Tokoniʻi ʻo ha Kaungāmeʻa Foʻou
Naʻe kau mai ha kiʻi taʻahine foʻou ki heʻemau kalasí ʻi he vaeuaʻanga ʻo e taʻú. Naʻe fōtunga pea lea kehe mei he toenga ʻo e fānau akó. Ne siʻi toutou hikihiki holo pea faingataʻa ke maʻu haʻane ngaahi kaungāmeʻa. Naʻe faʻa haʻu ki he akó ʻoku tangi koeʻuhí naʻe faʻa hoko ha ngaahi meʻa fakamamahi ʻi honau fāmilí. Naʻá ku ʻiloʻi ʻoku fie maʻu ke u feinga ke tokoni ki he taʻahine ko ʻení, ka naʻe ʻikai ke u fuʻu fakapapauʻi pe ʻoku sai pē koeʻuhí he naʻe ʻikai ke faʻa saiʻia he talanoa ki he fānau kehé. Naʻá ku lotua e meʻa ʻoku totonu ke u faí pea naʻá ku lava ʻo ongoʻi e fanafana mai ʻa e Laumālie Māʻoniʻoní ʻoku totonu ke u feinga pē ke hoko ko hano kaungāmeʻa.
Naʻá ku tokoni ki ai ʻi heʻene ngāue fakaakó, pea fakamatala ki ai naʻe foaki ange ʻe heʻetau Tamai Hēvaní ʻa hono ngaahi talēniti makehé ke ne fakaʻaongaʻi mo vahevahe ia mo e niʻihi kehé. Naʻá ku fakaafeʻi ia ke mau vaʻinga mo e fānau ako kehé ʻi he mālōlō siʻí. Hili ha ngaahi māhina siʻi mei ai, naʻá ne vahevahe mai ko au ʻene fuofua kaungāmeʻá.
Naʻe fie maʻu ke toe hiki, pea naʻá ku ongoʻi loto-mamahi moʻoni. Naʻá ku kole ki he sekelitali ʻo e akó ke ʻave ha tohi ki ai ʻi heʻene tuʻasila foʻoú. ʻI he tohí, naʻá ku talaange ki hoku kaungāmeʻá te u ʻofa kiate ia pea te ne hoko maʻu pē ko hoku kaungāmeʻa. Naʻá ku tā ha fakatātā ʻo ʻemau vaʻinga fakatahá pea fakamanatu ange ki ai ha niʻihi ʻo ʻene ngaahi talēnití. Naʻá ku talaange ʻoku totonu ke loto-toʻa pea feinga ke maʻu ha kaungāmeʻa foʻou koeʻuhí ke lava ʻo tokoni ki ha taha kehe. Naʻá ku lotu ke ne maʻu ha kaungāmeʻa ʻi heʻene ʻapiako foʻoú pea ke angalelei ʻa e fānau kehé ki ai.
ʻOku ou ʻilo ʻoku ʻofa e Tamai Hēvaní ki Heʻene fānaú kotoa, pea ʻoku ou fakamālō ʻokú Ne tokoniʻi kitautolu ke tau fetokoniʻaki.