Ko ʻEtau Tafaʻakí
Ko Hono Vahevahe ʻa e Fakakaukaú mo e Tohi ʻa Molomoná
Lolotonga ʻeku ngāue fakafaifekau ʻi ha kiʻi kolo ʻi Uēlesi, naʻá ma uiui mo hoku hoá ʻi ha hala naʻe lele hake ʻi he taha ʻo e ngaahi tafungofunga lahi ai. Ko ha ʻaho māfana ia ʻo e faʻahitaʻu māfaná. ʻI heʻema aʻu ki he tumutumu ʻo e tafungofungá, naʻe fakaʻofoʻofa ʻaupito, ko ia naʻá ma fakakaukau ai mo hoku hoá ke ma kiʻi mālōlō nounou ʻo mātā ʻa e mātangá mo fakatau ʻema manavá.
ʻI heʻeku toʻo hake ha foʻi moli mei heʻeku kató, naʻá ku sio ki ha fefine Siaina ʻoku lue hake he tafungofungá. ʻOku ʻikai ke u ʻilo hono ʻuhingá, ka naʻá ku taʻalo atu ki ai. Naʻá ne taʻataʻalo fiefia mai pea lue mai ʻo mau tangutu. Naʻá mau kamata talanoa, pea naʻá ne fakamatala naʻá ne haʻu ki he tafungofungá ke mātā hono fakaʻofoʻofá koeʻuhí naʻe fakamanatu ange ai kiate ia ʻa e ʻOtuá mo ʻEne ʻofa kiate iá. Naʻá ne toe vahevahe mai naʻá ne mateuteu ke foki ki Siaina mo e maʻu mai ha faingamālie ngāue ʻi Uēlesi. Naʻá ne tali ia, ʻi heʻene tui naʻe ʻomi ʻe he ʻOtuá ʻa e ngāue ko ʻení ʻi ha ʻuhinga naʻe ʻikai ke ne ʻiloʻi.
Hili pē ʻa e fuofua fetaulaki ko ʻení, naʻá ma kamata ke akoʻi ia ʻi he ʻapi ʻo ha taha ne toki papi ului pea mau vahevahe fakataha ha ngaahi momeniti fakalaumālie lahi. ʻOku ou tauhi loto ha taha ʻo e ngaahi momeniti ko iá. Naʻa ma foaki kiate ia ha tatau faka-Siaina ʻo e Tohi ʻa Molomoná mo ʻema fakamoʻoní kuo hiki ʻi he takafi muʻá. Naʻe fuʻu mālohi ʻaupito e Laumālié pea kamata ke ne tangi.
Naʻe ʻikai fuoloa mei ai, kuó u hiki au ki ha feituʻu ʻe taha. Meʻapangó, naʻe ʻikai lava ke u toe foki ki he feituʻu ko iá ki heʻene papitaisó, ka ʻe fakamālohia maʻu pē au ʻi heʻeku manatu ki heʻemau fuofua fetaulakí ʻi ha tafungofunga māʻolunga.
Suleki Peita, Siamane
Fakataha ʻo Taʻengata
“Ko e fāmilí ke taʻengata, palani ʻa e Tamai” (“Ko e Fāmilí ke Taʻengata,” Ngaahi Himí, fika 192). ʻOku ou saiʻia ʻi he foʻi hiva ko ʻení ʻa e Palaimelí, ʻa ia ʻokú ne akoʻi ʻe lava ke silaʻi ʻa e ngaahi fāmilí ke taʻengatá. Naʻá ku lotua ke hoko ʻeni ʻo moʻoni ki hoku fāmilí, tautautefito ʻi he hili e mālōlō ʻeku tangataʻeikí.
Naʻe tali ʻe he ʻEikí ʻeku lotú kimuí ni mai. Naʻe lava ke mau fononga mo ʻeku faʻeé, mo hoku ongo tuongaʻané, ki he Temipale Manila Filipainí ke mau sila fakataha mo ʻeku tamaí. Ko e fuofua taimi ia ne mau ʻi he temipalé fakataha ai, pea ʻoku ou kei manatuʻi pē ʻa e fiefia naʻá ku mamata ki ai ʻi he fofonga ʻo ʻeku faʻeé mo hoku ongo tuongaʻané. Naʻe ʻi ai ha fuʻu fiefia lahi ʻi ai.
ʻOku ou ʻilo ko e temipalé ko e fale ia ʻo e ʻEikí pea ʻoku maʻu ʻe kinautolu ʻi he temipalé ʻa e mafai totonu ke fakahoko ʻa e ngaahi ouau toputapú. ʻOku ou fakamālō koeʻuhí ko e ngaahi ouau ko ʻení, ʻe lava ai ke toe fakataha hoku fāmilí mo ʻeku tamaí. Talu mei heʻemau ō ki he temipalé, ʻoku mau feinga ke hoko ko ha fāmili mālohi ange pea fai e meʻa kotoa pē te mau lavá ke tauhi ʻemau ngaahi fuakavá kae lava ke mau fakataha ʻo taʻengata.
Kulisanitō Koloma, Filipaini