Kapilōk n̄an Doulul eo an Jiron̄ ro kōn Jerā

Jān Būreejtōnji eo Eutiej an Jiron̄ ro

Pija

Young Women General Presidency

Elimo jerā! Jerā ej juōn iien em̧m̧an n̄an eok n̄an ejaake im kōļļapļo̧k jemjerā ko am̧ ippān likao ro. Eļtōr Robert D. Hales jen Doulul eo an Jon̄oul Ruo Rijilōk ro kar leļo̧k juōn meļeļe epidodo im ewōr meļeļein kōn juōn m̧ōttā: “Ro m̧ōttad rej armej ro rej kapidodoik n̄an mour kake gospel eo an Jisōs Kraist.”¹ Jerāik likao ro me rej kōm̧m̧an bwe kwon erom juōn armej em̧m̧anļo̧k. “Erom em̧m̧an eo am̧ make” innām kwomaron̄ erom juōn im̧ōk ekajoor n̄an jabdewōt eo kwōj jerāiki.²

Erom Kain Armej Rōt eo Kwonaaj Kōņaan in Jerāiki

Kwomaron̄ in jino kiiō n̄an jerbal ilo ejaake m̧wil ko ewōr tokjāer me renaaj kōm̧m̧an am̧ deeo im kalimomo.

Ettōn̄dikdik! Aaet, ettōn̄dikdik im m̧ōņōņō. Im am̧ ettōn̄dikdik enaaj ajeded im jipan̄ ro jet m̧ōņōņō ilo am̧ bwebwenato.
Kwōn ājjimourur ilo jetōb. Kōm̧m̧ane men ko otemjej me renaaj kepaak eok n̄an Jetōb Kwojarjar eo bwe E en maron̄ erom eo m̧ōttam̧ aolep iien.
Kwōn ājjimourur ilo kanniōk. Kōjparoke ānbwinim, kwōn emmourur, im kamminene m̧ōn̄ā m̧ōn̄ā ko rōūne. Kwōn em̧m̧an idem̧.
Ejaake kōņaan im taļōn ko am̧. Pukōt aolep jeļāļo̧kjeņ eo kwomaron̄e. Kwomaron̄ in riit bok ko rem̧m̧an, ron̄jake kōjan̄jan̄ ko rem̧m̧an, jeļā m̧akūtkūt ko rej bōk jikin, ak katak bar juōn kajin.
Kōm̧anm̧an m̧wilim āinwōt juōn leddik nejin Anij. Jab kajju, katojooj, lāj, ak bōkjab. Kwomaron̄ in kar loe kain m̧wil in ilo pija ko, ak ej jab jejjet n̄an juōn jiron̄ eo emeļeļe kadkad eo an āinwōt juōn leddik nejin Anij.
Kōm̧anm̧anļo̧k kilen am̧ kōnono. Kwōn jouj, meļeļe kōn ro jet, im ļōmņak kōn aikuj ko an ro jet. Idajon̄jon̄e wāween kōnono in armej. Katak m̧anit im m̧wil ko rekkar. Aolepen men kein renaaj jipan̄ eok erom kain armej rōt eo ro jet renaaj kōņaan pād iturin.
Kwōn itok limo ippān armej. Kwaļo̧k itok limo ilo ro jet im ilo men ko rekōņaan kōm̧m̧ani. Kajjitōk kajjitōk ko me renaaj jipan̄ er en̄jaake inem̧m̧an im jipan̄ eok jeļā ļo̧k kajjāer.
Kōm̧m̧an jon̄ak ko. Jab kōtļo̧k an ro jet kōm̧m̧ane kōņaan ko aer kōn kwe. Kōjparok erreo eo am̧.
Mour kake jon̄ak ko ilo N̄an Kajoorļo̧k Eo an Jodikdik. Jab itweļo̧k in kwaļo̧k jon̄ak kein ippān jabdewōt eo kwōj jerāiki. Jab kōttāikļo̧k jon̄ak ko am̧ n̄an jabdewōt. Eļan̄n̄e juōn ej kōtmene n̄an am̧ kōm̧m̧ane, ļeo ak lio ejjab erreo n̄an am̧ jemjerāiki ak m̧ōttāiki.
Jipan̄ ro jet erom em̧m̧antata eo aer make. Kōm̧m̧an bwe ren em̧m̧anļo̧k bwe rekar jerāiki eok. Men̄e ej jab wōr am̧ iien ko rem̧m̧an n̄an jerā, kwomaron̄ in ettōn̄dikdik im kōm̧m̧an ro m̧ōttam̧ rekāāl. Kālet bwe kwōn lōke. Men̄e men ko rej jab kajuburuōm ilo jerā remaron̄ in jipan̄ eok eddōkļo̧k. Aolep armej kwōj iooni remaron̄ kōjeraam̧m̧an mour eo am̧, im kwomaron̄ in kōjeraam̧m̧an ro jet ilo am̧ kwaļo̧k ippāer em̧m̧antata eo ippām̧ make.

