Ako fakataha fekauʻaki mo e Fuakava Foʻoú ʻi he taʻu ni!
Naʻe mei fēfē nai ʻa e mātā tonu ʻi hono papitaiso ʻa Sīsuú? ʻOku fakahā mai ʻe he Fuakava Foʻoú kiate kitautolu ʻo fekauʻaki mo e meʻa naʻe hoko ʻi he ʻaho toputapu ko iá.
“Pea toki haʻu ʻa Sīsū mei Kāleli ki Soatani kia Sione, ke papitaiso ʻiate ia.
“Pea kuo papitaiso ʻa Sīsū, naʻe ʻalu hake leva ia mei he vaí; pea vakai, kuo mavaeua ʻa e langí kiate ia, pea mamata ia ki he Laumālie ʻo e ʻOtuá ʻoku maliu hifo ʻo hangē ko e lupé, ʻo tuʻu mai kiate ia:
“Pea ʻiloange ko e leʻo mei he langí, naʻe pehē, Ko hoku ʻAlo ʻofaʻangá ʻeni, ʻa ia ʻoku ou fiemālie lahi aí” (Mātiu 3:13, 16–17).
ʻOkú ke muimui kia Sīsū Kalaisi ʻi he ʻaho makehe ko ia ʻoku papitaiso mo hilifakinima ai koé. ʻOkú ke hoko ʻo hangē ko ha tokotaha foʻoú—naʻá ke palōmesi ke manatuʻi maʻu pē mo muimui ʻia Sīsū Kalaisi, ʻokú ke hoko ko ha mēmipa ʻo Hono Siasí, naʻá ke maʻu e meʻafoaki ʻo e Laumālie Māʻoniʻoní, peá ke hoko ʻo maʻa kakato. ʻOku fiefia ʻa e Tamai Hēvaní ʻiate koe. ʻOku fakaava ʻe he papitaisó ʻa e matapā ki he hala ʻokú ne tataki hake kitautolu ki he Tamai Hēvaní.