Kiʻi Tohi Fakamatala ʻo e Konifelenisi ʻo ʻEpelelí
Ko Hono Ako Fakataha e Ngaahi Malanga Konifelenisí
ʻOku nofo ʻa Kuleki Peti ʻi ʻIutā, USA.
Naʻe tokoniʻi lahi ʻemau aleaʻi fakafāmili ʻo e ongoongoleleí ʻe he liliu ʻo e founga ʻo ʻemau fakamanatu e konifelenisí.
Kuo taʻu lahi ʻemau manako hono lau fakafāmili ʻa e pulusinga ʻo e konifelenisí, ʻa e malanga takitaha. Ko e taimi ne mau kamata aí, ne mau haʻohaʻo takai pē he tēpilé ʻo taufetongi hono lau leʻo lahi e palakalafi takitaha. Ka ne mau fakatokangaʻi naʻa mau lau pē ke fai mo ʻosi, kae ʻikai ke toe mālōlō ke fakakaukauʻi ʻa e ngaahi pōpoakí.
Pea koeʻuhí ke maʻu ha meʻa lahi ange mei he meʻa naʻa mau laú, ne u fakatau ai mo hoku uaifí ha pulusinga ʻo e konifelenisí maʻá e mēmipa takitaha ʻo e fāmilí pea palani pe ko e malanga ʻe fiha ʻe fie maʻu ke mau ako he uiké takitaha koeʻuhí ke mau lau kotoa kinautolu ki muʻa ʻi he konifelenisi lahi hono hokó. Ko e uike ʻe niʻihi naʻa mau lau ai ha malanga pē taha, pea ngaahi uike ʻe niʻihi naʻa mau lau ai ha malanga ʻe ua, ka naʻe pau ke ako ʻe he taha kotoa ʻa e malangá mo fakaʻilongaʻi ʻa e ngaahi konga naʻa nau saiʻia aí. Pea ʻi he efiafi fakafāmili ʻi ʻapí ne mau feakoʻiʻaki leva mei he ngaahi konga ne mau fakaʻilongaʻí.
Naʻe faʻa ʻi ai ha ngaahi fehuʻi ʻema fānaú ʻo kamataʻaki ʻemau fealēleaʻakí, pe ko haʻaku fai ʻe au mo hoku uaifí ha ngaahi fehuʻi mei he meʻa ne ma akó. Naʻá ma fakamahuʻingaʻi ʻa ʻema fanongo ki hono fakamatalaʻi heʻema fānau taʻu hongofulu tupú ʻa ʻenau tali ki he ngaahi fehuʻi ko iá, vahevahe mai e ngaahi meʻa ne nau ako ʻi he seminelí, ʻi he lotú, pe ʻi heʻenau ako fakatāutahá. Naʻe hoko ʻeni ko ha founga lelei ʻo e fefanongoʻaki maʻu pē ki he ngaahi fakamoʻoní ʻi ha ʻātakai mātuʻaki fakafiemālie mo nonga.
Naʻe ʻikai fuoloa kuo mau fakatokangaʻi kuo pehē mo ʻemau ako folofola he pongipongí. Ko e ngaahi ʻaho ʻe niʻihi naʻe feʻunga pē mo ha ngaahi veesi ʻe niʻihi he naʻe ʻosi vave ʻa e taimí ia koeʻuhí ko hono aleaʻi ʻo e ngaahi vēsí pea mo ʻenau kaunga ki he ngaahi meʻa ʻoku mau tofanga aí.
ʻOku femoʻuekina homau ngaahi pongipongí ʻi he pōtalanoá, kakatá, mo e uouangatahá ki muʻa pea mau toki mātuku atu ki heʻemau takitaha ngāué. ʻOku mau maʻu ha fakamoʻoni mālohi ki he faleʻi hotau palōfitá ke ako mo lotu fakataha fakaʻahó. Kuo liliu homau fāmilí ki ha fāmili ʻoku feakoʻaki mo fefakamālohiaʻaki. Ko e ola kotoa ʻeni ʻo e loto ke maʻu ha kiʻi meʻa lahi ange mei he konifelenisi lahí.
Tā fakatātaaʻi ʻo e ʻatá ʻe Aubry Startin © IRI