Hokohoko Atu Pē Hono Akó
Ne u loto ke tuku ā. ʻE ʻaonga nai e ngaahi feinga kotoa ko ʻení?
Taá naʻe fai ʻe he iStockphoto © Brian Steele
Ne u talaange ki heʻeku faʻeé, “ʻOku ʻikai te u fie hoko atu ʻeku lēsoni tā pianó.” Kuo taʻu lahi ʻeku ako lēsoni tā pianó pea ʻoku ou ʻosi helaʻia au. Kuó u ʻosi maau au ke tuku ā. Pea naʻe ʻikai ke u sai au he tā pianó. Naʻe ʻikai te u lau ʻe au ʻoku ʻi ai haku talēniti mūsika he naʻe kiʻi malu hoku telingá peá u fakaʻaongaʻi e meʻa ke tokoni ki heʻeku fanongó. Naʻe fie maʻu maʻu pē ke lahi ʻeku ako taá ke u ʻiloʻi e fasi ʻo ha foʻi hiva.
Naʻe ʻikai faʻa lea ʻeku faʻeé ka ne talamai pē ʻoku totonu ke kei hoko atu ʻeku ngaahi lēsoní kae ʻoua kuó u lava ʻo tā e ngaahi himí. Hili haʻaku lāunga lahi mo ha fakalotolahi lahi mei heʻeku ongomātuʻá, ne u fakakaukau ai ke ʻoua ʻe tuku.
Naʻe ʻosi mei ai ha ngaahi taʻu lahi mo ha maile ʻe lauiafe ki ha falelotu ʻi he ʻotu moʻunga ʻo Kuatemala lotolotó. Ne u kau atu ki ha konifelenisi fakavahefonua ʻi heʻeku ngāue fakafaifekaú. Ne u vave atu ki ai peá u sio ki ha piano ai, ko ia ne u tangutu hifo ʻo kamata ke tā ha ngaahi himi. Naʻe ʻi ai e ngaahi kīpooti ʻuhila iiki ʻi ha ngaahi uooti mo ha ngaahi kolo lahi pea naʻe faingataʻa hono taá, ko ia ne u fiefia ke tā ha piano moʻoni. Ne iku ʻo kole mai ke u tā e pianó kae hiva e haʻofangá he konifelenisí.
Ko e hā e meʻa naʻá ne liliu ʻeku tōʻonga fakakaukaú ʻi he vahaʻa ʻo e ngaahi taʻu ne u kei finemui aí mo e taimi ne u hoko ai ko e faifekaú? Ne u ongoʻi ʻa e mālohi ʻo e Laumālié ʻo fou mai ʻi he mūsiká.
Lolotonga ʻeku ngāue fakafaifekaú, ne lahi hoku ngaahi faingamālie ke fakaʻaongaʻi e ngaahi poto fakamūsika ne u akó. Ne u fiefia ʻi he ngaahi faingamālie ke u hiva ai mo tā pianó pea naʻá ku tā ʻi he meimei uike kotoa pē ʻi he houalotu sākalamēnití. Te u manatuʻi maʻu pē hono hivaʻi ʻe he kāingalotu faivelenga ʻi Kuatemalá e ngaahi himí. Ne u akoʻi ki he kāingalotú ha ngaahi himi foʻou naʻe ʻikai ke nau ʻiloʻi. Ne u akoʻi ha ngaahi lēsoni tā piano. Ne mau faʻa hiva mo hoku ngaahi hoá ki he kakai ne mau akoʻí. Neongo ne leʻo ua ʻemau hivá, ka naʻe ʻi ai maʻu pē ʻa e Laumālié ke aʻu ki he loto ʻo e kakaí.
Kuó u ako ʻo ʻiloʻi ʻoku tatau ai pē pe ko e hā ho ngaahi talēnití; te ke kei lava pē ʻo ako ke fakatupulaki e ngaahi meʻa fakamūsika ʻokú ke malavá. He ʻikai pē ke u teitei hoko au ko ha taha tā piano mataotao, pea ʻe ʻikai ke teitei kau ha tokolahi ia ʻo e kāingalotu ʻi Kuatemalá ʻi he Kuaea ʻa e Tāpanekalé. Ka ʻoku ʻikai mahuʻinga ia. Te tau kei fiefia pē ʻi hono ongoʻi ʻo e Laumālié ʻi he mūsiká. ʻOku ou fakamālō ne fakalotolahiʻi au ʻe heʻeku ongomātuʻá ke kei hokohoko atu pē ʻeku ngaahi lēsoni ako tā pianó, pea ʻoku ou fakamālō ne kei hokohoko atu pē ʻeku akoakó.