Juōn Nuknuk in M̧are im juōn Karōk

Jān Jane McBride Choate

M̧are ej kain̄ an Anij (D&C 49:15).

Lori eaar jijet ioon jikin kiki eo an leddik eo jein ke Karyn eaar kadedeļo̧k an kanni pāāk in tampeļ eo an. Karyn ej pojak in kar m̧are rainin.

Lori eaar m̧ōņōņō in etal n̄an kōjota in m̧are eo joten eo, bōtaab eaar barāinwōt būromōj. Ļaddik eo jein, eo eaar jerbale juōn mijen, maron̄ in etal n̄an lowaan tampeļ eo ippān Karyn. Ro jinen im jemen raar barāinwōt deļo̧n̄. Bōtaab Lori im ļaddik ro ruo jatin raar jab maron̄ in deļo̧n̄.

“Iakwe in kar deļo̧n̄ ilo tampeļ ippam̧,” Lori eaar ba.

Karyne eaar reilōn̄ ļo̧k jān pāak eo an. “Bar n̄a, bōtaab kwonaaj pād namōj. Im juōn raan Inaaj etal n̄an tampeļ ippam̧ n̄e kwōj m̧are.”

Lori ekar jab bar en̄jake lukkuun būrom̧ōj, ak ekar ļo̧kjenan kōn bar juōn men. “Ekōjkan am kar jeļā kwar kōņaan m̧areik Matt?” eaar kajjitōk.

Karyn eaar jijet laļ ļo̧k iturin Lori. “Juōn iien aitok em̧ootļo̧k iaar ekkatak bwe Jemed Ilan̄ ewōr juōn an karōk n̄an n̄a. Ke iaar ioon Matt, iaar kile kōm maron̄ in kakūrm̧ool karōk eo ippān doon.”

“Em̧ōj ke am̧ kadedeļo̧k karōk eo?” Lori eaar kajjitōk.

Karyn eaar kōjōpoulul pōran jab. “Matt im n̄a kōmro kōņaan bwe en wōr nejim ajri, kadedeļo̧k am jikuul, im ebar lōn̄.”

Lori eaar kalimjōk nuknuk in m̧are eo aiboojojo emouj ej etoto ilo kōjām in jikin nuknuk eo an Karyn. “Nuknuk eo am̧ eaiboojoj,” eaar ba.

Karyn eaar ettōn̄. “Bar juōn m̧ōttan karōk eo,” eaar ba. “Aolep iien iaar kōņaan m̧are ilo tampeļ, kōn menin nuknuk eo aō ej aikuj in karbōb.”

Jet awa tok ālik Lori eaar alooje an Karyn im Matt diwōjtok jān tampeļ eo. Turin mejeer komaron̄ lo lan̄lōn̄.

Lori eaar ettōr ļo̧k n̄an ippān Karyn im door pein ipeļakin.

Jet wiik tok ālik Lori eaar bōk juōn pija ilo māeļ. Eaar juōn pijan in Karyn im Matt rej jutak im̧aan tampeļ eo. Karyn eaar jeje ilōn̄ in, “Jemed Ilan̄ ewōr juōn an karōk n̄an kwe.”

Lori eaar likūt pija eo ioon jikin nien nuknuk eo an. Eaar kalim̧m̧ur e make bwe juōn raan enaaj kar maron̄ in etal n̄an tamepļ im bōk ejja m̧ōņōņō eo wōt me eaar eromakļo̧k ilo turin mejān leddik eo jein.