Kālet Jim̧we Jabdewōt Ro Kwōj Jerāiki

Jerā ej juōn iien em̧m̧an n̄an jeļā kajjien likao ro ilo kōpopo n̄an m̧are. Kwōn tiljek kōn jabdewōt eo kwōj kālete n̄an jerāiki. Eļan̄n̄e kwōj ļōmņak in etal ippān juōn likao, jeļā eļan̄n̄e ej pād ippān jon̄ak ko reutiej im enaaj aolep iien jipan̄ eok mour kōn gospel eo an Jisōs Kraist. En̄in ej jet kajjitōk ko kwomaron̄ in kajūtkin eok make:

Ewōr ke ippān juōn m̧wil ekajoor im em̧m̧an?
Ewōr ke lōke ippān im maron̄ pedped ioon?
Ej ke m̧ool?
Ej ke kautiej im jouj n̄an ro jet im n̄an n̄a?
Ej jab ke kubboņ?
E ej ke kautiej ro jinō im jema im kauteij ro jinen im jemen?
Ej ke kautiej priesthood eo an?
Ej ke rōjan̄ iō n̄an erom em̧m̧antata eo aō make?
Ej ke erreo n̄an etal n̄an tampeļ eo?

M̧ōņōņō im limo ilo jerā ko ilo am̧ kajjeon̄ in jeļā kajjien ro jet. Karōk m̧akūtkūt in ippān doon ko rekalimomo. Jet iaan jerā ko relukkuun kam̧ōņōņō remaron̄ in pidodo āinwōt kōmat juōn m̧ōn̄ā ippān doon. Ak ļōmņake juōn iien jerbal in jipan̄. Kwomaron̄ in etale im kajjeon̄ in jeļāļo̧k kajjen armej ro jet jān kōm̧m̧an m̧akūtkūt ko jān baj pād wōt jijet im alooj pija ko.

Rikanaan eo ad ekar ba, “Ilo jerā, kōm̧m̧an n̄an eo jeram̧ kōn kautiej, im kōtmene bwe eo jeram̧ en kwaļo̧k ejja kautiej eo n̄an eok.”³ Kōm jeļā bwe kwonaaj erom juōn im̧ōk em̧m̧an ilo mour ko an aolep likao ro kwōj jerāiki—im aolep ro m̧ōttam̧ ro rej loe waanjon̄ak ko am̧ rem̧m̧an.

Ilo am̧ wōnm̧aanļo̧k n̄an ejaake menin letok ko im taļōņ ko am̧, kōm̧m̧an kālet ko rejim̧we ilo jemjerā ko am̧ ippān ro jet, im erom juōn im̧ōk ewāppen, iiō in jerā ko am̧ renaaj em̧m̧an, kōjeraam̧m̧an, im lem̧ōņōņō. En̄in ej juōn iien n̄an am̧ kautiej lōn̄ ļo̧k itok limo ko am̧, kōtmene bwe ren em̧m̧antata, im erom aolepen men eo Jemedwōj Ilan̄ ej kōtmene bwe kwōn erom. Kwōj juōn leddik nejin Jemedwōj Ilan̄; E ej io̧kwe eok, im barāinwōt kōm.