Ngaahi Fakakaukau Maʻá e Efiafi Fakafāmili ʻi ʻApí
ʻOku maʻu ʻi he makasini ko ʻení ha ngaahi fakamatala mo e ʻekitivitī ʻe malava ke ngāue ʻaki maʻá e efiafi fakafāmili ʻi ʻapí. Ko e niʻihi ʻeni ʻo e ngaahi sīpingá.
“Ko e ʻApasia ki he ʻOtuá ko e Kamataʻanga ia ʻo e Potó,” peesi 20: Fakakaukauʻi hano aleaʻi ʻo e poto ʻo māmaní ʻi hono fakafehoanaki ki he poto ʻo e ʻOtuá. Mahalo te ke fie lau ʻa e 2 Nīfai 9:28–29 pea fakakaukau ki ha ngaahi tuʻunga ʻoku kehe ai ʻa e poto ʻo māmaní mei he poto ʻoku akonaki ʻaki ʻe he ongoongoleleí. Fili ʻa e hala te ke fou aí ʻi he tuʻunga takitaha.
“Kaveinga ʻo e Mutualé ki he 2013,” peesi 50: Lau e ngaahi fakamatala ʻa ʻElaine S. Tolotoni mo Tēvita L. Peki kau ki he kaveinga ʻo e Mutualé ki he 2013. Fakakaukauʻi ha ngaahi founga laku fakakaukau ʻe lava ke tokoni ai e mēmipa takitaha ʻo e fāmilí ʻi hono ngaohi ʻo ʻapi ke hoko ko ha potu māʻoniʻoní. Mahalo te ke fie fakaʻaliʻali ha fakatātā ʻo e temipale ʻi homou fonuá pea fokotuʻu ha taumuʻa ke ō fakafāmili ki he temipalé.
“Hokohoko Atu Pē Hono Akó,” peesi 56: Fakakaukau ke fakahoko ha fakaʻaliʻali talēniti fakafāmili. Fokotuʻu ange ke haʻu e mēmipa takitaha ʻo e fāmilí kuó ne mateuteu ke vahevahe ha faʻahinga poto pe fai ha faʻahinga meʻa. Ko ʻene ʻosi iá pea lau e fakamatala ko e “Hokohoko Atu Pē Hono Akó” pea aleaʻi pe ʻe lava fēfē ʻe hono toutou ako mo vahevahe ʻo e ngaahi talēnití ʻo faitāpuekina ai ʻa kinautolu ʻoku tau feohí.
“Ko e Fakamoʻoni ʻa ʻEvelini ki he Temipalé,” peesi 70: Fakakaukauʻi ke faʻufaʻu ha kumi koloa ko e “fakamoʻoni fakafāmilí”. Tuku takai holo ha ʻū fakatātā he lokí pea ʻai ke tānaki mai ʻe he kau mēmipa ʻo e fāmilí e ngaahi fakatātā ko ia ʻoku nau tui ki aí (hangē ko ʻení: ngaahi tā homou fāmilí, ko e temipalé, Palesiteni Tōmasi S. Monisoni, papitaisó, laʻipepa fakafonu vahehongofulú, ko ha talavou pe finemui ʻoku teunga taau). Fakaʻosi ʻaki haʻamou aleaʻi hono ʻuhinga ʻoku mou tui ai ki he ngaahi fakatātā takitaha ko ʻení.
Ngaahi Lēsoni ʻi he Fakapoʻulí
ʻOku faʻa taʻenonga maʻu pē ʻema kiʻi taʻahine ko Sūliá lolotonga ʻemau efiafi fakafāmili ʻi ʻapí, pea ʻi he ʻaho ʻe taha ʻi ʻOkatopa naʻá ne pehē mai, “Kuo teʻeki ai ke fai haʻatau efiafi fakafāmili ʻatautolu ʻi he fakapoʻulí. ʻAi muʻa haʻatau efiafi fakafāmili pehē, fakamolemole?” Ne ma fifili pe ko e hā e meʻa ʻe lava ke ma akoʻi ange ki ai ʻi he fakapoʻulí pea te ma akoʻi fēfē ia.
Ne ma tamateʻi e māmá pea mau nofo fakapoʻuli. Ne fakamoʻui leva ʻe hoku husepānití ʻene telefoni toʻotoʻó pea kamata ke ne faiako fekauʻaki mo e Maama ʻa Kalaisí. Naʻá ne fakatātaaʻi e founga ʻe lava ai ʻe he Maama ʻa Kalaisí ʻo ʻomi kitautolu mei he fakapoʻulí pea tataki kitautolu ke tau foki atu kiate Ia. Naʻe ʻikai ke fuʻu ulo lahi e maama mei he telefoní, ka naʻe feʻunga pē ke mau lava ʻo sio.
ʻI he tamateʻi fakataimi ʻe he telefoní ʻa e māmá ʻiate ia peé, naʻe lava ke ma fakaʻaliʻali ai ki heʻema kiʻi taʻahiné e meʻa ʻe hoko ki heʻemau moʻuí taʻe kau ai ʻa e Fakamoʻuí, ʻa Sīsū Kalaisi. Ne ongo mālohi e Laumālié, pea naʻe loto ʻapasia ʻaupito ʻema kiʻi taʻahiné. Aʻu ki he taimí ni ʻokú ne kei manatuʻi pē ʻemau efiafi fakafāmili ʻi ʻapi manakoa tahá mo e pōpoaki ne akoʻi aí.
Valakuila Lima tosi Sanitosi, Palāsila