“O A’u O Le Ola, O Loo Ola Lava”: Faailoga o Iesu Keriso i le Feagaiga Tuai
I lenei faamaumauga anamua faapitoa lava, e tatau ai ona sailia Iesu Keriso a le o lea, atonu e le mafai ona maua o Ia.
Malamalama ma le Upumoni, saunia e Simon Dewey
A o pupuni e Mose ona foliga, o fetalaiga alofa mutimutivale a le Alii na sau mai i le vao mu, atonu na tatagi ma ni siuleo o le faavavau: “Ua Ou matua vaai atu i le puapuaga o o’u nuu … ; ua ou iloa foi lo latou tiga;
“O lenei, ua Ou alu ifo ou te laveai mai ia te i latou. …
“Ua fai atu Mose i le Atua, Faauta, pe a a’u alu ifo i le fanauga a Isaraelu, ma a’u fai atu ia i latou, Ua auina mai au ia te outou e le Atua o o outou tama; ona latou fai mai lea ia te au, O ai ea lona igoa? Se a ea sa’u e fai atu ai ia te i latou?
“Ona fetalai mai lea o le Atua ia Mose, O A’u o le ola, o loo ola lava: ua ia fetalai mai foi, E te fai atu i le fanauga a Isaraelu, ia faapea, O A’u o le na auina mai a’u ia te outou” (Esoto 3:7–8, 13–14).
Sa lausilafia i Isaraelu anamua o le Alii o Ieova, sa faailoa atu e Iesu Keriso o le muai olaga o Ia lava o le punavai e tatau i Lona nuu ona tepa atu i ai mo le togiolaina. O le faitau afe o tausaga mulimuli ane, sa toe faamautu mai ai e Iesu Keriso toetu Lana folafolaga o le laveaiina i Isaraelu i onaponei i upu nei: “Ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou; ma o le a outou molimau atu Aʼu, o Iesu Keriso lava, o A’u o le Atalii o le Atua soifua, ma sa Ou i ai, ma o loo Ou i ai, ma o le a Ou alu atu” (MF&F 68:6; ua faaopoopo le faamamafa).
O tusitusiga paia, o upu o le ola, na fuafuaina e faasino atu ai le fanau a le Atua i augatupulaga uma ia Iesu Keriso mo le faasaoina mai le agasala ma le oti ma o tatou faafitauli uma faalelalolagi. Ua le ese lava ma le Feagaiga Tuai; e pei foi o voluma uma o tusitusiga paia, ua fuafuaina e liliu atu ai o tatou loto ma mafaufau i lo tatou Laveai, le Alii o Iesu Keriso. Ae i lenei faamaumauga anamua faapitoa lava, e tatau lava ona sailia o Ia a le o lea, atonu e le mafai ona maua o Ia.
Pe a saili mo Keriso i soo se tusi o tusitusiga paia, e fesoasoani le faamanatu e le aunoa ia i tatou lava o le mea o loo tatou sailia. O Iesu Keriso o le punavai o le ola! O faafitauli ogaoga o le oti faaleagaga ma le faaletino lea na oo mai ona o le Pau, o Keriso o le fofo lea e faavavau a Isaraelu. Na folafola mai e Liae, “Ua ofo atu e Ia o ia lava … e tali ai iuga o le tulafono” (2 Nifae 2:7; ua faaopoopo le faamamafa). O lena tali—o le Faaola o Isaraelu, o le “O A’u” silisili—lea tatou te sailia pe a tatou suesue i tusitusiga paia. Ae peitai, i totonu o le gagana faafatusolo ma e masani i le gagana o anamua o le Feagaiga Tuai, o faafitauli e faavavau—ma le fofo, o Iesu Keriso—e le mafai ona iloa gofie lava. E tusa lava, pe o loo i ai Iesu Keriso i le loloto o le laualuga, o faatalitali ai ina ia maua i faamatalaga i anamua.
Pe a tuu i lou mafaufau le suafa o le Alii sa faasoa mai ia Mose i le Mauga o Sinai—“O A’u”—ia mafaufau i le anoanoai o mea ua fai ai Iesu Keriso ia i latou o e tuu atu lo latou talitonuga ia te Ia. O faataitaiga nei o ni aoaoga faafaailoga mai le Feagaiga Tuai na fuafuaina ia liliu atu ai o tatou loto ma mafaufau i le Alii o Iesu Keriso mo le laveaiga.
O A’u … o le Tamai Mamoe sa Fasia mo Outou
Taulaga i Manuvaefa ma le Ofu Pa’u
A o le’i tutuliesea Atamu ma Eva mai le Faatoaga o Etena, sa faaoofu i laua e le Alii i pa’u o manu ina ia tuuina atu ai ni ufiufi mo i la’ua. I le Feagaiga Tuai, o le upu togiola, i ona tulaga eseese, e 81 taimi o loo vaaia ai. I le 73 o na taimi, o le upu Eperu na afua mai ai o le kaphar, o lona uiga moni o le “ia ufiufi.”
