ʻI hoʻomou fakamanatu ko ia ʻa e konifelenisi lahi ʻo ʻOkatopa 2014, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Fakakonifelenisi ʻi he ngaahi pulusinga he kahaʻú) ke tokoni atu ki hoʻo akó mo hono fakaʻaongaʻi e ngaahi akonaki fakamuimuitaha ʻa e kau palōfita mo e kau ʻaposetolo moʻuí pea mo e kau taki kehe ʻo e Siasí.
ʻOku ʻomi ʻi he konifelenisi takitaha ‘e he kau palōfitá mo e kau ʻaposetoló ʻa e ngaahi tali fakalaumālie ki he ngaahi fehuʻi ʻa e kāingalotu ʻo e Siasí. Te ke lava ʻo fakaʻaongaʻi hoʻo makasini ʻo Nōvema 2014 pe ʻaʻahi ki he conference.lds.org ke maʻu ai e tali ki he ngaahi fehuʻi ko ʻení:
Ko e hā ha founga ʻe lava ke toe mahino lelei ange ai kiate kitautolu ʻa hono mahuʻinga ʻo e sākalamēnití? Vakai, Cheryl A. Esplin, “Ko e Sākalamēnití—ko ha Fakafoʻou maʻá e Laumālié,” 12.
Ko e hā e fekauʻaki ʻa e tauʻatāina ke filí, fakamaau totonú, ʻaloʻofá, fakatomalá, mo e Fakalelei ʻa e Fakamoʻuí? Vakai D. Todd Christofferson, “Tauʻatāina ʻo Taʻengata, ke Ngāue Maʻanautolu Pē,” 16.
Ko e hā ʻoku hoko ai e ʻapí ko e feituʻu lelei taha ki hono akoʻi e ngaahi akonaki ʻo Sīsū Kalaisí? Vakai, Tad R. Callister, “Ngaahi Mātuʻá: Tefitoʻi Faiako ʻo e Ongoongoleleí ki Heʻenau Fānaú” 32.
Ko e hā ha founga ʻoku ngāue fakataha ai e ongo mātuʻá ke langaki ha fāmili taʻengatá? Vakai, L. Tom Perry, “Ko e Maʻu Ha Melino Tuʻuloá mo Langaki ha Fāmili Taʻengatá,” 43.
Naʻe fokotuʻu mai ʻe ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá ha founga ʻe ua ʻe lava ai e toʻu tupú ʻo “maʻu ha fakamoʻoni fakatāutaha ki he Palōfita ko Siosefa Sāmitá”:
“ʻUluakí, kumi hake ha ngaahi potu folofola ʻi he Tohi ʻa Molomoná ʻokú ke ongoʻi mo ʻilo ʻoku moʻoni ʻaupito. Vahevahe leva ia mo e fāmilí mo e kaungāmeʻá … pea fakahaaʻi naʻe hoko ʻa Siosefa ko ha meʻangāue ʻi he toʻukupu ʻo e ʻOtuá. Hokó, lau e fakamoʻoni ʻa e Palōfita ko Siosefa Sāmitá ʻi he Mataʻi Tofe Mahuʻingá. … Fakakaukau ke ke hiki tepi e fakamoʻoni ʻa Siosefa Sāmitá ʻi ho leʻo pē ʻoʻoú, peá ke toutou fakafanongo ki ai pea vahevahe ia ki ho kaungāmeʻá.”
Mei he “Siosefa Sāmita,” Liahona, Nōvema 2014, 30.
Ko e hā ʻoku fie vahevahe ai ʻe he Kāingalotu ʻo e Siasí ʻa e ongoongoleleí?
Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kuo hoko pea ʻe hoko maʻu pē ʻa e kau ākonga faimateaki ʻa Sīsū Kalaisí ko ha kau faifekau lototoʻa.” “Ko e faifekaú ko ha tokotaha muimui ʻo Kalaisi ʻokú Ne fakamoʻoniʻi ko Ia ʻa e Huhuʻí mo ne fakahaaʻi ʻa hono moʻoni ʻo ʻEne ongoongoleleí.
“Kuo hoko pea ʻe hoko maʻu pē ʻa e Siasi ʻo Sīsū Kalaisí ko ha siasi ngāue fakafaifekau. …
“…ʻOku ʻikai ko ha meʻa foʻou kiate kitautolu ke tau vahevahe atu ki he niʻihi kehé ʻa e ngaahi meʻa ko ia ʻoku mahuʻinga taha kiate kitautolú pe ko ia kuó ne faitokonia kitautolú.
“ʻOku hā mahino e sīpinga tatau pē ko ʻení ʻi he ngaahi meʻa ʻoku mahuʻinga mo ola fakalaumālié .”
Ko e hā te tau lava ʻo fai ʻi he taimi ʻoku fakahaaʻi ai ʻe he kakaí ʻenau tokanga ki he ongoongoleleí mo e Siasí? Naʻe pehē ʻe ʻEletā Petinā te tau lava ʻo muimui he sīpinga ʻa e Fakamoʻuí ʻaki hono fakaafeʻi kinautolu ke nau “haʻu ʻo mamata” (Sione 1:39).
Mei he “Haʻu ʻo Mamatá,” Liahona, Nōvema 2014, 107, 109.
Ke lau, mamata pe fanongo ki he ngaahi lea ʻo e konifelenisi lahí, vakai ki he conference.lds.org