“Naajdik Jiip ko Aō”
Ļoor eō, im naajdik jiip ko aō (D&C 112:14).
“Jisōs eaar jiron̄ Pita n̄an naajdik jiip ko An. En̄in ekōjkan an Piter maron̄ kwaļo̧k n̄an Jisōs ej iakwe E.”
“Mama, Jisōs eaar ke wōr an rilale jiip?”
“Jab, lijiron̄. Jisōs jet iien kar ņa etan Jabōt Em̧m̧an, im jej āinwōt jiip ko An. Jisōs eaar katakin Piter bwe eļan̄n̄e jej kōņaan kwaļo̧k n̄an Jisōs jej iakwe E, jej aikuj in jipan̄ ro jet.”
“Ej ke wunin ad ilo̧k n̄an bōkļo̧k pae eo n̄an Jejtōr Jacobs ālkin nokin in jota an baam̧le?”
“Aaet, ej wunin. Bōtaab enaaj em̧man n̄e kwonaaj ļōmņak kōn juōn men eo komaron̄ kōm̧m̧ane n̄an kwaļo̧k am̧ iakwe n̄an Jejtōr Jacobs.”
Olivia eaar ļōmņak kōn ta eo emaron̄ kar kōm̧m̧ane. Eaar kememej bwe Jinen im Jibwin raar lukkuun kōņaan pija ko ej jin̄aik.
“Ijeļā! Imaron̄ kōm̧m̧ane juōn kaat n̄an Jejtōr Jacobs im jin̄aik juōn pija n̄ai ie!”
Olivia eaar jin̄aik juōn iia aiboojoj. Ilo lowaan kaat eo eaar jei, “Ājmour kiiō wōt! Iakwe, Olivia.”
Ke Olivia im baam̧le eo an raar tōparļok m̧weo im̧ōn Jejtōr Jacobs, Mama eaar kajjitōk ippān Jejtōr Jacobs ekōjkan an pād. Jejtōr Jacobs eaar jino an jan̄.
“Ij kab jeļā bwe ij aikuj in etal n̄an im̧ōn taktō eo ilju n̄an aō m̧wijm̧wij. Ij mijak jidik.”
Mama eaar leļo̧k n̄an Jejtōr Jacobs pae eo. Innām Olivia eaar leļo̧k n̄an e kaat eo eaar kōm̧m̧ane.
“Kom̧ool, Olivia. Kaat aiboojoj in im ettōn̄ dikdik ņe am̧ ekōm̧m̧an an em̧man aō en̄jake.”
Olivia eaar en̄jake bwe juōn eaar atpo̧kwōj būruwōn. Eaar m̧ōņōņō bwe eaar maron̄ jipan̄ Jisōs najdik jiip ko An. ◼