Lotua ʻo ha Tali
Ko e taimi ʻe niʻihi te ke lotua ai ha tokoni, ka ko e talí ʻoku toki maʻu pē ia hili hano siviʻi hoʻo tuí.
Lolotonga haʻaku sivi fika ʻi ha ʻaho ʻe taha, kuo ʻikai ke u toe manatuʻi ʻe au e founga ki hono veteki ʻo e ngaahi palopalemá. Naʻá ku ʻosi teuteu ki he sivi ko ʻení, ka kuo ʻikai ke u toe manatuʻi ʻe au ʻa e meʻa naʻá ku ʻosi toe vakaiʻi ʻi ʻapí. Neongo ia, naʻá ku maʻu ha tui te u lava pē ʻo kole ki heʻeku Tamai Hēvaní ke tokoni.
Naʻá ku pehē leva te u tali ʻa e ʻuluaki ueʻi te u maʻú. Hili ʻeku lotú, naʻá ku maʻu ha ongo te u lava ʻo fai ʻa e foʻi fiká ʻi ha founga mahino. Ka naʻe kamata ke u toe veiveiua koeʻuhí he naʻe hangē ia ha founga ngali kehe ke fai ai ʻa e foʻi fiká. Ko ia, ne u hoko atu leva ʻo fai ia ʻi he founga pē ʻaʻaku ki he lelei taha ne u lavá.
ʻI he hili hono fakafoki ʻo e ngaahi siví kotoa, ne mau vakaiʻi leva mo e faiakó ʻa e siví. Naʻá ku fakatokangaʻi ko e ongo ko ia naʻá ku maʻu ʻi he hili ʻeku lotú, naʻá ne mei taki au ki he tali totonú, ka naʻe ʻikai ke u fanongo.
Ki mui ange, ʻi he lolotonga ʻo e sivi fakaʻosí, naʻá ku toe fakatokangaʻi kuo ʻikai ke u lava ʻe au ʻo fikaʻi ʻa e ngaahi foʻi fiká, neongo naʻá ku ʻosi ako ʻa e foʻi fika ko ʻení ʻi ʻapi.
Naʻá ku fie kole tokoni ki he Tamai Hēvaní, ka naʻá ku manatuʻi ʻa e taimi naʻá ku fakasītuʻaʻi mahino ai ʻEne tokoní. Kuó u mā ʻeni ke toe kole. Ka koeʻuhí naʻe ʻikai ke u lava ʻo fakakaukauʻi ha toe founga, ne talu ai pē ʻeku toe lotua ha tokoni.
Naʻá ku toe veiveiua pē ʻi he taimi ne ueʻi ai aú; naʻá ku toe veiveiua lahi ange ʻi he tuʻunga naʻe hoko ki muʻá. Ka naʻá ku ʻosi palōmesi ki he ʻEikí te u fakafanongo. Ko ia ne u fakangaloʻi leva ʻeku loto veiveiuá ka u fai pau ki he meʻa naʻe talamai ʻe he ongo ko ʻení ʻoku totonu ke u fakahokó.
Hili hono fakatonutonu e ngaahi siví, ne fakahā leva ʻe he faiakó homau māká. Naʻá ne ʻai ke fakalelea loto ʻaki haʻane kamata mei he maaka maʻulalo tahá ʻo faai hake ki he lelei tahá. Ko e taimi naʻe ʻikai ke ne ui ai hoku hingoá ʻi he tolú—ko ha maaka maʻulalo ia—naʻá ku fiefia he te u maʻu ha 2, ko ha maaka lelei taha ia kuo faifaiangé peá u maʻu ʻi he fiká. Ka ʻi he ʻikai ke ne ui hoku hingoá ʻi he kau uá, naʻá ku ongoʻi faikehe ʻaupito. Naʻá ku fakapapauʻi moʻoni he ʻikai ke u maʻu ha 1, ko ia ne u kamata ke manavasiʻi naʻa ko e kovi taha ʻeku siví ʻi he kalasí kotoa.
Ka naʻe toki ui mai hoku hingoá ʻi he niʻihi naʻe 1. Naʻá ku mei tangi ʻi he taimi naʻá ku fakatokangaʻi ai e toʻukupu ʻo e ʻEikí ʻi he meʻá ni mo u ʻilo ʻa ʻEne ʻofa mo ʻene faʻa kātakiʻi aú. Ko e taimi naʻe pehē mai ai ha niʻihi ʻo hoku kaungā akó, “Ne ke tō atu koé!” Ko e meʻa pē ne u faí ko e kalokalo hoku ʻulú. Naʻá ku toki lavameʻa pē ʻi he taimi naʻá ku muimui ai ki he ueʻi ʻa e Laumālié.