Ejm̧aan ko Reliep

Jān David L. Frischknecht

Ijo ej lolorjake Laajrak in Kein Katak

Tōbrak eo ilo wiak kake bok jidik āinwōt ejjab—ekatōn̄tōj—bōtaab rej kakememej eō kōn juōn kalim̧m̧ur me ej n̄an indeeo

Raan eo ālkin an Jema jako, jinō, ļaddik im leddik ro jeiū im jatū, im n̄an kar aikuj in loļo̧k jikin rimej eo n̄an karōk iien ilomej ko. Jerbal ko am ekoba kālet juōn bo̧o̧k in rimej im jikin kallib me bo̧o̧k in rimej eo enaaj kar pād ie.

Ilo am kar ļōmņak kōn jokālet ko, Ij kememej bok jidik in wia kake ko rej karelel kōn juōn jikin kallib. Ej kwaļo̧k, ibwilijin men ko jet, jikin kallib eo eaar make liāp, ekar kalim̧m̧ur bwe ej liāp ium̧win 75 iiō ko. Men̄e iien eo ekar juōn iien ekadu, kalim̧m̧ur eo eaar kabwilōn̄ eō.

“Wōn eo enaaj bar lale liāp eo ilo 75 iiō ko?” Iaar ļōmņak. “Im eļan̄n̄e jabdewōt emaron̄ im ejjab m̧ool, wōn eo naaj tōbare kōn kalim̧m̧ur eo? Ta tōbrak ko, ilo m̧ool,” Iaar ļōmņak, “kōn jikin kallib eo maron̄ liāp wōt?”

Ilo iien kejōkļo̧kjeņ eo, ļōmņak eo aō eaar kaiokļo̧k bar juōn jikin kallib, juōn eo kar kōmeļeļeik ilo Matu 27. Jikin kallib in, ilo m̧ool juōn lōb ilo juōn iien im jikin etto, ewōr mejān juōn dekā kileplep:

“Im raan eo ilju, raan ilikin raan in kōpopo eo, pris ro reļļap im Parisi ro rej kweilo̧k ļo̧k n̄an ippān Paiļat,

“Im ba, Irooj, kōmij kememej an leo ri m̧oņ eo ba, ke eaar mour, ālkin jilu raan ko Inaaj bar jerkak.

“Innem kwōn jiron̄ bwe ren kanooj kaben lōb eo m̧ae ālkin jilu raan, n̄e rikaļoor ro rej itok im ko̧o̧t E, im ba n̄an armej ro, E ejerkakpeje jān ro remej: im moņ āliktata enaaj nana jān eo m̧okta.

“Paiļat e ba n̄an er, Ewōr ri bar ibemi: kom̧in ilo̧k im kabin e, āinwōt ami maron̄.

“Innem rej ilo̧k, im kapen lōb eo, im sil ejman eo, im ro ri bar rej ipper” (Matu 27:62–66).

Iaan aolep kappe ko kar lilo̧k ilo bwebwenato an kiin̄ ro im riutiej ro im ri kakien ro, kappe eo an Paiļat jan dāpij wōt ejman eo kilōk eaar ilo m̧ool men eo ejej tokjen tata.

Ta tōbrak eo me ejman eo emaron̄ in kar liāp? Ilo m̧ool, ejjeļo̧k wāween n̄an an ri tariņae ro bōk ļo̧k kappe eo me āinwōt n̄e ejjeļo̧k wāween me ejman eo ebar kar peļļo̧k: “Im lo, eļap an laļ makūtkūt: bwe enjeļ in Irooj ej wanlaļtak jān lan̄, im itok im kedeliļļo̧k ejman eo im jijet ioon” (Matu 28:2).

Kōnke ejman eo eaar jab liāp e, aolep jikin kallib ko im lōb ko im ejman ko me raar liāpi naaj peļļo̧k Kalim̧m̧ur.

Dekā eo an Ad Lo̧mo̧r ej ad rilo̧mo̧r jān mej im jān hell E ej “jerkakpeje eo, im mour eo” (Jon 11:25). Kōn E “hell eaikuj kōtļo̧k āinbwinnin ri kōm̧akoko ko an, im āinbwin ko im jetōb ko an armej renaaj bar jepļaak n̄an ippān doon; im men in ej jān kajoor im jerkakpeje an ri Kwojarjar Eo an Israel” (2 Nipai 9:12).