Ko e Mālohi ʻo ha Fehuʻi
Naʻe ʻeke mai ʻe hoku ngaahi kaungāmeʻá pe ko e hā ʻoku ʻikai ke u kau ai mo hoku tuongaʻané ʻi he kalasi fakalotú. Ne ʻomi ʻe he fehuʻi ko iá ha faingamālie ke u fakamatala ange ʻo fekauʻaki mo e ongoongoleleí.
Naʻá ku kaungāmeʻa mo Kesitini ʻi hoku taʻu 14. Naʻá ma ō ki he akoʻanga tatau. Kuo fuoloa ʻeku ʻilo iá, ka naʻe teʻeki ke u ʻiloʻi moʻoni ia ki muʻa koeʻuhí he naʻe kei taʻu 12.
Ne ma toe maheni lelei ange ʻi heʻema fakatou feinga ke kau he polokalama ʻa e akó. Ne ʻikai hano taimi kuó ma kaungāmeʻa lelei neongo naʻá ma faikehekehe ʻaki ha taʻu ʻe ua. Naʻe ʻikai fuoloa kuó ma fetaulaki he hoʻataá ʻo ma lue lalo pē ʻo ʻeveʻeva mo talanoa. ʻI ha hoʻatā ʻe taha he faʻahitaʻu failaú lolotonga haʻama lue ʻo ʻeveʻeva, naʻá ne fehuʻi mai ha meʻa ʻe liliu ai ʻene moʻuí.
Naʻe fifili ʻa Kesitini pe ko e hā ʻoku ʻikai ke u kau ai mo hoku tuongaʻané ʻi he kalasi fakalotu ʻa e akó ʻo hangē ko e tokolahi ʻo e fānau ako ʻi ʻAositiliá. Naʻá ku fakamatala ange leva ʻo fekauʻaki mo e ongoongolelei ʻo Sīsū Kalaisí pea fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Hili ia peá u fai ange ʻeku fakamoʻoní mo fakaafeʻi ia ke haʻu ki ha ʻekitivitī ʻa e toʻu tupú. Naʻá ku foaki ange ki mui ai haʻane Tohi ʻa Molomona pea mo haʻane Liahona.
Talu mei ai mo e kau ʻa Kesitini ʻi he ʻekitivitī kotoa pē ʻa e Siasí mo maʻu lotu ʻi he Sāpate kotoa pē. Kuo ʻosi aʻu ʻo kau ʻi he konifelenisi ʻa e toʻu tupú. Ko e taimi ʻoku lava aí, ʻokú ma luelue ki he kiʻi vaitafe ofi maí ke lau ʻema folofolá mo ngāue ʻi he Tohi Fakalakalaka Fakatāutaha ʻa e Finemuí.
Meʻapango, he ʻikai lava ʻa Kesitini ia ʻo papitaiso kae ʻoua kuo taʻu 18. ʻOku ʻikai loto ʻene ongomātuʻá ʻaʻana ke fakatupu ha felāuaki mo hono kāingá. Neongo ʻa e ngaahi fakafeʻātungia ko ʻení, ne ʻosi lava pē ʻa Kesitini ia ʻo ʻomai ʻene fineʻeikí ki he lotú.
ʻOku toe ngāue foki ʻa Kesitini mo e ongo faifekaú. ʻOkú ne fakamatala fekauʻaki mo e Siasí ki he taha kotoa ʻoku fetaulaki mo ia pea kuó ne ʻosi ʻai ke vēkeveke ʻene tangataʻeikí ki he polokalama hisitōlia fakafāmilí, neongo ʻoku ʻikai haʻane tokanga ʻaʻana ki he lotú.
ʻOku hoko ʻa Kesitini ko ha sīpinga kiate au ʻi hono faingofua ke talanoa mo ha kakai kehe fekauʻaki mo e ongoongoleleí pea mo e founga hono teuteuʻi ʻe heʻetau Tamai Hēvaní ʻa e kakaí ke nau fanongo ki Heʻene folofolá. Ko e meʻa pē ʻoku fie maʻú ke fakaava hotau ngutú pea maʻu ha tui. ʻE tokamālie leava ʻa e toengá ia.