Itulau o le Lotoifale
O Le Foai Atu i Isi o Se Meaalofa Lea Tatou te Avatu i le Alii
Na ou ola ae i Upolu i le nuu o Solaua. O la’u Uarota sa i ai o Sauniatu.
O le toa 14 [o tagata] i lo’u aiga sa faigata ai le mauaina o ni meaalofa. Ou te manatua a matou meaalofa o se mea faatauvaa, e pei o se paluni ma ni pepa lole e faasoa ma sa matou fiafia uma lava.
O le faatasi ai o se aiga o se meaalofa lea sa matou faasoaina. O le po ao lumanai le Kerisimasi matou te faatasi ai ma faasoa atu meaai, taaalo i taaloga e pei o le kirikiti, voli pe sisiva foi.
O le Kerisimasi o le taimi lea e tatau ai ona sili atu ona tatou alolofa ma naunau e tufa atu. O se taimi e alofa atu ai i le tasi ma le isi. E masani lava ona aoaoina i matou e o’u matua e tusa lava pe le lava meaai mo i matou e mafai lava ona tufa atu se vaega laitiiti ia i latou e le tagolima e faaalia ai lo matou alolofa ia Iesu Keriso. O le mea lena e finagalo i ai o Ia. O le meaalofa lena e mafai ona tatou tuuina atu ia te Ia.
O Kerisimasi taitasi e faia ai a matou tu masani faaKerisimasi. Matou te faatasitasi ma faia se tatalo ma talanoa i le uiga moni o le Kerisimasi. O se taimi faapitoa lea mo i matou. Ou te manatua ao o’u laitiiti i le aoaoina ai i le soifua mai o Iesu Keriso i se nofoaga maualalo; o se fale o manu e leai se moega ma e leai ni oa ae, o Ia o le Alo o le Atua. Sa ou aoaoina o oa e leai se uiga i le Atua.
E oo lava i le taimi nei, ou te iloa tatou te le manaomia ona mauoa e faamanatu ai le uiga moni o le Kerisimasi. O le mea e taua o le tatou faaalia lea o le alofa i le tasi ma le isi i soo se auala tatou te mafaia. Ou te faamautinoaina o loo matou faasoaina atu ma lo’u aiga a matou faamanuiaga ma aiga ma uo o loo siomiaina i matou. Soo se mea lava ua matou mauaina matou te faasoa atu, pe tele pe laitiiti.