Ko Hono Maʻu ʻo e Fiefia ʻi he Moʻuí
Kēleni Lokiuti, ʻAitahō, USA
ʻI ha meʻa ʻe taha, naʻá ku lolotonga lau ai ha malanga konifelenisi lahi naʻe fai ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá. Neongo naʻá ku fakakaukau kuó u ʻosi fanongo mo lau e malangá ki muʻa, ka naʻe maʻu ʻeku tokangá ʻe ha kupuʻi lea ʻe taha mo nofo ʻi heʻeku fakakaukaú.
ʻOsi mei ai ha ngaahi houa siʻi, kuo afe mai hoku fohá, ʻoku nofo ia ʻi ha fale nofoʻanga kehe mo hono ngaahi kaungāmeʻá, ke ʻeva mai. Kuo ʻosi ngāue fakafaifekau taimi kakato mo ako ʻi he ʻunivēsití ʻi ha ngaahi faʻahitaʻu fakaako siʻi. Naʻe ʻikai ke ne fakapapauʻi ʻa e taumuʻa ʻo ʻene akó pea mo e ngāue ʻoku totonu ke fakataumuʻa ki aí. Koeʻuhí kuo puputuʻu mo ongoʻi ʻoku maumau taimi mo maumau paʻanga he taimí ni ʻa e akó, kuó ne taʻofi ai ʻene akó kae kamata ngāue taimi kakato.
Naʻá ne talamai naʻe fokotuʻu ange ʻe ha taha ʻo hono kaungāmeʻá ke na ō ki ha motu ʻi he ʻOtu Pahamá pe Kalipiané, kumi ngāue, pea mo fiefia ai ʻi ha ngaahi māhina. Naʻe fiefia hoku fohá ʻi he fakakaukau ko ʻeni. Naʻe lava pē ke u sio ki he fakatauvele ʻo ha faʻahinga aʻusia tauʻatāina pehē ki ha talavou.
Fakafokifā pē kuo haʻu ki heʻeku fakakaukaú ʻa e pōpoaki fakaʻofaʻofa ʻa ʻEletā Sikotí. Naʻá ku toʻo leva ʻa e Ensign ʻo lau ʻeni ki hoku fohá: “ʻOku mou ʻi he māmaní koeʻuhí ko ha taumuʻa fakalangi. ʻOku ʻikai ko hono ʻuhingá ke fakafiefiaʻi taʻe tuku ʻa kimoutolu pe ko haʻamou tulifua maʻu pē ki he fiefiá. ʻOku mou ʻi hení ke ʻahiʻahiʻi, ke fakamoʻoniʻi hoʻomou feʻungá, koeʻuhí ke mou maʻu ʻa e ngaahi tāpuaki kehe kuo tokonaki ʻe he ʻOtuá maʻamoutolú. ʻOku fie maʻu moʻoni ʻa e mālohi fakatupulaki ʻo e faʻa kātakí” (“Maʻu ʻa e Fiefia ʻi he Moʻuí,” Ensign, May 1996, 28).
Naʻe ʻikai ha lea ʻa hoku fohá, ka naʻá ne toʻo pē ʻa e makasiní pea ʻalu, ʻo lau kakato ʻa e leá. Naʻá ne pehē ki mui ange ai he ʻikai ke ʻalu ia ʻo ʻeva ki he motú.
Naʻe hū ki he akoʻanga polisí ʻi he ʻosi mei ai ha taimi, ko ha hala naʻe iku feʻiloaki ai mo hono uaifi he kahaʻú. Naʻá na mali ʻi he Temipale Mesa ʻAlesoná pea ko e ʻaho ní ʻokú na ohi hake ha fānau fakaʻofoʻofa. Naʻe maʻu e mataʻitohi BA hoku fohá ʻi he 2010 pea ʻokú ne “maʻu [moʻoni] ʻa e fiefiá ʻi he moʻuí.”
Naʻe mei hoko e ʻeva ne fokotuʻu ʻe hoku fohá ko ha aʻusia lelei; ka ʻi he tafaʻaki ʻe tahá, naʻe mei fakatuʻutāmaki fakalaumālie. Ko e taimi kotoa pē ʻoku ou fakakaukau ai ki he meʻá ni, ʻoku ueʻi hoku lotó ʻe he Laumālié.
ʻOku ou fakafetaʻi ʻi he ngaahi lea ʻa e kau palōfitá pea mo hono ueʻi au ke u manatuʻi ha malanga naʻá ne tokoniʻi au ke u fai ha fakahinohinó. ʻOku ou toe fakamālō foki ʻi he fanongo hoku fohá ki he talafekau ʻa e ʻEikí mo tuku ke tākiekina ia ʻe he Laumālié. ʻOku ou ʻilo ʻoku maʻu ha ngaahi tāpuaki mo ha ngaahi ʻaloʻofa ongongofua lahi ʻi he taimi ʻoku tau fakafanongo ai mo muimui ʻi he ngaahi akonaki ʻa e Fakamoʻuí mo ʻEne kau tamaioʻeikí.