Ina ua mavae le tutulieseina o i laua mai le faatoaga, sa poloaiina Atamu ma Eva e avatu uluai manu o a laua lafu, mo se taulaga i le Alii. Sa faatonuina mulimuli ane i laua e se agelu e faapea, o lenei faiga sa avea ma “se faatusa o le taulaga a le Toatasi na Fanaua e le Tama” (Mose 5:7).
Sa faaauauina taulaga e faia i manu i lalo o le tulafono a Mose, faatasi ai ma le sauniga o le ufiufiina o i latou e auai i sauniga o le perisitua.
A tatou osifeagaiga ma le Alii ma maua Ana sauniga paia, o Lana togiola e ufiufi ai i tatou ina ia le toe oo i taunuuga uma o le Pau o Atamu. O Iesu Keriso o le Tamai Mamoe moni a le Atua o le sa ositaulagaina mo i tatou ina ia tatou le toe pagatia i taunuuga o le agasala ma le oti.
Kenese 3:21; 37:3; Esoto 40:14–15; Esekielu 16:1–12; Mataio 22:11–12; Kalatia 3:26–29; 1 Nifae 11:21, 32–33; Alema 34:14–16; Mose 5:5–8; 7:47
O A’u … o le Areto o le Ola
Manai
A o malaga atu Mose ma le fanauga a Isaraelu mai Aikupito agai atu i le nuu o le folafolaga, sa latou faalagolago i le alofa mutimutivale o le Alii mo le areto mo aso taitasi. Sa tuuina atu e le Alii ia i latou se “areto [suamalie] mai le lagi,” lea sa taua e tagata o le “Manai” (sa faaliliuina “O le a lenei mea?”). O i latou sa faaputua le areto i aso taitasi ma tumau faamaoni i le Alii ma Lana perofeta sa faaauau pea ona ola i le taualumaga o le latou faigamalaga i le vao.
O Iesu Keriso o le Areto o le Ola; sa afio mai o Ia i le lalolagi mai le lagi e aumai ia i tatou le ola i aso uma o la tatou faigamalaga i le olaga nei. A o tatou faaputua mai Ana afioga i aso uma, o le a tatou tofo i le suamalie ma le malosi lea e maua mai e ala ia te Ia i le taualumaga o le tatou faigamalaga i le tino.
Esoto 16:4, 12–21, 31; Teuteronome 8:2–3; Ioane 6:26–35, 48–58, 66–68; 3 Nifae 20:8
O A’u … o le Puna o le Vai Ola
Vai mai le Papa o Horepa
Ina ua fia feinu le fanauga a Isaraelu i le vao, sa liliu atu Mose i le Alii. Sa faatonuina Mose e ta se papa faapitoa i Horepa (Mauga o Sinai) i le tootoo na tuuina atu e le Alii ia te ia. Ina ua ia faia, sa tafe mai le vai mai le papa e tausi ai le ola mo le faitau miliona o tagata Isaraelu sa faimalaga.
O Iesu Keriso o le Papa o Isaraelu; ina ua sasaina o Ia i Kalevaria, sa tafe mai le toto mai Lona tino. O le toto o Keriso ua aumaia le ola ia i tatou! E mafai ona tatou maua le ola o loo maua i le toto togiola o Keriso a o tatou mulimuli i perofeta o e ua tuuina i ai ki e aumai ai le vaiola mai ia te Ia.
Esoto 17:1–6; Numera 20:8, 11; Ioane 4:10–15; 1 Korinito 10:1–4; MF&F 28:2
O A’u … o Lou Faamalolo
Gata o Siia’e i Luga o se Pou
O faigata o le latou faigamalaga, sa mafua ai ona faasea ma muimui le fanauga a Isaraelu i le perofeta ma le Alii. O se taunuuga la, sa faatagaina e le Alii ni gata oona e utia i latou, ma oo ai le oti i le toatele. Sa tatalo Mose i le Alii e aveese gata; nai lo o lena, sa tuuina mai e le Alii se auala mo tagata e le feoti ai pe a utia i latou. O le faatinoga sa manaomia ina ia latou malolo ai o le tilotilo atu lea i le gata apamemea lea sa faamau i luga o se pou.
O Iesu Keriso sa tuituia i se pou—o le satauro—ina ia mafai ona tatou vaai atu ia te Ia i o tatou mafatiaga ma ia le lofituina ai ia mafatiaga. E le o taimi uma e aveese ai e Iesu Keriso o tatou tofotofoga, ae i le avea ai ma o tatou Faamalolo, e mafai ona Ia aveesea mai ia i latou le ‘ona e ala i faamanuiaga o Lana Togiola.
Numera 21:4–9; Ioane 3:14–16; 1 Peteru 2:24; Alema 33:18–22; Helamana 8:14–15; 3 Nifae 27:13–15