tele ina faaaoga i le uuina ai [o tino maliu]. O le meaalofa o le pulu muro e mafai ona avea ma faatusa i Ana sauniuniga mo Lona maliu ma le toetu ma Lana matafaioi o se foma’i, e le gata i le taimi o Lana galuega talai ma o se taunuuga o Lana Togiola.2
Ou te mafaufau lava po o a ni meaalofa tatou te avatu ia Keriso.
O a ni meaalofa sili e mafai ona tatou avatua i le Faaola ma o a ni meaalofa sili e mafai ona tatou avatua i isi?
O nisi Kerisimasi, mo isi, e mafai ona ese nai lo [Kerisimasi] tatou te faia.
O LE TALA LENEI IA LUTOFU3
O se tamalii e suafa ia Bob May, faanoanoa ma loto mafatia, na sioa atu i fafo o le faamalama o lona potu mautotogi saviligia i le po malulu ia Tesema. Sa nofo filemu lona afafine e fa tausaga le matua, o Barbara, i luga o ona vae ma tagi masūsū.
O le toalua o Bob, o Evelyn, sa ma’i tigaina ma sa iloa lelei e Bob o le a maliu o ia. Sa lei malamalama Barbara laitiiti pe aisea e le mafai ai ona toe sau lona tina i le fale. Sa tilotilo atu Barbara i mata o lona tama ma fesili atu, “Aisea e le pei ai tina e pei o tina o isi tagata uma?”
Na faamalo le auvae o Bob, ma amata ona loimāta ona mata. O lana fesili na aumai ai ni galu o le faanoanoa, ae o le ita foi. Sa avea lea o se tala o le olaga o Bob. E tatau lava ona ese le olaga mo Bob. Na laitiiti lona fuaitino ao tamaitiiti, o se mea masani le faasaua o isi tamaiti ia Bob. Sa laitiiti tele o ia e tauva ai i ni taaloga; e masani ona faifai o ia i ni igoa na te le fia manatuaina.
Mai lava i le laitiiti, sa ese lava Bob ma e foliga mai sa lei taliaina o ia [e isi tamaiti]. E lei maea le kolisi a Bob, faaipoipo atu i lana ava pele ma na faafetai i le mauaina o se galuega o se lolomitusi i le Montgomery Ward i le vaitaimi o le pau tele o le tamaoaiga. Ona faamanuiaina lea o ia i sona afafine laitiiti. Peitai e lei umi lona fiafia.
O le Kanesa a Evelyn na aveesea uma ai a latou teugatupe ma sa faamalosia ai le nonofo o Bob ma lona afafine i se fale mautotogi e lua potumoe i nofoaga le taualoa i Sikako. Na maliu Evelyn i ni nai aso ao lumanai le Kerisimasi i le 1938. Sa tauivi Bob e tuuina atu se lagona faamoemoe i lona afafine, lea e oo lava i se meaalofa o le Kerisimasi sa le mafai ona ia faatauina i ai. Peitai afai na te le mafai ona ia faatauina se meaalofa sa ia naunau e faia se meaalofa—o lea sa ia faia ai se tusi o tala.
Na fatuina e Bob se manu i lona lava mafaufau ma faamatala atu ia Barbara laitiiti se tala o se manu e tuuina atu ai ia te ia le faamafanafanaga ma le faamoemoe. Sa faamatala ma toe faamatala e Bob le tala, sa ia faateleina [ma faaopoopo i ai i taimi uma] e faamatala ai. O ai le manu? O ai na faatatau i ai le tala?
O le tala na fatuina e Bob o lona lava talaaga i se ituaiga tala faafagogo. O le manu na ia fatuina o se tasi e le amanaiaina e tai pei lava o ia. O se tamai ‘aila e igoa ia Lutofu lea na i ai sona isu lapoa iila. Na fetaui lelei le faamaeaina e Bob o le tusi ma le tuuina atu ai i lona afafine i le aso o le Kerisimasi. Peitai e lei gata ai iina le tala. . . .
Na faalogo le pule sili o Montgomery Ward e uiga i le tamai tusi o tala ma sa ia ofoina atu ia Bob se tau itiiti lava e faatauina ai aia tatau e lolomi ai le tusi. Sa lolomi e Wards le tusi, “Lutofu le ‘Aila isu-Mumu” ma faatauina atu le silia ma le 6 miliona kopi.
I le 1947 na talosaga ai se fale lomitusi tele e faatauina aia tatau mai le Wards, e lolomi ai se lomiga toe faafouina o le tusi. I se uiga faaalia o le agalelei, na toe faafoi atu ai e le Pule Faatonusili a le Wards ia aia tatau uma o le anaina [o le tusi] ia Bob May. Na avea le tusi ma tusi sili ona alumia. Na sosoo ai ma le faia o ni tuutuuga i le gaosiga o le tele o meataalo ma i le taimi lea, ua toe faaipoipo Bob May ma ua faatupulaia lona aiga, ua mauoa mai le tala sa ia fatuina e faamafanafana ai lona afafine faavauvau. Ae e lei gata ai iina le tala. . . .
Na faia e le uso faaletulafono o Bob, o Johnny Marks, se pese ia Lutofu; sa usuina ma pueina e le alii kaupoe o Gene Autry. Na faalauiloaina i le 1949 le pese “Lutofu le ‘Aila isu-Mumu” ma avea ma pese sili ona alumia ma tele kopi na faatauina nai lo se isi lava pese Kerisimasi vagana ai le pese “Kerisimasi Paepae.”
O le meaalofa o le alofa na fatuina e Bob mo lona afafine i le taimi ua leva na toefoi mai e faamanuiaina ma toe faamanuiaina ai o ia. Na aoaoina e Bob se lesona, e pei lava o lana uo pele o Lutofu, o le tulaga ese e le o se mea leaga . . . o le mea moni o le ese e mafai moni lava ona avea ma se faamanuiaga. O le meaalofa o le alofa o le aano moni lea o le tala.
E pei ona saunoa mai Elder Neal A. Maxwell: “O le Atua o le lalolagi atoa e aafia moni lava i o tatou tamai lalolagi o aafiaga faaletagata. I le lotolotoi o Ana puleaga tele, na te faateleina i tatou, silafia i tatou ma alofa ma le atoatoa ia i tatou.”4
I le avea ai o i tatou ma se aiga ua tatou faia mo le tele o tausaga se meaalofa faapitoa e tuu i lalo o le tatou laau Kerisimasi. O le tatou meaalofa lea ia Keriso; o le faia e tagata taitoatasi o lo tatou aiga o se folafolaga po o se tautinoga i le Faaola ma tuuina i se pusa ua afifiina faameaalofa ma tatalaina i Kerisimasi taitasi e vaai i ai po o le a se lelei sa tatou faia i le foai moni atu o se meaalofa ia Keriso.
I lenei Kerisimasi tau ina tatou avatu se meaalofa ia Keriso o le a faaalia ai lo tatou alolofa ma le tuuto atu ia te Ia.