Ko ʻEku ʻUluaki Lotu ʻo kau ki he ʻUluaki Mata-Meʻa-Hā-Maí
Singi-uani Seni, Taiuani
ʻI he taimi ne u fili ai ke papitaiso aú, naʻe tupu ia mei hono fakaleleiʻi e niʻihi ʻo e ngaahi meʻa ne u faingataʻaʻia aí lolotonga hono akoʻi kiate au e ngaahi lēsoni ʻa e kau faifekaú. Naʻe ʻikai ko hono ʻuhingá ne u lotu pea maʻu ha fakamoʻoni ʻoku moʻoni e Tohi ʻa Molomoná pe naʻe mamata ʻa Siosefa Sāmita ki he Tamai Hēvaní mo Hono ʻAlo ko Sīsū Kalaisí. Naʻe fakaafeʻi au ʻe he ongo faifekaú ke u lotua e ngaahi meʻa ko ʻení, ka ne ʻikai ke u teitei fai ia. Ko ʻeku tui pē ʻaʻaku ki he ngaahi meʻa naʻe akoʻi mai ʻe he ongo faifekaú.
Hili ha taʻu ʻe tolu mei hono papitaiso aú, naʻe tuʻu ha fefine ʻi he tuʻunga malanga ʻo e falelotú ʻo vahevahe ʻene fakamoʻoni ki he Tohi ʻa Molomoná mo Siosefa Sāmita. Naʻá ne kole ki he tokotaha kotoa pē ke nau fakalaulauloto ki he fehuʻí ni: “Kuo tau lotua moʻoni koā ʻa hono moʻoni ʻo e Tohi ʻa Molomoná mo e meʻa naʻe hoko kia Siosefa Sāmitá?” Naʻe ongo fefeka kiate au ʻa e fehuʻi ko ʻení, peá u fakakaukauloto pē, “Kuo teʻeki ai ʻaupito ke u lotua e ngaahi meʻá ni, ka ʻoku totonu ke u fai ia pea te u fai ia.”
Naʻe ueʻi au ke u lotu he naʻe vaivai ʻeku tuí he taimi ko iá pea siʻisiʻi ʻeku fakamoʻoni ki he ngaahi folofolá. Ne u lotu he pō ko iá ki heʻeku Tamaí ʻo kau kia Siosefa Sāmita pea mo hono moʻoni ʻo e Tohi ʻa Molomoná.
Naʻe ʻikai ke u ongoʻi ha meʻa he fuofua taimi ne u lotu aí, pe ko hono tuʻo uá. Koeʻuhí ke ʻoua naʻá ku lotofoʻi, ne u fakaava hake ai e folofolá ki he Siosefa Sāmita—Hisitōlia 1:14–17, ʻa ia ʻoku fakamatala ai ki he ʻalu ʻa Siosefa ke fai ʻene lotu fakatāutaha he vao ʻakaú:
“Naʻá ku mamata ki ha pou maama feʻunga tonu mo hoku ʻulú, naʻe lahi ange hono ngingilá ʻi he laʻaá, ʻa ia naʻe maliu māmālie hifo kae ʻoua kuo tō ia kiate au.
“ʻI heʻene hā maí pē naʻá ku ʻiloʻi kuo fakahaofi au. … ʻI he nofo mai ʻa e māmá ʻiate aú naʻá ku sio ki he Tangata ʻe toko ua.”
ʻI heʻeku lau e ngaahi leá, ne kamata ke u tetetete ʻo hangē kuo maʻu kotoa hoku sinó ʻe he ʻuhilá. Ne u ʻiloʻi he taimi pē ko iá naʻe mamata moʻoni ʻa Siosefa Sāmita ki he Tamai Hēvaní mo Hono ʻAlo ʻOfaʻanga ko Sīsū Kalaisí. Naʻá ku ʻilo naʻa tau maʻu e Tohi ʻa Molomoná he naʻe liliu ia ʻe he ʻOtuá ʻo fakafou ʻi Heʻene palōfitá.
ʻOku ou fakamālō naʻe foaki kiate au ʻe he Tamai Hēvaní ʻa e fakamoʻoni ko ʻeni ki hono moʻoni ʻo e ʻUluaki Mata-Meʻa-Hā-Maí. Naʻá ku ʻiloʻi kapau naʻe ʻikai toe fakafoki mai e ongoongoleleí, pehē kuo ʻikai ke u ʻiloʻi ʻa hoku Huhuʻí. ʻOku ou ʻiloʻi ʻoku moʻoni ʻa hono kakato ʻo e ongoongoleleí, pea ʻoku ou ʻiloʻi te u maʻu e ngaahi talaʻofa ʻa e ʻOtuá kapau te u kātaki ʻi he faivelenga ki he ngataʻangá.